 |
| ជនជាតិនៅក្រុងសែនមនោរម្យបង្ហាញដីព្រៃត្រូវក្រុមហ៊ុនឈូស ដុត។ រូបថត អាដហុក |
ភ្នំពេញៈ ជនជាតិដើមភាគតិចចំនួន ១៧ សហគមន៍ ក្នុងខេត្ត រតនគិរី បានដាក់ពាក្យបណ្តឹងទៅធនាគារពិភពលោក WB កាលពីម្សិលមិញ ដើម្បីសុំរកដំណោះស្រាយ និងធ្វើការពិចារណាលើការផ្តល់ប្រាក់កម្ចីរបស់ស្ថាប័នអន្តរជាតិមួយនេះ ទៅឲ្យក្រុមហ៊ុនដីសម្បទានសេដ្ឋកិច្ច វៀតណាម ដែលបានកាប់បំផ្លាញព្រៃឈើយ៉ាងធ្ងន់ធ្ងរធ្វើឲ្យពួកគាត់បាត់បង់មុខរបរចិញ្ចឹមជីវិត។
បន្ទាប់ពីដាក់ពាក្យបណ្តឹងទៅសាជីវកម្មហិរញ្ញវត្ថុអន្តរជាតិ (IFC) របស់ធនាគារពិភពលោក តាមសារអេឡិចត្រូនិក តំណាងសហគមន៍ជនជាតិដើមភាគតិចជាង ១០ នាក់បានធ្វើសន្និសីទ ព័ត៌មានមួយនៅក្នុងរាជធានីភ្នំពេញដោយមានការចូលរួមគាំទ្រពីអង្គការក្រៅរដ្ឋាភិបាលចំនួន ៥។
លោក សូ សុផាត អាយុ ៥២ឆ្នាំ បានថ្លែងនៅក្នុងសន្និសីទកាសែតថា ជនជាតិភាគតិច រស់នៅដោយពឹងផ្អែកទៅលើទឹកដី និងព្រៃឈើ តាមរយៈការធ្វើចម្ការ និងប្រមូលអនុផលព្រៃឈើតាំងពីដូនតាមក។ ប៉ុន្តែចាប់តាំងពីឆ្នាំ ២០១០ មក ក្រុមហ៊ុន ហេង ប្រាដឺ ដែលជាក្រុមហ៊ុនមួយតូចរបស់ក្រុមហ៊ុនមេ ឈ្មោះ ហ័ងអាញ់ ហ្គាឡាយ (Hoang Anh Gia Lai) របស់ វៀតណាម បានធ្វើការឈូសឆាយដីព្រៃសហគមន៍ ចម្ការវិលជុំនិងដីស្រែរបស់ជនជាតិភាគតិចជាបន្តបន្ទាប់។
លោកបញ្ជាក់ថា៖ «យើងអស់ដីព្រៃ ៨០ ភាគរយហើយ សូមម្ចាស់លុយ (ធនាគារពិភពលោក) ពិចារណាពីរឿងផ្តល់លុយផង ព្រោះលុយទាំងអស់នេះ គឺគេយកមកប្រើសម្រាប់បំផ្លាញព្រៃឈើ និងមុខរបរ ប្រពៃណីរបស់ជនជាតិភាគតិចយើង»។
តំណាងសហគមន៍ឈ្មោះ សល់ ហ្នើយ អាយុ ៥៩ឆ្នាំ បានថ្លែងថា ក្រៅពីដីព្រៃបម្រុងទុក ក្រុមហ៊ុន វៀតណាម បានឈូសឆាយដំណាំពួកគាត់ និងចម្ការវិលជុំដោយមានការជួយការពារពីកម្លាំងប្រដាប់អាវុធ។
លោក សល់ ហ្នើយ បន្តថា៖ «ឈូសអស់ហើយ គេបង្ខំឲ្យយើងខ្ញុំលក់ដីឲ្យគេទៀត។ អាដីចុះបញ្ជីនិងនិស្សិតវាស់ហើយក៏ឈូសទៀត ហើយគេថាសង្គមប្រែប្រួល។ យើងកាប់ឈើតិចតួចធ្វើផ្ទះគេចាប់ គេថាខុសច្បាប់ តែក្រុមហ៊ុនកាប់បំផ្លាញព្រៃថាល្អទៅវិញ»។ លោកអះអាងថាពេលអ្នកភូមិធ្វើការតវ៉ា និងឃាត់មិនឲ្យក្រុមហ៊ុនឈូសបំផ្លាញព្រៃ ត្រូវបានគេប្តឹងនិងចាប់ខ្លួនទៅវិញ។
សេចក្តីថ្លែងការណ៍រួមរបស់អង្គការចំនួនប្រាំ ដែលបានជួយជនជាតិភាគតិចឲ្យដាក់ពាក្យបណ្តឹង បានឲ្យដឹងថា ព្រៃឈើក្នុងខេត្ត រតនគិរី បានធ្លាក់ចុះយ៉ាងគំហុក ដោយសារតែការផ្តល់សម្បទានសេដ្ឋកិច្ចសម្រាប់ដំណាំកៅស៊ូ។ ក្រុមហ៊ុន វៀតណាម ហ័ងអាញ់ ហ្គាឡាយ ជាក្រុមហ៊ុនមួយក្នុងចំណោមក្រុមហ៊ុនជាច្រើនដែលទទួលបានដីសម្បទាន។ ក្រុមហ៊ុនមេមួយនេះមានក្រុមហ៊ុនតូចជាច្រើនដែលគ្រប់គ្រងផ្ទៃដីរហូតដល់ទៅ ៥ ភាគរយនៃផ្ទៃដីសរុបក្នុងខេត្ត រតនគិរី។
លោក អៀង វុទ្ធី នាយកប្រតិបត្តិរបស់អង្គការសមធម៌កម្ពុជា បានថ្លែងថា នៅកម្ពុជាផ្ទៃដីដែលអាចធ្វើកសិកម្មបានមានតែ ៣ លានហិកតាទេ ប៉ុន្តែផ្ទៃដី ២ លានហិកតា បានផ្តល់ទៅក្រុមហ៊ុនឯកជន។ លោកបន្តថា៖ «ខេត្ត រតនគិរី ក្លាយទៅជាខេត្តមួយដែលមិនសម្បូរព្រៃទៀតទេ ហើយយើងសុំឲ្យមានដំណោះស្រាយផ្តល់ដីឲ្យជនជាតិដើមវិញ»។
លោក ដេវិដ ប្រ៊ែត ប្រធានអង្គការ អាយឌីអាយ ជាអង្គការមួយក្នុងចំណោមអង្គការទាំង ប្រាំ បានថ្លែងថា តម្រូវការកៅស៊ូកាន់តែកើនឡើង បានធ្វើឲ្យមានការដាំកៅស៊ូកើនឡើងនៅ កម្ពុជា។ លោកបញ្ជាក់ថា៖ «គេសម្រុកដំាកៅស៊ូនៅ កម្ពុជា និង ឡាវ។ ដីសម្បទាន ៨០ ភាគរយនៅ កម្ពុជា គឺដាំកៅស៊ូហើយដីទាំងនោះជាន់លើដីជនជាតិដើមនិងដែនជម្រកសត្វ»។ បើតាមលោក ដេវិដ IFC នឹងឆ្លើយតបមកសហគមន៍វិញនៅក្នុងរយៈពេល ១៥ ថ្ងៃទៀត៕
No comments:
Post a Comment