យុវជន នាង សុឃុន ផ្ដល់បទសម្ភាសន៍មុខសាលាឧទ្ធរណ៍ បន្ទាប់តុលាការនេះបដិសេធពាក្យបណ្ដឹងរបស់លោកប្រឆាំងលោក ហ៊ុន សែន នៅព្រឹកថ្ងៃ៧ ឧសភា ឆ្នាំ២០១៤។
RFA/Sochivy
តុលាការសាលាឧទ្ធរណ៍ បានសម្រេចដោះលែងសកម្មជនគណបក្សសង្គ្រោះជាតិ ៣រូប ឲ្យនៅក្រៅឃុំជាបណ្ដោះអាសន្ន នៅព្រឹកថ្ងៃសុក្រ ទី២២ ខែសីហា។ សាលដីកានេះ ត្រូវមន្ត្រីសង្គមស៊ីវិល និងមេធាវីការពារក្តីយុវជនទាំង ៣រូប រិះគន់ចំពោះការតម្រូវឲ្យយុវជនទាំង ៣រូប បង់ប្រាក់តម្កល់ច្រើនហួសរហូតដល់ ៣០លានរៀល។
នៅក្នុងសវនាការអសាធារណៈ ឬសវនាការបិទទ្វារនៅសាលាឧទ្ធរណ៍ ទៅលើសំណុំរឿងស្នើនៅក្រៅឃុំរបស់យុវជនបក្សប្រឆាំងទាំង ៣រូប លោក សេង ស៊ីវុត្ថា ចៅក្រមតុលាការសាលាឧទ្ធរណ៍ បានដាក់លក្ខខណ្ឌ ៤ចំណុចដល់យុវជនទាំង ៣រូប មានដូចជា មិនឲ្យចេញក្រៅប្រទេស មិនត្រូវផ្លាស់ប្ដូរទីលំនៅ ត្រូវចូលខ្លួនតាមដីកាកោះរបស់តុលាការ និងត្រូវតម្កល់ប្រាក់ចំនួន ៣០លានរៀល។
ត្រង់ចំណុចនេះ លោក សំ សុខគង់ ស្ថិតក្នុងចំណោមមេធាវីការពារក្តីយុវជនទាំង ៣រូប បានរិះគន់ចៅក្រមតុលាការសាលាឧទ្ធរណ៍ ដែលតម្រូវឲ្យយុវជនទាំង ៣នាក់ បង់ប្រាក់តម្កល់ ៣០លានរៀល ថាជាចំនួនដ៏ច្រើន ដែលបង្កផលវិបាកដល់គ្រួសារយុវជនទាំង ៣រូប៖ «ចៅក្រម សេង ស៊ីវុត្ថា គាត់បានប្រកាសសាលដីកាដោយសម្រេចឲ្យយុវជនទាំង ៣នាក់ហ្នឹង បាននៅក្រៅឃុំជាបណ្ដោះអាសន្ន ដែលនៅក្នុងការសម្រេចឲ្យនៅក្រៅឃុំបណ្ដោះអាសន្នហ្នឹង សាលាឧទ្ធរណ៍បានដាក់នូវលក្ខខណ្ឌចំនួន៤។ ទី១ នៅពេលដែលជនជាប់ចោទទាំង ៣នាក់ហ្នឹងចង់ចេញទៅក្រៅប្រទេស ត្រូវមានការអនុញ្ញាតពីតុលាការ។ ទី២ នៅពេលជនជាប់ចោទទាំង ៣នាក់ហ្នឹងប្ដូរលំនៅឋាន ត្រូវតែជូនដំណឹងមកតុលាការ។ ទី៣ ត្រូវធានាថា នៅពេលតុលាការត្រូវការរូបគាត់ពេលណា ត្រូវតែមកបង្ហាញខ្លួននៅចំពោះមុខតុលាការ និងទី៤ ជាចំណុចដ៏សំខាន់នោះ គឺតុលាការបង្គាប់ឲ្យពួកគាត់ដាក់ប្រាក់តម្កល់ធានាខ្លួនបាននៅក្រៅឃុំចំនួន ៣០លានរៀល»។
ចំណែក លោក ហូរ វ៉ាន់ តំណាងរាស្ត្រមណ្ឌលភ្នំពេញគណបក្សសង្គ្រោះជាតិ ដែលបង្ហាញវត្តមាននៅមុខសាលាឧទ្ធរណ៍ បានសាទរសាលដីការបស់តុលាការសាលាឧទ្ធរណ៍ លើសំណុំរឿងយុវជនទាំង ៣រូប៖ «ឥឡូវនេះយុវជន ៣នាក់ក៏បានដោះនៅក្រៅឃុំ។ យើងសង្ឃឹមថា អ្នកដែលគេហៅជាបន្តបន្ទាប់នេះ គ្រាន់តែជាចំហាយឥទ្ធិពលនៃនីតិវិធីទេ។ បន្តិចទៀតនឹងចប់សព្វគ្រប់ទាំងអស់គ្នា។ ខ្ញុំសង្ឃឹមបែបនេះ»។
លោក ហូរ វ៉ាន់ តំណាងរាស្ត្របក្សសង្គ្រោះជាតិមណ្ឌលភ្នំពេញ នៅមុខតុលាការសាលាឧទ្ធរណ៍ នៅព្រឹកថ្ងៃសុក្រទី ២២ សីហា ឆ្នាំ២០១៤។ RFA/Den Ayuthyea
សម្រាប់ លោក នី ចរិយា ប្រធានផ្នែកស៊ើបអង្កេត និងច្បាប់ នៃសមាគមអាដហុក (Adhoc) ចាត់ទុកសវនាការនៅសាលាឧទ្ធរណ៍លើសំណុំរឿងយុវជន ៣នាក់ ថាគ្រាន់តែជាការបន្តនីតិវិធីរបស់តុលាការ ឲ្យស្របតាមច្បាប់ប៉ុណ្ណោះ។ ព្រោះថា សំណុំរឿងនេះជារឿងនយោបាយ ហើយត្រូវមេដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ សម្របសម្រួលនយោបាយជាស្ថាពររួចហើយ៖ «អ្នកនយោបាយ ជាពិសេសថ្នាក់ដឹកនាំកំពូលៗមានឯកឧត្តម សម រង្ស៊ី និងសម្ដេច ហ៊ុន សែន បាននិយាយស្របគ្នាក្នុងការបញ្ចប់វិបត្តិនយោបាយ ជាពិសេសកុំឲ្យមានគំនុំគុំកួនទៅថ្ងៃក្រោយ។ ប៉ុន្តែ ដោយសារតែនីតិវិធីនេះវាបានដំណើរការនៅក្នុងតុលាការរួចហើយ អ៊ីចឹងតុលាការត្រូវតែបញ្ចប់វិបត្តិហ្នឹង។ អ៊ីចឹងគ្រាន់តែបញ្ចប់នូវបញ្ហានយោបាយដែលសេសសល់ ដែលវាកើតឡើងដោយសារការប្រើប្រាស់តុលាការ។ អ៊ីចឹងវាត្រូវតែប្រើប្រាស់តុលាការ ដើម្បីបញ្ចប់វិបត្តិនយោបាយហ្នឹងទៅវិញទេ។ គ្រាន់តែប៉ុណ្ណឹងទេ»។
មានលំនៅឋាននៅស្រុកស្ទោង ខេត្តកំពង់ធំ ស្ត្រីវ័យចាស់ឈ្មោះ ង៉ូវ ភឿង ត្រូវជាម្តាយយុវជន នាង សុឃុន មានប្រសាសន៍ថា ចាប់តាំងពីតុលាការចាប់កូនគាត់ដាក់ពន្ធនាគារ រូបគាត់មិនត្រូវគេអនុញ្ញាតឲ្យជួបមុខកូនទេ។ ទើបថ្ងៃសវនាការនេះ បានជួបមុខកូនប្រុសដ៏កម្សត់របស់គាត់។ អ្នកស្រីបន្តថា ទោះបីបច្ចុប្បន្ននេះគ្រួសារគាត់មានស្ថានភាពក្របែបណាក្តី ក៏ប៉ុន្តែអ្នកស្រីនឹងជំរុញឲ្យ នាង សុឃុន ឲ្យចូលរួមក្នុងសកម្មភាពនយោបាយ ឬការពារផលប្រយោជន៍ជាតិឲ្យបានខ្លាំងក្លាថែមទៀតនាថ្ងៃអនាគត ដោយមិនត្រូវចុះញ៉មជាដាច់ខាត៖ «បងប្អូនជួយមើលទៅកូនខ្ញុំ អត់មានខុសអីផង។ កូនខ្ញុំកំពុងតែសិក្សានៅសាលា ទៅហៅកូនខ្ញុំមកអត់មានរឿងអីសោះ។ សូមឲ្យបងប្អូនជួយពិចារណាផង»។
យុវជនគណបក្សសង្គ្រោះជាតិ ទាំង ៣នាក់ ត្រូវសមត្ថកិច្ចចាប់ខ្លួនកាលពីថ្ងៃទី២ ខែសីហា ឆ្នាំ២០១៤ ទាក់ទងនឹងសំណុំរឿងដឹកនាំធ្វើបាតុកម្មនៅក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា ហើយបង្កឲ្យមានអំពើហិង្សា។ យុវជនទាំង ៣រូប មានឈ្មោះ លោក ឃិន ជំរឿន ប្រធានចលនាយុវជន លោក សាន គឹមហេង ប្រធានចលនាយុវជនខណ្ឌទួលគោក និងលោក នាង សុឃុន ហិរញ្ញិកចលនាយុវជនខណ្ឌច្បារអំពៅ។
យុវជនទាំង ៣រូបនេះ ត្រូវបានតុលាការដំបូងចោទប្រកាន់ករណីពាក់ព័ន្ធពីបទចូលរួមធ្វើកុបកម្ម ប្រឆាំងនឹងអ្នករាជការសាធារណៈ និងហិង្សាដោយចេតនា និងផ្ដើមគំនិតក្នុងអំពើហិង្សាដោយចេតនាមានស្ថានទម្ងន់ទោស ដែលប្រព្រឹត្តទៅកាលពីថ្ងៃទី១៥ កក្កដា នៅក្បែរទីលានប្រជាធិបតេយ្យ៕
No comments:
Post a Comment