ឈុតមួយនៅក្នុងរឿងស្បែកគង់ ដែលបង្ហាញពីសិស្សទាំង៨នាក់មកសុំរៀនមន្តអាគមជាមួយគ្រូខ្លាំងម្នាក់។ រូបថត សហការី
ភ្នំពេញៈ ជាមួយនឹងការបង្ហាញវីដេអូខ្លីៗ (Trailer) ធ្វើឲ្យរញ្ជួយអស់ពិភពភាពយន្តនៅកម្ពុជា ពិសេសប្រជាជនកម្ពុជានោះ គេអាចនិយាយបានថា ភាពយន្តខ្នាតធំរឿង «ស្បែកគង់» គឺជាភាពយន្តខ្នាតធំទី ១ របស់កម្ពុជា ដែលបានចំណាយប្រាក់លើការវិនិយោគរហូតដល់ទៅ៦៨ម៉ឺនដុល្លារសហរដ្ឋអាមេរិក។
នាពេលបច្ចុប្បន្ននេះ ថ្វីដ្បិតថា វិស័យភាពយន្តទាំងរឿងខ្នាតធំ និងរឿងភាគបានរីកដុះដាលព្រោងព្រាតក៏ពិតមែន តែមិនទាន់មានភាពយន្តណាមួយហ៊ានចំណាយទៅលើការវិនិយោគរាប់សិបម៉ឺនដុល្លារនៅឡើយ ទើបតែនៅពេលនេះ ផលិតកម្មអង្គរភីកឈ័រ បានសម្រិតសម្រាំងយ៉ាងពិសេសទាំងអ្នកជំនាញភាពយន្ត ឧបករណ៍បច្ចេកទេស និងតារាសម្តែង ថតភាពយន្តខ្នាតធំមួយដែលមានចំណងជើងថា «ស្បែកគង់» ដើម្បីប្រកួតប្រជែងទីផ្សារភាពយន្តនៅអាស៊ី។
(ពីឆ្វេងទៅស្តាំ)តារាសម្តែង ញ៉ែម សុគន្ធ អ៊ុន សិទ្ធា និង វី ជីវ័ន នៅក្នុងការសម្តែង រឿង ស្បែកគង់។ រូបថត សហការី
«ស្បែកគង់» គឺចង់លើកឡើងពីសម័យក្រោយរបប ប៉ុល ពត មានបុរសមានមន្តអាគមខ្លាំងពូកែអស្ចារ្យម្នាក់រស់នៅលើភ្នំគូលែន បានទទួលសិស្សចំនួន៨នាក់ ដើម្បីរៀនមន្តអាគមបន្ត តែដោយសារមិនអាចអត់ទ្រាំនឹងការហាត់រៀនដោយការកប់ក្នុងដីរយៈពេល ៤៩ ថ្ងៃ ដោយគ្មានអាហារក្រោមកម្ដៅថ្ងៃ ភ្ញៀង ខ្យល់ និងមានសត្វសាហាវ បានចុងក្រោយមានតែសិស្សពីរនាក់ប៉ុណ្ណោះរៀនបានសម្រេចវិជ្ជាស្បែកគង់ រីឯ៦នាក់ទៀតបានស្លាប់ ។ តែសិស្សទាំងពីរនាក់នោះបានក្លាយជាសត្រូវស៊ីសាច់ហុតឈាមគ្នា ដោយសារតែដណ្តើមកូនស្រីដ៏ស្រស់ស្អាតម្នាក់របស់លោកគ្រូសិល្ប៍ ក្រោយពេលគ្រូស្លាប់។ ចុងក្រោយពួកគេបានកាប់សម្លាប់គ្នា ហើយក៏កើតមកជាតិថ្មី។
តាមរយៈវីដេអូខ្លីៗ គេបានដឹងថា ភាពយន្តខ្នាតធំរឿង «ស្បែកគង់» ត្រូវបានផលិតឡើងដោយរួមបញ្ចូលការថតពិតៗ និងបច្ចេកវិទ្យាកុំព្យូទ័រ ហើយក្នុងនោះតួសម្តែងម្នាក់ៗស្ទើរតែភ័យលេចនោមដោយសារតែត្រូវថតឈុតឆាកពិតៗជាមួយសត្វតោ ពស់វែក ការបាញ់គ្រាប់បេ៤០ ការហក់លោត និងការវាយតប់ កាប់ចាក់ដោយផ្ទាល់។
លោក ប៉ុល វិបូ ហៅ នីត ប្រធានអគ្គនាយកផលិតកម្មអង្គរភីកឈ័រ (Angkor Picture Inc)បានឲ្យដឹងថា ភាពយន្តខ្នាតធំរឿង «ស្បែកគង់» ត្រូវបានផលិតឡើងយ៉ាងពិសេសមានរយៈពេល១ម៉ោង៤៥នាទី និងមានទំហំ ៤,៥ K (រឿងខ្នាតធំកន្លងមកទំហំ ២K) ។ ភាពយន្តនេះត្រូវបានថតរយៈពេល១ឆ្នាំពេញនៅលើទឹកដីភ្នំគូលែន ខេត្តសៀមរាប ខេត្តកំពង់ចាម និងរាជធានីភ្នំពេញ។
លោក វិបូ ហៅ នីត បានមានប្រសាសន៍ថា៖«ក្នុងរឿងនេះ យើងបានចំណាយប្រាក់រហូតដល់ទៅ ៦៨ម៉ឺនដុល្លារ។ មានគេសួរថា ហេតុអ្វីអស់ប្រាក់ច្រើនម្ល៉េះ? នោះគឺ...រឿងនេះ យើងថតផ្ចិតផ្ចង់មែនទែន យើងត្រូវទិញឧបករណ៍ថ្លៃៗមកពីអាមេរិក ហើយយើងត្រូវថតរយៈដល់ទៅមួយឆ្នាំ។ យើងថត៤-៥ថ្ងៃយកមកកាត់បានតែ១នាទីទេ។ យើងមានក្រុមការងារជំនាញៗច្រើន និងតារាសម្តែងសុទ្ធតែល្បីៗដូចជា លោក អ៊ុន សិទ្ធា លោក ញ៉ែម សុគន្ធ ឌុច លីដា និងតារាសម្តែង កំប្លែងជាច្រើនទៀត»។
លោកបានបញ្ជាក់ថា៖ «សម្រាប់ការថតភាពយន្តនេះ ជាការវិនិយោគរបស់កូនខ្មែរសុទ្ធសាធ រីឯក្រុមការងារទាំង៦០នាក់ ក៏សុទ្ធតែជាខ្មែរដែរ»។
ការសម្តែងក្នុងឈុតមួយដែលតម្រូវឲ្យតួសម្តែងលេងជាមួយពស់វែក។ រូបថត សហការី
ការបោះទុនវិនិយោគយ៉ាងច្រើនសន្ធឹកនេះ ត្រូវបានគេគិតថាអាចប្រឈមនឹងហានិភ័យយ៉ាងខ្លាំង ដោយសារតែទីផ្សារកម្ពុជាតូច និងមិនទាន់គោរពច្បាប់កម្មសិទ្ធិបញ្ញា ដែលធ្វើឲ្យផលិតករប្រឈមនឹងការបង់ខាតក្នុងកម្រិតមួយខ្ពស់ តែយ៉ាងណាលោក ប៉ុល វិបូ នៅតែនិយាយដោយភាពក្លាហានថា ភាពយន្តខ្នាតធំដំបូងបំផុតនេះនឹងជោគជ័យ។
លោក វិបូ បានបញ្ជាក់ថា៖«ខ្ញុំសង្កេតឃើញថា ភាពយន្តខ្នាតធំ និងភាគរបស់ខ្មែរនៅពេលនេះមានសន្ទុះ និងការគាំទ្រយ៉ាងខ្លាំង ហើយរោងកុនខ្នាតអន្តរជាតិ ក៏មានច្រើនដែរ តែយ៉ាងណាបើយើងពឹងតែលើទីផ្សារកម្ពុជា គឺមិនអាចទៅរួចទេ ខ្ញុំបានវាយតម្លៃរួចហើយថា ខ្លាំងបំផុតនៅកម្ពុជា យើងអាចរកចំណូលបាន២០ម៉ឺនដុល្លារ ចុះ៤០ ទៅ៥០ម៉ឺនទៀត? នោះគឺយើងពឹងលើទីផ្សារក្រៅប្រទេស ពិសេសប្រទេសនៅក្នុងតំបន់អាស៊ីអាគ្នេយ៍ និងសហគមន៍ខ្មែរនៅបរទេស ដូចជា នៅអូស្ត្រាលី អាមេរិក បារាំងជាដើម»។
លោកបញ្ជាក់បន្ថែមថា៖ «សព្វថ្ងៃយើងមានភ្នាក់ងារទំនាក់ទំនងទីផ្សារបរទេសរួចហើយ អ៊ីចឹងទីផ្សារក្រៅប្រទេសយើងអត់បារម្ភទេ។ ដូច្នេះនេះក៏ជាសារមួយដែរថា កុំឲ្យផលិតករយើងបារម្ភ ប្រសិនបើយើងផលិតរឿងមានគុណភាពនោះ។ ខ្ញុំគិតថា ស្បែកគង់ គឺជាគំរូល្អមួយ ដែលអាចឲ្យភាពយន្តខ្មែរយើងប្រជែងបានទីផ្សារដូចកាលពីជំនាន់មុន ដែលភាពយន្តយើង ប្រទេសចិន និងប្រទេសដទៃទៀតគាំទ្រយ៉ាងខ្លាំង»។
បើគ្មានការប្រែប្រួលទេ រឿង «ស្បែកគង់» នេះនឹងត្រូវដាក់បញ្ចាំងនៅលើទីផ្សារបរទេស និងកម្ពុជានៅក្នុងអំឡុងខែសីហា ឆ្នាំ២០១៤ ខាងមុខនេះ។
ឈុតមួយដែលបង្ហាញពីបច្ចេកទេសថតការផ្ទុះគ្រាប់បែក ដូចជាការពិត។ រូបថត សហការី
លោក ជី សិលា អ្នកជំនួញវ័យក្មេងលើវិស័យរោងកុនខ្នាតអន្តរជាតិនៅកម្ពុជា បានឲ្យដឹងថា តាមរយៈសាច់រឿងដែលលោកបានមើលក្នុងវីដេអូខ្លីៗ លោកគិតថា រឿងស្បែកគង់ នោះថតបានល្អទាំងសាច់រឿង និងបច្ចេកទេស តែយ៉ាងណាលោកបានបញ្ជាក់ថា ទីផ្សារនៅកម្ពុជានៅតែតូចចង្អៀតនៅឡើយ។
លោកមានប្រសាសន៍ថា៖«ថ្វីដ្បិតតែខ្ញុំមិនទាន់បានមើលសាច់រឿងទាំងមូល តែក្នុង Trailer ខ្ញុំឃើញថា រឿងនោះថតបានល្អមែន តែបើយើងប្រើទុនច្រើន ទីផ្សារនៅកម្ពុជាយើងមានអ្នកចូលទស្សនាតិចតួចនៅឡើយ អត់ចំណេញទេ តែបើយើងពឹងលើទីផ្សារបរទេស ប្រហែលជាប្រសើរជាងនេះ»។
ជាមួយនឹងការបោះទុនវិនិយោគដ៏សម្បើមនោះ ក្រសួងវប្បធម៌ និងវិចិត្រសិល្បៈបានស្វាគមន៍យ៉ាងកក់ក្តៅ។
លោក ស៊ិន ច័ន្ទសាយ៉ា ប្រធាននាយកដ្ឋានភាពយន្តមានប្រសាសន៍ថា៖«ថ្វីដ្បិតថា ខ្ញុំមិនទាន់ហ៊ានវាយតម្លៃយ៉ាងណាទេពេលនេះ តែខ្ញុំសូមអបអរ និងលើកទឹកចិត្តចំពោះផលិតករដែលបានបោះទុនវិនិយោគរឿងខ្នាតធំដ៏សម្បើមនេះ»៕
No comments:
Post a Comment