ដោយ៖ ជន ស្រីណុច | ថ្ងៃអាទិត្យ ទី1 ខែធ្នូ ឆ្នាំ2013 | VOD
ការដង្ហែក្បួនរបស់សកម្មជនសិទ្ធិមនុស្ស ពីខេត្តកំពតមករាជធានីភ្នំពេញ (រូបថត សរ ម៉ូរី)
ព្រះសង្ឃ និងប្រជាពលរដ្ឋជាង៥០អង្គនាក់
ចាប់ផ្តើមធ្វើដំណើរដោយដង្ហែជាក្បួន នៅតាមបណ្តោយផ្លូវជាតិលេខ៣
នៃខេត្តកំពត សំដៅមកកាន់រាជធានីភ្នំពេញ
អបអរទិវាសិទ្ធិមនុស្សអន្តរជាតិ១០ធ្នូ
ដើម្បីជំរុញឲ្យបញ្ឈប់ការរំលោភសិទ្ធិមនុស្សបង្កើតសន្តិភាព
និងយុត្តិធម៌នៅក្នុងសង្គម។
តំណាងក្រុមរបស់មិត្ត១០ធ្នូ លោក សរ
ម៉ូរី ប្រាប់VOD នៅព្រឹកថ្ងៃអាទិត្យ ទី០១ ខែធ្នូនេះថា
ប្រជាពលរដ្ឋ៤០នាក់ និងព្រះសង្ឃ១៤អង្គ
កំពុងតែធ្វើធម្មយាត្រា-សិទ្ធិយាត្រា ចេញពីទីរួមខេត្តកំពត
ចាប់ពីម៉ោង ៧:៣០នាទី ធ្វើដំណើរឆ្ពោះមកកាន់រាជធានីភ្នំពេញ។
លោកបន្តថា នៅព្រឹកមិញនេះដែរ ស្របពេលដែលដង្ហែក្បួននោះ
មាននគរបាលសួរនាំពីគោលបំណងនៃការហែដែរ តែមិនមានការរារាំងទេ។
លោក សរ ម៉ូរី បន្តថា ការដង្ហែនេះ
គឺដើម្បីអបអរទិវាសិទ្ធិមនុស្សអន្តរជាតិ១០ធ្នូ
ដើម្បីជំរុញឲ្យបញ្ឈប់ការរំលោភសិទ្ធិមនុស្សបង្កើតសន្តិភាព
និងយុត្តិធម៌នៅក្នុងសង្គម។
អង្គការសង្គមស៊ីវិល
ដែលឃ្លាំមើលការហែក្បួននេះ ឲ្យដឹងថា ពិធីហែក្បួន
ចាប់ផ្តើមពីថ្ងៃទី០១ខែធ្នូ នេះរហូតដល់ថ្ងៃទ១០ធ្នូដដែល។
ខេត្តទាំង ៥ដែលប្រជាពលរដ្ឋនិងព្រះសង្ឃ កំណត់យកជាគោលដៅនោះ រួមមាន
ខេត្តស្វាយរៀង ហែតាមផ្លូវជាតិលេខ១ ខេត្តកំពត ហែតាមផ្លូវជាតិ៣
ខេត្តកំពង់ស្ពឺ ហែតាមផ្លូវជាតិ៤ ខេត្តពោធិ៍សាត់ ហែតាមផ្លូវជាតិ៥
និងខេត្តកំពង់ធំ ហែតាមផ្លូវជាតិ៦។
ក្នុងអំឡុងពេលហែក្បួនមានកម្មវិធី
មួយចំនួន ដូចជា ធម្មទេសនាអំពីព្រះពុទ្ធសាសនា និងសិទ្ធិមនុស្ស
សំណួរ-ចម្លើយពីសិទ្ធិមនុស្ស សំណួរល្បងប្រាជ្ញា
និងការសូត្រកំណាព្យផ្សេងៗទៀត៕
សរសេរមកកាន់កញ្ញា ជន ស្រីណុច តាមរយៈ chornsreynoch@vodhotnews.com
No comments:
Post a Comment