ស្ដាប់ ឬ ទាញយកសំឡេង
ទីតាំងចែកបាយកញ្ចប់ និងមី ដែលជាជំនួយរបស់អង្គការក្រៅរដ្ឋាភិបាល ត្រៀមចែកជូនពលករខ្មែរ នាក្រុងប៉ោយប៉ែត ខេត្តបន្ទាយមានជ័យ នៅថ្ងៃទី២១ ខែមិថុនា ឆ្នាំ២០១៤។
RFA/Soun Sophalmony
ប្រជាពលរដ្ឋ និងក្រុមអាជីវករភាគច្រើននៅក្រុងប៉ោយប៉ែត ផ្អាកការផ្ដល់ជំនួយមនុស្សធម៌ទៅឲ្យប្រជាពលរដ្ឋខ្មែររាប់ពាន់នាក់ ដែលអាជ្ញាធរថៃ ចាប់បញ្ជូនមកកម្ពុជា។ ការកាត់ផ្ដាច់ស្បៀងសប្បុរសធម៌នេះ គឺបណ្ដាលមកពីការជ្រៀតជ្រែកខាងផ្នែកនយោបាយ។
ការជ្រៀតជ្រែកខាងផ្នែកនយោបាយ បានបន្ទច់បង្អាក់ដល់លំហូរស្បៀងសប្បុរសធម៌ចំពោះជនអន្តោប្រវេសន៍ខ្មែររាប់ពាន់ ដែលអាជ្ញាធរកំពុងចាប់បញ្ជូនមកប្រទេសកម្ពុជា វិញ។ នៅព្រឹកថ្ងៃទី២១ ខែមិថុនា នេះ បាយកញ្ចប់ នំចំណីនានា ដែលគេដាក់ត្រៀមទុកនៅខាងមុខចំណុចរង្វង់មូលច្រកទ្វារអន្តរជាតិប៉ោយប៉ែត មានចំនួនថយចុះ។
ក្រុមអាជីវករ និងប្រជាពលរដ្ឋរស់នៅក្រុងប៉ោយប៉ែត បញ្ជាក់ថា ពួកគាត់ផ្អាកការផ្ដល់ស្បៀងសប្បុរសធម៌ទៅអោយពលករខ្មែរ ដោយសារតែសម្ពាធនយោបាយ។ កន្លងមកនេះ ក្រុមអាជ្ញាធរមូលដ្ឋានដែលដឹកនាំមន្ត្រីគណបក្សប្រជាជនកម្ពុជា បានរារាំងគំរាមកំហែង មិនឲ្យសប្បុរសជននានាធ្វើអំណោយដោយផ្ទាល់ដៃទៅដល់ពលករទេ ប៉ុន្តែបែរជាដាក់កំហិតឲ្យយកជំនួយទាំងនោះ ចូលតាមរយៈអាជ្ញាធរទៅវិញ៖ «គេចុះចែកផ្ទាល់អត់អោយគេចែក ឥឡូវបាត់ច្រើនចាប់ពីថ្ងៃទី១៩ ស្រែកដាក់មីក្រូដេញតំណាងរាស្ត្រចេញហ្នឹង គឺគេអត់ចិត្ត ហេតុអីបានពេលនេះហើយបែរជាយើងយកនយោបាយហ្នឹងនិយាយអីទៀត ខំតែជួយពលករឲ្យរួចផុតទៅ ជួយគ្នាទៅវិញទៅមក មិនអ្នកណាអ្នកណាម្នាក់មកស្រែកថា ឲ្យបោះឆ្នោតឲ្យអ្នកនេះអ្នកនោះឯណា»។
ចាប់ពីថ្ងៃទី១២ មិថុនា មក ក្រុមអាជ្ញាធរបានហាមឃាត់ដាច់ខាត មិនឲ្យសប្បុរសជននានាចូលទៅធ្វើទានដល់ពលករខ្មែរដោយផ្ទាល់ដៃនោះឡើយ ប៉ុន្តែពួកគេតម្រូវឲ្យផ្ដល់ស្បៀងទាំងនោះ ត្រូវធ្វើតាមរយៈក្រុមការងាររបស់អាជ្ញាធរមូលដ្ឋាន។ បញ្ហាកាន់តែធ្ងន់ធ្ងរថែមទៀតនោះ គឺដោយសារការបណ្ដេញសមាជិកព្រឹទ្ធសភា និងអ្នកតំណាងរាស្ត្រជាប់ឆ្នោតជាង ២០រូបរបស់គណបក្សសង្គ្រោះជាតិ មិនឲ្យចែកជំនួយសប្បុរសធម៌ដល់ពលករខ្មែរ កាលពីថ្ងៃទី១៩ ខែមិថុនា។
ជំទប់ទី២ នៃសង្កាត់ផ្សារកណ្ដាល មកពីគណបក្សប្រឆាំង លោកស្រី ឃុន ចាន់ទី ថ្លែងថា ចាប់ពីថ្ងៃទី៦ ខែមិថុនា ប្រជាពលរដ្ឋ និងក្រុមអាជីវករនៅក្រុងប៉ោយប៉ែត បានធ្វើសកម្មភាពមនុស្សធម៌យ៉ាងសស្រាក់សស្រាំ ចំពោះពលករខ្មែរដែលអាជ្ញាធរថៃ ចាប់បញ្ជូនមកកម្ពុជា វិញ។ ប៉ុន្តែ ចាប់ពីថ្ងៃទី១២ ខែមិថុនា ក្រុមអាជ្ញាធរមូលដ្ឋាន បានបង្អាក់ដល់ការធ្វើទានរបស់ពួកគាត់ ដោយសារតែការកេងចំណេញរឿងនយោបាយ៖ «ប្រជាពលរដ្ឋនៅផ្សារថៃ គាត់ឈឺឆ្អាល និងប្រជាពលរដ្ឋដែលគាត់ធ្លាប់ក្រីក្រអ៊ីចឹង គាត់ឃើញភាពក្រីក្ររបស់ប្រជាពលរដ្ឋខ្លួនចំណាកស្រុកពីប្រទេសថៃ ចូលប្រទេសខ្លួនឯងអត់បាយអត់ទឹក អ៊ីចឹងគាត់ដាំបាយដុតដៃដុតជើង គាត់ធ្វើតាំងពីអាជ្ញាធរមិនទាន់ធ្វើ គាត់រើសអើងហ្នឹង ហើយបានជាអាជីវករទាំងអស់គាត់ថាគាត់ជួយប្រជាពលរដ្ឋ តែគេកេងចំណេញនយោបាយរបស់អ្នកកាន់អំណាចជួយទៅ រវល់តែឈ្លោះគ្នាឯង កេងចំណេញរឿងគណបក្សនយោបាយ»។
រយៈពេលកន្លងទៅនេះ ក្រុមអាជ្ញាធរក៏បានបណ្ដេញមនុស្សមួយក្រុម ដែលបានព្យាយាមយកបាយ និងទឹកទៅចែកជូនពលករខ្មែរនៅក្នុងបរិវេណរង្វង់មូលខាងមុខច្រកទ្វារអន្តរជាតិប៉ោយប៉ែត។ ប្រជាពលរដ្ឋរស់នៅក្រុងប៉ោយប៉ែត ថ្លែងថា សប្បុរសជនមួយក្រុមនោះ គឺជាខ្មែរកម្ពុជាក្រោម៖ «ក្រុមយុវជនហ្នឹងគាត់ថា គាត់ជាខ្មែរអត់មានប្រកាន់និន្នាការនយោបាយខាងណាទេ គាត់មានជួយឃោសនាឲ្យគណបក្សណាទេ គឺគាត់មកចែកក្នុងនាមជាខ្មែរដូចគ្នា ប៉ុន្តែអាជ្ញាធររករឿង ហើយបង្កើតជាក្រុមកាន់មីក្រូអីមករំខាន មិនឲ្យចូលចែក»។
ទោះជាយ៉ាងនេះក្តី នៅខាងមុខរង្វង់មូលច្រកទ្វារអន្តរជាតិប៉ោយប៉ែត គេសង្កេតឃើញក្រុមអង្គការមនុស្សធម៌មួយចំនួន នៅតែបន្តការផ្ដល់ស្បៀងទៅដល់ពលករខ្មែរដែលគេចាប់បញ្ជូនមកពីប្រទេសថៃ។
មន្ត្រីសម្របសម្រួលសមាគមអាដហុក (adhoc) ប្រចាំខេត្តបន្ទាយមានជ័យ ថ្លែងថា បាតុភាពនានាដែលបានកើតឡើងនៅខាងមុខច្រកទ្វារអន្តរជាតិប៉ោយប៉ែត បានប៉ះពាល់ដល់សិទ្ធិសេរីភាពនៃការបញ្ចេញមតិ និងសិទ្ធិធ្វើនយោបាយ។ បញ្ហាទាំងនេះកើតឡើងមកពីការរើសអើងនិន្នាការនយោបាយ និងការកេងចំណេញនយោបាយ៖ «គណបក្សប្រឆាំងក្ដី គណបក្សកាន់អំណាចក្ដី សុទ្ធតែប្រជាពលរដ្ឋខ្មែរដូចគ្នា មិនគួរណាមានការរើសអើងទេ។ ប្រទេសថៃ បណ្ដេញខ្មែរមកហើយ បែរទៅជាខ្មែរយើងនៅក្នុងស្រុកនេះមិនត្រូវគ្នា ហើយបែរជារើសអើងនយោបាយទៀត ការបែកបាក់ពីមុនរហូតដល់ពេលនេះ តើវេទនាប៉ុណ្ណា? ខ្មែរយើងគួរតែគិតគូរពីអ្វីដែលជាផលប្រយោជន៍ជាតិជាធំ កុំឲ្យគេមើលឃើញថា ក្នុងរបបនៃសង្គមមួយជាប់នូវប្រវត្តិសាស្ត្រដែលបានប្រព្រឹត្តនូវអ្វីដែលអាក្រក់ ហើយដែលកូនខ្មែរជំនាន់ក្រោយស្អប់ខ្ពើម»។
វិទ្យុអាស៊ីសេរី មិនអាចទាក់ទង លោក ង៉ោ ម៉េងជ្រួញ ជាអភិបាលក្រុងប៉ោយប៉ែត ដើម្បីបញ្ជាក់ជុំវិញបញ្ហានេះបានទេ នៅថ្ងៃសៅរ៍ ទី២១ មិថុនា ប៉ុន្តែកាលពីថ្ងៃទី១៩ មិថុនា កន្លងទៅ អភិបាលខេត្តបន្ទាយមានជ័យ លោក គោ ស៊ុំសារឿត ថ្លែងថា ក្រុមអាជ្ញាធរចម្រុះគ្រប់ស្ថាប័ន បានមមាញឹកក្នុងការជួយដល់ប្រជាពលរដ្ឋខ្មែរ ដោយពុំបានគិតពីរឿងកេងចំណេញក្នុងរឿងនយោបាយនោះឡើយ៖ «ដឹងស្រាប់ហើយពលករត្រឡប់មកវិញនេះរាប់ម៉ឺននាក់ កាលពីថ្ងៃ១៨ និង១៩ សុទ្ធ ៤ម៉ឺននាក់ជាង។ យើងចង់ឲ្យកន្លែងហ្នឹងជាកន្លែងមួយដែលមានសុវត្ថិភាពសណ្ដាប់ធ្នាប់ហើយ យើងឃើញហើយបងប្អូនដែលត្រឡប់មក គាត់ភ័យខ្លាច ហើយបើមកដល់កន្លែងយើង គាត់មិនកាន់តែភិតភ័យណាស់ទៅហើយ។ ខ្ញុំយល់ថា ជាការត្រឹមត្រូវហើយ ព្រោះជាសាច់ឈាមរបស់យើង ជួយដោយសុចចិត្ត កុំជួយក្នុងរឿងនយោបាយ»។
លោកបន្តថា ក្រុមអាជ្ញាធរបានខិតខំក្នុងការរៀបចំសណ្ដាប់ធ្នាប់ ជួយសម្រួលដល់ការវិលត្រឡប់របស់ពលករខ្មែរពីប្រទេសថៃ ដោយពុំគិតពីរឿងនយោបាយនោះទេ។ ក្រុមអាជ្ញាធរពុំបានហាមឃាត់ចំពោះការផ្តល់ជំនួយសប្បុរសធម៌របស់ប្រជាពលរដ្ឋនោះឡើយ ប៉ុន្តែដើម្បីចៀសវាងការកកស្ទះចរាចរណ៍ និងបញ្ហាផ្សេងៗ ទើបអាជ្ញាធរសុំឲ្យសប្បុរសជនទាំងនោះ ផ្តល់ស្បៀងសប្បុរសធម៌ទាំងនោះតាមរយៈក្រុមការងាររបស់អាជ្ញាធរមូលដ្ឋាន៕
No comments:
Post a Comment