Mon, 8 February 2016 ppp
ភ្នំពេញៈ កម្ពុជាកំពុងទទួលរងនូវផលប៉ះពាល់ហួសហេតុពីឧស្ម័នកម្ដៅដែលបានបញ្ចេញដោយប្រទេសអភិវឌ្ឍន៍ជាច្រើន។ នេះបើយោងតាមការសិក្សាថ្មីមួយដែលបានចេញផ្សាយក្នុងទស្សនាវដ្តី Nature កាលពីថ្ងៃសុក្រ។
ការសិក្សាដែលបានអនុវត្តដោយសាកលវិទ្យាល័យ Queen-sland និងអង្គការអភិរក្សសត្វព្រៃបានរកឃើញថាប្រទេសបញ្ចេញឧស្ម័នទាំង ២០ រួមមានចិន អូស្ត្រាលី និងអាមេរិកគឺជា «ប្រទេសឱកាសនិយម» ដោយទទួលបានផលពីវិស័យបញ្ចេញឧស្ម័នពុលប៉ុន្តែរងផលប៉ះពាល់តិចធៀបនឹងទំហំសេដ្ឋកិច្ចរបស់ខ្លួន។ ទន្ទឹមនឹងនេះដែរប្រទេសដែលមិនបញ្ចេញឧស្ម័នពុលជាច្រើនកំពុងទទួលរងនូវផលប៉ះពាល់ខ្លាំង។
យោងតាមការសិក្សាបានឲ្យដឹងថាកម្ពុជាគឺជាប្រទេសមួយក្នុងចំណោមប្រទេសទាំង ៣៦ ដែលរងផលប៉ះពាល់ខ្លាំងដោយសារការប្រែប្រួលនៃអាកាសធាតុគិតដល់ឆ្នាំ ២០១០។ បើនិន្នាការបច្ចុប្បន្ននៅតែបន្តភាពងាយរងគ្រោះរបស់កម្ពុជានឹងត្រូវបន្ទាបទៅ «ធ្ងន់ធ្ងរ» នៅត្រឹមឆ្នាំ ២០៣០។
លោកJames Watson សហអ្នកនិពន្ធនៃការសិក្សានៅឯសាកលវិទ្យាល័យ Queen-sland បានឲ្យដឹងក្នុងសេចក្តីថ្លែងមួយថា៖ «នេះដូចអ្នកឥតជក់បារីកើតជំងឺមហារីកដែលបង្កឡើងដោយការហិតផ្សែងបារីខណៈពេលដែលអ្នកជក់បារីច្រើនបន្តជក់តទៅទៀត។ សំខាន់យើងអំពាវនាវដល់អ្នកជក់បារីឲ្យបង់ប្រាក់ថ្លៃថែទាំសុខភាពសម្រាប់អ្នកមិនជក់បារីដែលអ្នកជក់បារីបានបង្កគ្រោះថ្នាក់ដោយផ្ទាល់»។
ការគំរាមកំហែងពីការប្រែប្រួលអាកាសធាតុមកលើកម្ពុជាត្រូវបានបញ្ជាក់ដោយអង្គការផ្សេងៗដូចជាអង្គការស្បៀងអាហារ និងកសិកម្ម និងទីភ្នាក់ងារឥណទាន Standard& Poor ដែលអង្គការទាំងពីរនេះបានកំណត់ចំណាត់ថ្នាក់កម្ពុជាជាប្រទេសស្ថិតក្នុងចំណោមប្រទេសងាយរងគ្រោះបំផុតប៉ុន្មានឆ្នាំកន្លងមក។
លោក Nop Polin ប្រតិភូរបស់អង្គការសង្គមស៊ីវិលកម្ពុជាទៅចូលរួមក្នុងកិច្ចពិភាក្សា COP21 នៅទីក្រុងប៉ារីសបាននិយាយថាភាពងាយរងគ្រោះរបស់កម្ពុជាត្រូវបានបង្ហាញដោយកសិករកម្ពុជាមាន «សមត្ថភាពទាបក្នុងការសម្របខ្លួនទៅនឹងការប្រែប្រួលអាកាសធាតុ»។ ប្រសិនបើដំណាំរបស់ពួកគេត្រូវបានបំផ្លាញដោយអាកាសធាតុខ្លាំងពួកគេភាគច្រើនគ្មានជម្រើសទេគឺត្រូវស្រេកឃ្លាន ឬជាប់បំណុលកាន់តែជ្រៅ។
លោក Polin បានឲ្យដឹងថាលើសពីនេះទៀតប្រព័ន្ធសុខាភិបាលកម្ពុជាងាយរងគ្រោះនឹងជំងឺដែលកើតឡើងយ៉ាងឆាប់រហ័សដោយសារអាកាសធាតុក្តៅ។
លោកបានបន្ថែមថាខណៈរដ្ឋាភិបាលកម្ពុជា និងសង្គមស៊ីវិលអាចធ្វើកិច្ចការច្រើនដើម្បីធ្វើឱ្យប្រសើរឡើងនូវការសម្របសម្រួល និងការប្តេជ្ញាប្រយុទ្ធប្រឆាំងនឹងការប្រែប្រួលអាកាសធាតុកម្ពុជាស្ថិតក្រោមតួអង្គធំ។ លោកបាននិយាយថាកិច្ចព្រមព្រៀងទីក្រុងប៉ារីសគឺវា «សំខាន់» ចំពោះកម្ពុជា។
ទោះជាយ៉ាងណាអ្នកនិពន្ធនៃ Nature បានថ្លែងថាគោលដៅបច្ចុប្បន្នចំពោះការបំភាយឧស្ម័នធ្វើឲ្យឡើងកម្ដៅមិនអាចកម្រិតមកត្រឹមក្រោម ២ អង្សាសេ និងមិនមានសញ្ញាបង្ហាញច្បាស់ពីរបៀបនៃកិច្ចព្រមព្រៀងទីក្រុងប៉ារីសនឹងជោគជ័យទេ។
អ្នកនិពន្ធបានសរសេរទៀតថា៖ «ការប្តេជ្ញាជាប្រវត្តិសាស្ត្រក្នុងការកាត់បន្ថយការបំភាយឧស្ម័នធ្វើឲ្យឡើងកម្ដៅដោយប្រទេសឱកាសនិយមមានភាពយឺតយ៉ាវ»៕
Igor Kossov
No comments:
Post a Comment