(ចុះផ្សាយនៅថ្ងៃ 
26-12-2014, 
5:42 pm) | ដោយ ជា ធីរិទ្ធ
26-12-2014, 5:42 pm) | ដោយ ជា ធីរិទ្ធ
ស្ពានអ្នកលឿងដ៏ទំនើបនៅកម្ពុជា ឆ្លងកាត់ទន្ថេមេគង្គពីខេត្តកណ្តាលទៅខេត្តព្រៃវែង និងឆ្ពោះទៅខេត្តស្វាយរៀងនោះ នឹងដាក់ឲ្យប្រជាពលរដ្ឋឆ្លងកាត់នៅសប្តាហ៍ទី ១ នៃខែមេសា ឆ្នាំ ២០១៥ នាពេលខាងមុខនេះ។ ស្ពានអ្នកលឿងនេះ ចំណាយទឹកប្រាក់សាងសង់សរុបចំនួន ៩៥ លានដុល្លារ ជាជំនួយឥតសំណងរបស់រដ្ឋាភិបាលជប៉ុន។ ហើយស្ពាននេះ មានប្រវែងចំនួន ៥,៤ គីឡូម៉ែត្រ និងទទឹងជាង ១៣ ម៉ែត្រ។
ស្ពាននេះ កសាងឡើងក្រោមជំនួយឥតសំណងពីរដ្ឋាភិបាលជប៉ុន ដែលចំណាយទឹកប្រាក់សរុបចំនួន ៩៥ លានដុល្លារអាមេរិក។ អ្នកស្ថាបនាស្ពាននេះ មានអ្នកគ្រប់គ្រងជប៉ុនចំនួន ៩ នាក់ បុគ្គលិកប្រទេសទី៣ ចំនួន២៥ នាក់ បុគ្គលិកកម្ពុជាចំនួន ៥៧ នាក់ និងកម្មករកម្ពុជា ចំនួន ៦៤៧ នាក់។ ស្ពានអ្នកលឿងនេះ បើគិតពីផ្ទៃទឹកដល់តួស្ពានមានកម្ពស់ ៣៧.៥ ម៉ែត្រ ហើយនៅតួស្ពានកណ្តាលមានយោងដោយខ្សែកាពព័ណ៌លឿងចំនួន ១៦០ ដើម ប្រវែង៦៤០ ម៉ែត្រ។នៅថ្ងៃទី ១៤ ខែ មករា ឆ្នាំ ២០១៥ ខាងមុននេះ លោកនាយករដ្ឋមន្ត្រី ហ៊ុន សែន និងគណៈប្រតិភូជប៉ុន នឹងអញ្ជើញជាអធិបតីក្នុងពិធីសម្ពោធចាក់បេតុងផ្សាភ្ជាប់ស្ពានហើយនៅពាក់កណ្តាលខែមីនា ឆ្នាំ ២០១៥ ស្ពាននេះនឹងសាងសង់ចប់ជាស្ថាពរ។បន្ទាប់ពីស្ពានដាក់ឲ្យដំណើរការ ខាងភាគីជប៉ុននឹងធានាមើលការខុសត្រូវរយៈពេល ១ ឆ្នាំ ក្រោយមកនឹងប្រគល់ជូនរដ្ឋាភិបាលមើលការខុសត្រូវវិញ។
តំណាងវិស្វករជប៉ុនលោក Abe Yoshinori បានត្អូញត្អែរពីការលំបាកមួយចំនួននៃការសាងសង់ស្ពាននេះ ដោយសារតែនៅបាតទន្លេក្នុងបរិវេណសាងសង់ស្ពានមានគ្រាប់មិនទាន់ផ្ទះច្រើន ដែលត្រូវចំណាយពេលវេលាដល់ទៅ ៤ ខែ ពោលគឺពីខែកក្កដា ដល់ខែវិច្ឆិកា ឆ្នាំ ២០១២ ដើម្បីរុករកគ្រាប់មិនទាន់ផ្ទះ ។ លោកថា ក្នុងរយៈពេល ៤ ខែ ក្រោមកិច្ចសហការជាមួយមជ្ឈមណ្ឌលកម្ចាត់មីនកម្ពុជា ហៅកាត់ថា CMAC ក្រុមអ្នកជំនាញរបស់លោក បានរកឃើញគ្រាប់ដែលមិនទាន់ផ្ទះចំនួន ៤៧១៨ គ្រាប់ ។
ឮ
លោក Abe Yoshinori បន្តថា ស្ពានអ្នកលឿងនេះ ជាស្ពានដែលស្ថិតនៅក្នុងលំដាប់ថ្នាក់លេខ ៣០ ដល់ ៤០ បើប្រៀបធៀបជាមួយស្ពាននៅលើពិភពលោក។ ហើយវាក៏ជាស្ពានខ្សែកាព ដែលមានប្រវែងវែងបំផុត ដូចនៅប្រទេសជប៉ុនផងដែរ ។ «ស្ពាននេះ នឹងប្រើប្រាស់រយៈពេល ១០០ ឆ្នាំដោយមិនមានការជួសជុល ហើយរថយន្តដឹកជញ្ជូនដែលអាចឆ្លងកាត់ស្ពាននេះបានមិនឲ្យលើសពី ២៥ តោននោះឡើយ។ តែនេះមិនមែនមានន័យថា ស្ពានថា ស្ពាននេះមិនអាចទ្រទំងន់លើសពី ២៥ តោននោះទេ គឺអាចទ្របាន តែដើម្បីកុំឲ្យរថយន្តដឹកធ្ងន់ឆ្លងកាត់ស្ពាននេះ យើងត្រូវកំណត់មិនឲ្យលើស ២៥ តោន» ។ នេះជាការបញ្ជាក់របស់អ្នកជំនាញខាងលើ។
ជាមួយគ្នានេះ លោក លឹម ផល្លា ប្រធាននាយកដ្ឋានសហប្រតិបត្តិការអន្តរជាតិ នៃក្រសួងសាធារណៈការ និងដឹកជញ្ជូន បានអះអាងថា ស្ពាននេះ ជាស្ពានប្រវត្តិសាស្ត្ររបស់កម្ពុជា ដែលមិនធ្លាប់មានពីមុនមក។ ហើយស្ពាននេះ នឹងផ្តល់ផលប្រយោជន៍ដ៏ធំធេងសម្រាប់ប្រជាពលរដ្ឋឆ្លងកាត់ ជាពិសេសពលរដ្ឋនៅខេត្តព្រៃវែង កណ្តាល និងស្វាយរៀងតែម្តង។ លោក បញ្ជាក់ដូច្នេះថា «កន្លងមកពលរដ្ឋដែលឆ្លងកាត់តាមដំបន់នេះ ត្រូវឆ្លងស្រឡាង ហើយនៅពេលពិធីបុណ្យទានម្តងៗ ដូចជាបុណ្យចូលឆ្នាំខ្មែរ ជាដើម ប្រជាជនដែលធ្វើដំណើរពីភ្នំពេញឆ្លងកាត់កំពង់ចំលងអ្នកលឿងនេះ ត្រូវចំណាយពេលរហូតដល់ ៧ ទៅ ៨ ម៉ោង តែនៅពេលដែលស្ពាននេះ បើកឲ្យដំណើរការពលរដ្ឋនឹងលែងលំបាកទៀតហើយ» ។
No comments:
Post a Comment