លោក ឱម យ៉ិនទៀង ក្នុងពេលធ្វើសន្និសីទកាសែតនៅអង្គភាពប្រឆាំងអំពើពុករលួយកន្លងមកនេះ។ ស្រេង ម៉េងស្រ៊ុន
NGO រិះគន់ការតែងតាំងកូនលោក ឱម យ៉ិនទៀង ក្នុងកន្លែងតែមួយ
Wed, 27 April 2016 ppp
ម៉ិច ដារ៉ា and ប៉ិច សុធារី
ភ្នំពេញៈ មន្ត្រីអង្គការសង្គមស៊ីវិលបានសម្ដែងការយល់ឃើញរបស់ខ្លួនថាការតែងតាំងកូនប្រុសប្រធានអង្គភាពប្រឆាំងអំពើពុករលួយពីររូបឲ្យធ្វើជាមន្ត្រីជាន់ខ្ពស់ស្ថាប័នតែមួយនេះអាចនឹងកើតមានទំនាស់ផលប្រយោជន៍បក្ខពួកនិយម និងធ្វើឲ្យបាត់បង់តម្លាភាពរបស់ស្ថាប័នមួយនេះប៉ុន្តែមន្ត្រីជាន់ខ្ពស់អង្គភាពនេះថាការតែងតាំងនោះគឺដោយសារពួកគាត់ទាំងពីរមានសមត្ថភាពគ្រប់គ្រាន់សម្រាប់មុខតំណែងនេះ។
ការលើកឡើងនេះបានធ្វើឡើងក្រោយពីព្រះមហាក្សត្រព្រះករុណាព្រះបាទ សម្តេចព្រះបរមនាថ នរោត្តម សីហមុនី បានចេញអនុក្រឹត្យមួយកាលពីថ្ងៃទី ២៣ ខែមេសាត្រាស់បង្គាប់តែងតាំង និងផ្តល់ឋានៈដល់មន្ត្រីឧបការីចំនួន ១៨ រូបនៃអង្គភាពប្រឆាំងអំពើពុករលួយដែលមានឋានៈស្មើនឹងរដ្ឋមន្ត្រី រដ្ឋលេខាធិការ អនុរដ្ឋលេខាធិការ និងអគ្គនាយកក្នុងនោះក៏មានកូនប្រុស លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) ពីរនាក់ផងដែរគឺលោក យ៉ិនទៀង ពុទ្ធីរិទ្ធ មានឋានៈស្មើរដ្ឋលេខាធិការ និងលោក យ៉ិនទៀង ពុទ្ធិរ៉ា មានឋានៈស្មើអនុរដ្ឋលេខាធិការ។
នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) និងជាអ្នកវិភាគបញ្ហាសង្គមលោក សន ជ័យ បានលើកឡើងកាលពីម្សិលមិញថាកន្លងមកប្រធាន ACU ធ្លាប់បានលើកឡើងពីតម្លាភាព និង រិះគន់ដល់ក្រសួងស្ថាប័នមួយចំនួនដែលដាក់សាច់ញាតិរបស់ខ្លួនធ្វើការនៅស្ថាប័នតែមួយប៉ុន្តែពេលនេះបែរជាអង្គភាពមួយនេះតែងតាំងកូនរបស់ខ្លួនឲ្យកាន់តួនាទីក្នុងអង្គភាពតែមួយទៅវិញ។
លោកយល់ថា ការតែងតាំងនេះអាចនឹងកើតមានទំនាស់ផលប្រយោជន៍ បក្ខពួកនិយម និងធ្វើឲ្យអង្គភាពបាត់បង់នូវតម្លាភាព។
លោកបានថ្លែងថា «វាជារូបភាពមួយមិនល្អទេហើយនឹងប៉ះពាល់ដល់ការធ្វើកំណែទម្រង់ស៊ីជម្រៅរបស់រដ្ឋាភិបាលហើយខ្ញុំមើលឃើញថាការតែងតាំងនេះជាការត្រៀមបម្រុងទាយាទសម្រាប់ស្នងតំណែង ACU ទៅថ្ងៃក្រោយអាហ្នឹងគឺជារឿងមួយដែលគិតថាចៀសមិនរួចទេ»។
នាយិកាគណៈកម្មាធិការកម្ពុជាឯករាជ្យប្រឆាំងអំពើពុករលួយលោកស្រី ម៉ម ស៊ីថា យល់ថាការផ្តល់តំណែងតួនាទីដល់សម្រាប់សែស្រឡាយរបស់ប្រធានអង្គភាព ACU ដោយពុំមានការប្រឡងប្រកួតប្រជែងបែបនេះអាចនឹងធ្វើឲ្យប៉ះពាល់ដល់អារម្មណ៍របស់មន្ត្រីក្រោមឱវាទ និងជារឿងគ្រួសារនិយម និងអាចបង្កឲ្យមានទំនាស់ផលប្រយោជន៍។
លោកស្រីថា «អង្គភាពតែងតែមានពាក្យស្លោកដែលថាការប្រឆាំងអំពើពុករលួយគឺចាប់ផ្តើមពីខ្លួនឯងតែបើអង្គភាពហ្នឹងខ្លួនឯងអត់ចាប់ផ្តើមពីខ្លួនឯងផងអ៊ីចឹងវាអាចនឹងឲ្យអស់ជំនឿដល់អ្នកដែលឃ្លាំមើល ឬអ្នកចូលរួមប្រឆាំងអំពើពុករលួយដែរដូច្នេះអង្គភាពនេះគួរតែមានយន្តការច្បាស់លាស់ក្នុងការបណ្តុះបណ្តាលជំនាញ និងគួរមានតម្លាភាពក្នុងការជ្រើសរើសតែងតាំងមុខតំណែង»។
ទោះយ៉ាងណាអនុប្រធានអង្គភាពប្រឆាំងអំពើពុករលួយលោក នួន បូផល បានច្រានចោលការរិះគន់របស់សង្គមស៊ីវិលទាំងនោះដោយថាការតែងតាំងកូនប្រុសលោក ឱម យ៉ិនទៀង នេះគឺដោយសារមន្ត្រីទាំងពីររូបនេះមានសមត្ថភាពគ្រប់គ្រាន់ក្នុងការកាន់តួនាទីខណៈដែលមន្ត្រីទាំងពីររូបនេះមានជំនាញផ្នែកស៊ើបអង្កេត និងបានធ្វើការនៅអង្គភាពនេះយូរឆ្នាំមកហើយ។
លោកថា៖ «ខ្ញុំមិនយល់ទេកូនអ្នកធំមិនអ្នកធំសំខាន់គេមានសមត្ថភាពគេចេះធ្វើការហើយខ្ញុំដូចមិនដែលឮក្មួយៗទាំងហ្នឹងគាត់មានបាតុភាពអីផងមិនដែលឮសូររឿងអីដែលអសកម្មធ្វើឲ្យមានបញ្ហាដល់សង្គមដល់ប្រទេសជាតិផង អ៊ីចឹងរឿងអីដែលថាមិនអាចឲ្យគាត់ទទួលកិត្តិយសទាំងនេះបាន»។
កន្លងមកមន្ត្រីសង្គមស៊ីវិលក៏ធ្លាប់បានរិះគន់ទៅលើក្រសួង និងស្ថាប័នមួយចំនួនដែលបានតែងតាំងសែស្រឡាយរបស់ខ្លួនឲ្យកាន់តួនាទី ឬមុខតំណែងក្នុងក្រសួង និងស្ថាប័នតែមួយផងដែរហើយកាលពីខែមីនា ឆ្នាំ ២០១៥ អ្នកតំណាងរាស្ត្រគណបក្សប្រឆាំងក៏ធ្លាប់បានបញ្ចេញឯកសាររាយនាមបញ្ហាក្រុមគ្រួសារនិយមរបស់លោក មិត្ត ការ៉េន អគ្គលេខាធិការរងនៃរដ្ឋសភាដែលកំពុងបម្រើការងារនៅនាយកដ្ឋានមួយចំនួននៃរដ្ឋសភាដែលក្នុងនោះមានកូនបង្កើត កូនប្រសា ប្អូនប្រុស-ស្រី ប្អូនថ្លៃ និងក្មួយជាដើម៕
No comments:
Post a Comment