ព័ត៌មានទាន់ហេតុការណ៍
(អត្ថបទចុះផ្សាយនៅថ្ងៃ 
03-01-2014, 
9:10 pm) | ដោយ លាង ដឺលុច
03-01-2014, 9:10 pm) | ដោយ លាង ដឺលុច សហភាព អឺរ៉ុបបានសម្តែងការព្រួយបារម្ភយ៉ាងខ្លាំង ចំពោះហេតុការណ៍ហិង្សាដែលបានកើតឡើងតាំងពីថ្ងៃព្រហស្បតិ៍ រហូតមកដល់ព្រឹកថ្ងៃសុក្រនៅតាមរោងចក្រកាត់ដេរ។ មិនខុសពីសហរដ្ឋអាមេរិកឡើយ សហភាពអឺរ៉ុបអំពាវនាវអោយអ្នកពាក់ព័ន្ធក្នុងទំនាស់ទាំងអស់ដោះស្រាយ បញ្ហាដោយសន្តិវិធី។
ភារៈធារីនៃប្រតិភូសហភាពអឺរ៉ុបប្រចាំកម្ពុជា លោក Alain Vandersmissen បានប្រាប់គេហទំព័រថ្មីៗនៅល្ងាចថ្ងៃសុក្រនេះយ៉ាងដូច្នេះ៖«យើងយល់ អំពីការទទួលខុសត្រូវរបស់រដ្ឋាភិបាលក្នុងការធានាសណ្តាប់ធ្នាប់សង្គម។ ប៉ុន្តែការប្រើប្រាស់កងទ័ពដើម្បីគ្រប់គ្រងការតវ៉ា គឺជាមធ្យោបាយមិនត្រឹមត្រូវឡើយ។ សហភាពអឺរ៉ុបសោកស្តាយចំពោះលទ្ធផលនេះ ពិសេសការបាត់បង់ជីវិតមនុស្ស។ ហើយយើងសូមជំរុញភាគីពាក់ព័ន្ធទាំងអស់នៅក្នុងការតវ៉ា និងក្នុងជម្លោះនេះ សូមប្រកាន់អហិង្សា»។
រីឯស្ថានទូតបារាំងវិញ ស្ថានទូតដ៏មានឥទ្ធិពលមួយនេះដែលបានចូលរួមធ្វើសេចក្តីថ្លែងការណ៍ របស់សហភាពអឺរ៉ុប ជុំវិញស្ថានភាពហិង្សានៅក្នុងការបង្ក្រាបក្រុមអ្នកតវ៉ាដែរនោះ ក៏បានកំពុងបន្តតាមដានយ៉ាងយកចិត្តទុកដាក់ ស្ថានភាពទូទៅនៅពេលនេះដែរ។ នេះបើតាមការការបញ្ជាក់របស់លោក Nicolas Baudouin លេខាទីមួយនៃស្ថានទូតបារាំងប្រចាំកម្ពុជា ប្រាប់គេហទំព័រថ្មីៗនៅថ្ងៃនេះ។
សេចក្តីថ្លែងការណ៍របស់សហភាពអឺរ៉ុបមួយនឹងត្រូវគេផ្សព្វផ្សាយក្នុងពេលឆាប់ៗខាងមុខ។
គួររម្លឹកផងដែរថា ការអត្ថាធិប្បាយអំពីការប៉ះទង្គិចដោយហិង្សារវាង សមត្ថកិច្ច និងបាតុករដែលភាគច្រើនជាយុវជននោះ ក៏មកពីស្ថានទូតអាមេរិកប្រចាំកម្ពុជាដែរ។ ស្ថានទូតអាមេរិកអំពាវនាវអោយគ្រប់ភាគីអត់ធ្មត់។ អ្នកនាំពាក្យស្ថានទូតអាមេរិកលោក Sean J McIntosh បានថ្លែងប្រាប់គេហទំព័រថ្មីៗយ៉ាងដូច្នេះ៖«យើងមានផលប្រយោជន៍វែងឆ្ងាយ នៅក្នុងដំណើរការប្រជាធិបតេយ្យនៅកម្ពុជា។ ប៉ុន្តែយើងមិនគាំទ្រគណបក្សណាមួយ ឬបុគ្គណាមួយជាពិសេសនោះឡើយ។ ជាថ្មីម្តងទៀត យើងសូមអំពាវនាវអោយបន្តការសន្ទនា ក្នុងគោលដៅពង្រឹងប្រជាធិបតេយ្យនៅកម្ពុជា និងធ្វើអោយប្រសើរឡើងនូវតម្លាភាពនៃតំណើរការបោះឆ្នោត»៕
No comments:
Post a Comment