ដោយ៖ ជន ស្រីណុច | ថ្ងៃអង្គារ ទី11 ខែកុម្ភៈ ឆ្នាំ2014, VOD
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ (រូបថត៖ តាំង វីដា)
គណបក្សសង្គ្រោះជាតិ នៅថ្ងៃចន្ទនេះ បង្ហាញជំហរជាថ្មីម្តងទៀត ថាខ្លួនចង់ដោះស្រាយបញ្ហានយោបាយនៅកម្ពុជា ប្រកបដោយសន្តិវិធី បន្ទាប់ពីមេបក្សប្រឆាំងមួយនេះ វិលត្រឡប់មកពីបណ្តាប្រទេសនៅអឺរ៉ុប និងកូរ៉េខាងត្បូង។
អ្នកនាំពាក្យគណបក្សសង្គ្រោះជាតិលោក យឹម សុវណ្ណ ប្រាប់VOD នៅថ្ងៃអង្គារទី១១ នេះថា បណ្តាប្រទេសធំៗនៅអឺរ៉ុប ក៏ដូចជាពលករនៅប្រទេសកូរ៉េខាងត្បូង មានការគាំទ្រ លោក សម រង្ស៊ី យ៉ាងខ្លាំង នៅពេលដែលលោកបានដាក់ញត្តិសុំអន្តរាគមន៍ ទៅដល់រដ្ឋាភិបាលកម្ពុជា ឲ្យមានការគោរពសិទ្ធិមនុស្ស។ លោកបន្តថា គណបក្សសង្គ្រោះជាតិ បានត្រៀមខ្លួនជាស្រេចក្នុងការចរចាជាមួយគណបក្សប្រជាជនកម្ពុជា ដោយលើបញ្ហាប្រទេសជាតិ និងទាមទារឲ្យមានការកែទម្រង់ការបោះឆ្នោត និងសុំឲ្យមានការបោះឆ្នោតមុនអាណត្តិជាដើម។
ប្រធានគណបក្សសង្គ្រោះជាតិ លោក សម រង្ស៊ី បានវិលមកកាន់ប្រទសកម្ពុជាវិញ កាលពីរាត្រីថ្ងៃចន្ទ ក្រោយពីបានចាកចេញពីកម្ពុជា កាលពីថ្ងៃទី២៣ ខែមករា ធ្វើដំណើរទៅទីក្រុងហ្ស៊ឺណែវ ប្រទេសស្វីស ដើម្បីចូលរួមកិច្ចប្រជុំក្រុមប្រឹក្សាសិទ្ធិមនុស្សរបស់ អង្គការសហប្រជាជាតិ និងស្តាប់របាយការណ៍ស្តីពីសិទ្ធិមនុស្សនៅកម្ពុជា។ ក្រោយមកលោក បានធ្វើដំណើរទៅប្រទេសអាល្លឺម៉ង់ ប៊ែលហ្សិក និងបារាំង ដើម្បីជួបជាមួយបណ្តាមន្ត្រីជាន់ខ្ពស់នៃប្រទេសទាំងនោះ ពិភាក្សានយោបាយការទូត អស់ពេលជាងមួយសប្តាហ៍ ហើយលោកក៏បន្តទៅជួបជាមួយអ្នកគាំទ្រគណបក្សរបស់លោកក្នុងប្រទេស កូរ៉េខាងត្បូងកាលពីថ្ងៃអាទិត្យ៕
សូមសរសេរមកកញ្ញា ជន ស្រីណុច តាមរយៈ chornsreynoch@vodhotnews.com
No comments:
Post a Comment