ដោយ៖ ញឹម សុខន | ថ្ងៃអាទិត្យ ទី18 មករា 2015,

រូបភាព លោក កឹម សុខា និងលោក សម រង្ស៊ី មេដឹកនាំគណៈបក្ស សង្គ្រោះជាតិ ក្នុងវេទិកាសាធារណៈមួយនៅសង្កាត់ព្រែកលៀប

មេដឹកនាំបក្សប្រឆាំងរំឭកបក្សកាន់អំណាចម្តងទៀតថា តុលាការព្រហ្មទណ្ឌអន្តរជាតិនឹងកោះហៅមេដឹកនាំកម្ពុជាបច្ចុប្បន្នទៅសាកសួរពីឧក្រិដ្ឋកម្មប្រឆាំងមនុស្សជាតិបើនៅតែបន្តចាប់សកម្មជនបក្សប្រឆាំងទៅឃុំខ្លួនដើម្បីយកប្រៀបផ្នែកនយោបាយបែបនេះ ។

ការព្រមានជាថ្មីទៀតរបស់មេបក្សប្រឆាំងនេះធ្វើឡើងក្នុងវេទិកាសាធារណៈមួយនៅសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ នាថ្ងៃទី១៨ខែមករាឆ្នាំ២០១៥នេះ ។

ក្នុងពិធីនោះ អនុប្រធានគណបក្សសង្គ្រោះជាតិ លោក កឹម សុខា ថ្លែងប្រាប់សកម្មជននិងអ្នកគាំទ្រខ្លួនថា គណបក្សប្រជាជនកម្ពុជាបច្ចុប្បន្នកំពុងប្រើយុទ្ធសាស្ត្រ៣ ដើម្បីវាយបំបែកក្បាលម៉ាស៊ីនដឹកនាំបក្សប្រឆាំងឲ្យចុះខ្សោយក្នុងបំណងទម្លាក់ប្រជាប្រិយភាពបក្សប្រឆាំងមួយនេះ។

លោក កឹម សុខា អះអាងថា យុទ្ធសាស្ត្រ៣នោះ គឺបំបែក បំបាក់ និងបំបាត់ ។ មេដឹកនាំបក្សប្រឆាំងរូបនោះយល់ថា រូបមន្តបំបែកតាមរយៈទិញនិងសម្លុតបក្សកាន់អំណាចប្រើលែងមានប្រសិទ្ធភាពហើយ នៅឡើយតែបំបាក់ស្មារតីអ្នកគាំទ្រដោយបន្តចាប់ឃុំខ្លួនសកម្មជននិងបំបាត់គឺលួចបន្លំសន្លឹកឆ្នោត ។

លោក កឹម សុខា ឲ្យដឹងទៀតថា នៅយប់មិញនេះលោកបានទទួលដំណឹងពីក្រៅប្រទេសមកថា តុលាការព្រហ្មទណ្ឌអន្តរជាតិ (ICC) កំពុងពិនិត្យពាក្យបណ្តឹងដែលមេធាវីអន្តរជាតិធ្លាប់ប្តឹងកន្លងទៅហើយ ។

លោកថា បើគណបក្សប្រជាជននៅតែបន្តធ្វើឲ្យនយោបាយនៅកម្ពុជាឡើងកម្ដៅដោយបន្តចាប់ឃុំខ្លួនទាំងសកម្មជនបក្សប្រឆាំងនិងសកម្មជនដីធ្លីបន្តទៀតនោះវារឹតតែផ្តល់ភស្តុតាងបន្ថែមទៀតដល់តុលាការអន្តរជាតិមួយនេះដើម្បីកោះហៅទៅសាកសួរ ។

ក្រោយពីជាប់គាំងនយោបាយក្រោយការបោះឆ្នោតអាណត្តិទី៥នេះកម្ដៅនយោបាយបានកើនឡើងធ្វើឲ្យក្រុមអ្នកប្រឆាំងលទ្ធផលបោះឆ្នោតច្រើននាក់ត្រូវកងកម្លាំងប្រដាប់អាវុធរបស់រដ្ឋាភិបាលបាញ់សម្លាប់ ខ្លះទៀតរងនូវការវាយដំនិងចាប់ឃុំខ្លួន ។

ជាងនេះទៅទៀតមេធាវីអន្តរជាតិលោក រីច្ឆាត រ៉ូជ្ជឺ ក៏បានដាក់ពាក្យប្តឹងរដ្ឋាភិបាលដែលដឹកនាំដោយលោកនាយករដ្ឋមន្ត្រីហ៊ុន សែន ពីបទឧក្រិដ្ឋកម្មប្រឆាំងមនុស្សជាតិទៅ(ICC)។ ប៉ុន្តែមកដល់ពេលនេះ តុលាការអន្តរជាតិមួយនេះមិនទាន់កោះហៅរដ្ឋាភិបាលសាកសួរតាមបណ្តឹងនោះនៅឡើយទេ ។

រដ្ឋាភិបាលធ្លាប់ប្រានចោលការចោទប្រកាន់នេះដោយអះអាងថា ការចាប់ខ្លួនសកម្មជនគណបក្សនយោបាយបក្សប្រឆាំងនិងសកម្មជនដីធ្លី ជានីតិវិធីរបស់តុលាការមិនជាប់ពាក់ព័ន្ធនឹងការជ្រៀតជ្រែករបស់រដ្ឋាភិបាលទេ ។

យ៉ាងណាក៏ដោយ លោក កឹម សុខា អំពាវនាវឲ្យរដ្ឋាភិបាលប្រញាប់ដោះលែងសកម្មជន និងអ្នកពាក់ព័ន្ធមួយចំនួនទៀត ឲ្យមានសេរីភាពវិញដើម្បីពន្លត់កម្ដៅនយោបាយនេះ និងបង្ហាញថា ការប្រកួតប្រជែងផ្នែកនយោបាយធ្វើឡើងក្នុងរូបភាពថ្លៃថ្នូរស្មើភាពមិនជាប់ពាក់ព័ន្ធនឹងឧក្រិដ្ឋកម្មប្រឆាំងមនុស្សជាតិ ៕