ដោយ៖ ម៉ៅ ចិរិយា | ថ្ងៃអង្គារ ទី25 ខែមិនា ឆ្នាំ2014 | VOD
ស្តាប់សំឡេង៖ | ចម្លងទុក |
លោក សម រង្ស៊ី ប្រធានគណបក្សសង្គ្រោះជាតិ នាពេលកន្លងមក (រូបថត៖ តាត ឧត្តម)
មេដឹកនាំបក្សជំទាស់ នៅថ្ងៃអង្គារនេះ គំរាមម្តងទៀតថា មហាបាតុកម្មនឹងផ្ទុះឡើងម្តងទៀត ក្នុងរាជធានីភ្នំពេញ នាពេលឆាប់ៗនេះ បើរដ្ឋាភិបាលនៅតែបន្ត រំលោភសិទ្ធិមនុស្ស និងសិទ្ធិម្ចាស់ឆ្នោត។
តាមវីដេអូឃ្លីបដែលបង្ហោះតាមបណ្តាញសង្គមហ្វេសប៊ុកលោក សម រង្ស៊ី នៅថ្ងៃទី២៥ ខែមីនានេះ ឲ្យដឹងថា ប្រធានគណបក្សសង្គ្រោះជាតិ លោក សម រង្ស៊ី ថ្លែងប្រាប់អ្នកគាំទ្រថា សមគមន៍អន្តរជាតិ និងប្រទេសជាមិត្តបានថ្កោលទោស ទៅនឹងវិធានការបង្ក្រាបរបស់រដ្ឋាភិបាល លើសេរីភាពបញ្ចេញមតិ ដែលបណ្តាលឲ្យមានមនុស្សស្លាប់ នឹងរងរបួស ព្រមទាំងសកម្មជនសិទ្ធិមនុស្សខ្លះត្រូវចាប់ខ្លួន។
ការបង្ក្រាបដោយហិង្សានៅថ្ងៃទី៣ ខែមករា ឆ្នាំ២០១៤នោះ កម្មករយ៉ាងតិច៥នាក់ ត្រូវគេបាញ់សម្លាប់ ប្រមាណ ៤០នាក់រងរបួស និង២៣នាក់ត្រូវបានចាប់ខ្លួន និងធ្វើទារុណកម្ម។
លោក សម រង្ស៊ី បន្តថា ករណីនេះ សហគមន៍អន្តរជាតិ និងជំរុញឲ្យមាន ការផ្លាស់ប្តូរតាមរយៈនៃការបោះឆ្នោត។ ម្យ៉ាងវិញទៀតលោកថាបាតុកម្មទ្រង់ទ្រាយធំ នឹងផ្ទុះឡើងថ្មីទៀតបើបញ្ហារំលោភសិទ្ធិមនុស្សនេះ មិនត្រូវដោះស្រាយ «ចាំមើលតែស្អែក ខានស្អែក មានព័ត៌មានល្អហើយបងប្អូន ព័ត៌មាននោះ គឺយើងធ្វើតាមឆន្ទៈរបស់ប្រជារាស្ត្រ បើប្រជារាស្ត្រចង់ធ្វើបាតុកម្ម ធ្វើទៀត ហើយធ្វើកាន់តែធំឡើងៗ»។
អ្នកនាំពាក្យទីស្តីការគណៈរដ្ឋមន្ត្រីលោក ផៃ ស៊ីផាន ហាក់មិនចាប់អារម្មណ៍នឹងការព្រមានរបស់មេបក្សប្រឆាំងទេ ដោយលោកអះអាងថា វាជាវោហាសាសន៍គ្មានប្រសិទ្ធភាព «ពាក្យរបស់ឯកឧត្តម សម រង្ស៊ី គ្រាន់តែជាពាក្យ ធ្វើយុទ្ធនាការឃោសនាទេ ក៏ប៉ុន្តែសកម្មភាព រាជរដ្ឋាភិបាលកម្ពុជា ជាមួយរដ្ឋាភិបាល អូស្ត្រាលី បានបង្ហាញជាក់ស្តែងថា រដ្ឋាភិបាលទាំងពីរកំពុងសហការ និងមានទំនាក់ទំនងល្អជាមួយគ្នា»។
អ្នកវិភាគនយោបាយ លោកបណ្ឌិត សុខ ទូច ពន្យល់ថា បើអ្នកនាយោបាយ នៅតែបន្តខ្វែងគំនិតគ្នា មិនព្យាយាមដោះស្រាយរាល់បញ្ហា ដែលកើតឡើងក្នុងសង្គមទេ លោកបារម្ភថា ការរើបម្រះអាច នឹងកើតមាននៅថ្ងៃណាមួយដែលអ្នកនយោបាយមិនអាចស្មានដល់ «ខ្ញុំគ្រាន់ផ្តល់គំនិតទេ នឹងមានបញ្ហានៅពេលខាងមុខ ឥឡូវហ្នឹងគណបក្សសង្គ្រោះជាតិ អត់អាចធ្វើបាតុកម្មបានទេ ព្រោះឡើងតែមួយឡានពីរឡានមក បំបែកបាត់ហើយ ប៉ុន្តែខ្ញុំបារម្ភ នៅពេលថ្ងៃបុណ្យចូលឆ្នាំ អ្នកទីក្រុងភ្នំពេញ ចេញពីភ្នំពេញហើយដល់ពេលចូលមកវិញចូលគ្រប់ចម្រុះទាំងអស់ ទាំងអ្នករោងចក្រ ក្រែងលរពេលហ្នឹងវាបាតុកម្មទៅ ហើយបាតុកម្មពេលហ្នឹងហើយមានការបង្ហូរឈាម ខ្ញុំគ្រាន់តែជម្រាបជូន»។
ការព្រមានរបស់ប្រធានគណបក្សសង្គ្រោះជាតិលោក សម រង្ស៊ី នៅពេលនេះ ធ្វើឡើងបន្ទាប់ពីលោក បានវិលត្រឡប់មកពីទស្សនកិច្ចនៅបរទេស រយៈពេលជិតពីរសប្តាហ៍ នូវអ្វីដែលអ្នកតាមដានព្រឹត្តិការណ៍សង្គម យល់ថាជាដំណើរទស្សនកិច្ច ដើម្បីរកការគាំទ្រពីសហគមន៍អន្តរជាតិជុំវិញស្ថានការនយោបាយ ដែលកំពុងជាប់គាំងក្រោយការបោះឆ្នោត៕
សូមសរសេរមកកាន់កញ្ញា ម៉ៅ ចិរិយា តាមរយៈ chakriyamaov168@gmail.com
No comments:
Post a Comment