ដោយ ប្រាជ្ញ ចេវ
2015-12-19 rfa
 |
| ក្រុមអង្គការសង្គមស៊ីវិល និងសកម្មជនដីធ្លី ជម្នះពីការរារាំងរបស់កម្លាំងអាជ្ញាធរ បានធ្វើដំណើរដល់មុខរដ្ឋសភា តវ៉ាប្រឆាំងសេចក្ដីព្រាងច្បាប់អង្គការ-សមាគម និងច្បាប់សហជីព នៅថ្ងៃទី៣០ មិថុនា ២០១៥។
RFA/Tha Kitya
|
ក្រុមការងារគណៈកម្មការចំពោះកិច្ចរបស់គណបក្សសង្គ្រោះជាតិ ដែលបង្កើតដើម្បីពិនិត្យ និងជជែកជាមួយគណបក្សប្រជាជនកម្ពុជា ទាក់ទងនឹងសេចក្ដីព្រាងច្បាប់សហជីព គ្រោងជួបសហជីព និងសង្គមស៊ីវិល មុននឹងជួបភាគីគណបក្សប្រជាជនកម្ពុជា។ ចំណែកគណបក្សប្រជាជនកម្ពុជា មិនទាន់បង្ហាញសមាសភាពនៃគណៈកម្មការចំពោះកិច្ចនៅឡើយទេ។
គម្រោងជួបភាគីពាក់ព័ន្ធរបស់គណៈកម្មការចំពោះកិច្ចរបស់គណបក្សសង្គ្រោះជាតិ នៅពេលនេះ ដើម្បីចង់ដឹងបន្ថែមទៀតពីភាពមិនប្រក្រតីនៃច្បាប់សហជីព ដើម្បីយកទៅជជែកជាមួយគណបក្សប្រជាជនកម្ពុជា។ ក្រុមការងារចំពោះកិច្ចភាគីគណបក្សសង្គ្រោះជាតិ ដែលមានសមាសភាពមន្ត្រីជំនាញផ្នែកច្បាប់ទាំង ៥រូប គឺលោក សុន ឆ័យ អ្នកស្រី កែ សុវណ្ណរតន៍ លោក អ៊ូ ច័ន្ទឫទ្ធិ កែវ ភារម្យ និងលោក ឃី សុខរិទ្ធ។
មន្ត្រីជាន់ខ្ពស់គណបក្សសង្គ្រោះជាតិ លោក សុន ឆ័យ ឲ្យដឹងនៅថ្ងៃទី១៩ ខែធ្នូ ថា ក្រុមការងារលោកគ្រោងជួបសហជីព សង្គមស៊ីវិល អង្គការអន្តរជាតិខាងការងារ ហៅថា អាយឡូ (ILO) នៅចុងខែធ្នូ ឬដើមខែមករា ឆ្នាំ២០១៦ ហើយកន្លងមកលោកធ្លាប់ទទួលបានសំណើខ្លះៗពីសហជីពដែរ។ លោកបន្តថា ការកែប្រែសេចក្ដីព្រាងច្បាប់នេះជារឿងចាំបាច់ ព្រោះច្បាប់នេះ មិនបានការពារកម្មករទេ៖ «»។
កាលពីថ្ងៃទី១១ ខែធ្នូ លោក ហ៊ុន សែន បញ្ជាឲ្យលោក ស ខេង រៀបចំបង្កើតគណៈកម្មាធិការចំពោះកិច្ចដែលមានរដ្ឋមន្ត្រីពាក់ព័ន្ធជាប្រធាន។ ទាក់ទងរឿងនេះដែរ អ្នកនាំពាក្យគណបក្សប្រជាជនកម្ពុជា លោក សុខ ឥសាន ថា លោកមិនទាន់បានដឹងពីសមាសភាពនៃគណៈកម្មការចំពោះកិច្ចរបស់គណបក្សប្រជាជនកម្ពុជា នៅឡើយទេ។ ទោះបែបនេះក្តី លោកថា សេចក្ដីព្រាងច្បាប់ស្ដីពីសហជីព គ្មានអីដែលត្រូវកែប្រែច្រើននោះទេ ព្រោះរដ្ឋាភិបាលធ្វើបានល្អគ្រប់លក្ខណៈទៅហើយ៖ «»។
សេចក្ដីព្រាងច្បាប់ស្ដីពីសហជីព ត្រូវបានរដ្ឋាភិបាលរៀបចំឡើងតាំងពីឆ្នាំ២០០៨ ដែលមាន ១៧ជំពូក និង ១០០មាត្រា មានវិសាលភាពគ្របដណ្ដប់លើសហគ្រាសគ្រឹះស្ថាន និងជនទាំងឡាយណាដែលស្ថិតនៅក្នុងសហគ្រាស ឬគ្រឹះស្ថានក្រោមបទប្បញ្ញត្តិ នៃច្បាប់ស្ដីពីការងារ។ សេចក្ដីព្រាងច្បាប់នេះ រងការរិះគន់ថា មានលក្ខណៈគាបសង្កត់ដល់សិទ្ធិសេរីភាពរបស់កម្មករ និងសហជីព។
ផ្ទុយពីការអះអាងរបស់អ្នកនាំពាក្យគណបក្សប្រជាជនកម្ពុជា អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក គង់ អាទិត្យ ឲ្យដឹងថា សេចក្ដីព្រាងច្បាប់ស្ដីពីសហជីពយ៉ាងហោចណាស់ត្រូវកែប្រែមាត្រាជាង ១០ ដែលចំណុចមិនប្រក្រតីធ្វើឲ្យប៉ះពាល់ប្រយោជន៍កម្មករ និងសហជីព។ លោកបន្តថា លោកមិនសូវមានជំនឿថា គណៈកម្មការចំពោះកិច្ចរបស់គណបក្សសង្គ្រោះជាតិ អាចកែប្រែអ្វីបាននោះទេ ប្រសិនបើគណបក្សប្រជាជនកម្ពុជា មិនគ្មានឆន្ទៈក្នុងការកែប្រែសេចក្ដីព្រាងច្បាប់នេះ៖ «»។
កាលពីពេលថ្មីៗនេះ សហជីពកម្មករធំៗជាង ២០ បានរួមគ្នាដាក់លិខិតទៅលោកនាយករដ្ឋមន្ត្រី ហ៊ុន សែន ដោយស្នើសុំជួបជាមួយតំណាងរាស្ត្រគណបក្សប្រជាជនកម្ពុជា ដើម្បីពិភាក្សាពីបញ្ហាដែលជាកង្វល់របស់សហជីព ប៉ុន្តែមកដល់ពេលនេះនៅមិនទាន់មានការឆ្លើយតបនៅឡើយ។ អ្នកនាំពាក្យគណបក្សប្រជាជនកម្ពុជា លោក សុខ ឥសាន ថា គណបក្សប្រជាជនកម្ពុជា ស្វាគមន៍ការរិះគន់ ការផ្ដល់គំនិតនានារបស់អ្នកពាក់ព័ន្ធ៕
No comments:
Post a Comment