ពលរដ្ឋ ២នាក់ដែលត្រូវកម្លាំងប្រដាប់អាវុធចាប់បានក្នុងយុទ្ធនាការការបង្ក្រាបពលរដ្ឋដែលមានជម្លោះដីនៅឃុំកំពង់ដំរី ស្រុកឆ្លូង ខេត្តក្រចេះ កាលពីថ្ងៃទី១៦ ខែឧសភា ឆ្នាំ២០១២។
Provided photo
លោក ប៊ុន រដ្ឋា ដែលត្រូវបានតុលាការកាត់ទោសអោយជាប់ពន្ធនាគារចំនួន ៣០ឆ្នាំ ពីបទប៉ុនប៉ងបង្កើតតំបន់អបគមន៍នៅខេត្តក្រចេះ ឥឡូវបានមកដល់ប្រទេសហូល្លង់ដ៍ ហើយ។
ថ្លែងប្រាប់វិទ្យុអាស៊ីសេរី កាលពីយប់ថ្ងៃទី១៣ ខែមិថុនា ឆ្នាំ២០១៤ លោក ប៊ុន រដ្ឋា អោយដឹងថា លោកបានមកដល់ប្រទេសហូល្លង់ដ៍ កាលពីថ្ងៃទី១២ ខែឧសភា ឆ្នាំ២០១៤។ បើទោះជាពេលនេះមានសុវត្ថិភាពពេញលេញហើយក្តី លោក ប៊ុន រដ្ឋា អោយដឹងថា លោកមានក្តីនឹករលឹកដល់មាតុភូមិកម្ពុជា ខ្លាំងណាស់៖ «បើអោយប្រៀបធៀបការចូលចិត្ត ខ្ញុំចូលចិត្តស្រុកខ្មែរច្រើនជាង។ ខ្ញុំនៅនឹកស្រុកយើងច្រើនជាង»។
តុលាការក្រុងភ្នំពេញ កាលពីឆ្នាំ២០១២ បានកាត់ទោស លោក ប៊ុន រដ្ឋា កំបាំងមុខអោយជាប់ពន្ធនាគារ ៣០ឆ្នាំ ពីបទដឹកនាំបង្កើតចលនាប្រដាប់អាវុធ បះបោរប្រឆាំងរដ្ឋាភិបាល និងបំបែករដ្ឋនៅខេត្តក្រចេះ។ ប៉ុន្តែ លោក ប៊ុន រដ្ឋា តែងបដិសេធចំពោះការចោទប្រកាន់ទាំងនោះ ហើយថា សកម្មភាពរបស់លោកនាពេលនោះ គឺគ្រាន់តែដឹកនាំប្រជាជនដែលរងគ្រោះពីបញ្ហាដីធ្លី តវ៉ា និងយកដីរបស់ខ្លួនពីក្រុមហ៊ុនសម្បទានមកវិញតែប៉ុណ្ណោះ។
លោក ប៊ុន រដ្ឋា ត្រូវបានប្រទេសហូល្លង់ដ៍ ផ្តល់សិទ្ធិជ្រកកោនផ្នែកនយោបាយ បន្ទាប់ពីបានភៀសខ្លួនមកកាន់ប្រទេសថៃ កាលពីឆ្នាំ២០១២ បន្ទាប់អាជ្ញាធរកម្ពុជា ប្រកាសតាមចាប់ខ្លួន។ ក្រៅពីនឹករលឹកដល់ស្រុកកំណើត លោកថា លោកក៏មានគម្រោងជួយដល់ពលរដ្ឋខ្មែរដែលរងគ្រោះពីបញ្ហាដីធ្លីបន្តទៀតដែរ៕
No comments:
Post a Comment