ប្រធានគណបក្សសង្គ្រោះជាតិ លោក សម រង្ស៉ី ចុះទៅជួបប្រជាពលរដ្ឋដែលសង់រោងតវ៉ានៅមុខវត្តខ្ទរ ក្នុងសង្កាត់ព្រែកលៀប ខណ្ឌឫស្សីកែវ នៅព្រឹកថ្ងៃទី២៥ ខែវិច្ឆិកា។ មេដឹកនាំបក្សប្រឆាំងនេះ បានជំរុញឲ្យអ្នកភូមិក្រោកឈរឡើងប្រឆាំងនឹងអំពើពុករលួយ និងអយុត្តិធម៌សង្គម។
លោក សម រង្ស៉ី មានប្រសាសន៍ថា ការក្រោកឡើងតវ៉ារបស់ប្រជាពលរដ្ឋ ជាប្រការគួរឲ្យកោតសរសើរ ហើយគណបក្សសង្គ្រោះជាតិ នៅឈរគាំទ្រសកម្មភាពនេះ។ លោកបន្តថា សកម្មភាពរបស់ក្រុមហ៊ុន អេង កាំង និងបក្ខពួក ដែលចង់លេបយកដីប៉ាឆាវត្តរបស់វត្តនោះ ជាអំពើរំលោភច្បាប់ និងបំពានសាសនា ដែលមិនអាចអត់ឱនឲ្យទេ។
ប្រជាពលរដ្ឋភូមិខ្ទរ បានដាក់វេនគ្នាឈរចាំនៅមុខប៉ាឆាវត្ត វត្តខ្ទរ ដើម្បីទាមទារឲ្យអាជ្ញាធរចុះខសន្យាថា បញ្ឈប់សកម្មភាពទន្ទ្រានដីវត្តដែលមានទំហំជាង ៣ហិកតារ យកទៅលក់ឲ្យក្រុមហ៊ុនឯកជន។ ក្រុមអ្នកភូមិបានទះដៃស្វាគមន៍មេបក្សប្រឆាំង ដែលចុះទៅទីនោះ។ អ្នកខ្លះរត់ឱប និងអ្នកខ្លះទៀតស្រែកហៅមេបក្សប្រឆាំងឲ្យជួយ។
ពលរដ្ឋមួយចំនួនប្រាប់ថា ពួកគាត់សង្ឃឹមថា មេបក្សប្រឆាំងនឹងអាចជួយតវ៉ាយកដីវត្តមកប្រគល់ឲ្យពុទ្ធបរិស័ទវិញ។ ប៉ុន្តែ ប្រជាពលរដ្ឋទាំងនោះបញ្ជាក់ថា ពួកគាត់មិនចង់ឲ្យក្រុមមន្ត្រីលាបពណ៌គាត់ថា ពួកគាត់ធ្វើក្រោកតវ៉ាដើម្បីប្រយោជន៍បក្សប្រឆាំងទេ សំខាន់បំផុត គឺទាមទារយកដីវត្តមកវិញតែប៉ុណ្ណោះ។ បើក្រឡេកមើលទីតាំងប៉ាឆាវត្តវិញ ភ្លើងនៅតែបន្តឆេះបំពង់ជ័រធំៗ ដែលក្រុមហ៊ុនរៀបចំត្រៀមបូមខ្សាច់ពន្លិចទីតាំងប៉ាឆាវត្ត។
យ៉ាងណាក៏ដោយ អភិបាលរាជធានីភ្នំពេញ លោក ប៉ា សុជាតិវង្ស នៅព្រឹកថ្ងៃទី២៤ ខែវិច្ឆិកា ក៏បានចុះទៅទីតាំងនោះដែរ។ ដោយលោកបញ្ជាក់ថា អាជ្ញាធររាជធានីនឹងដោះស្រាយបញ្ហានេះជូនពលរដ្ឋ។
ក្រុមអ្នកភូមិបញ្ជាក់ថា អភិបាលខណ្ឌឫស្សីកែវ លោក ឃ្លាំង ហួត បានយកលិខិតមួយមកបង្ហាញពលរដ្ឋថា ប្រមុខរដ្ឋាភិបាល លោក ហ៊ុន សែន បានសម្រេចប្រគល់ដីប៉ាឆាវត្តនេះ ឲ្យអ្នកភូមិវិញ និងប្រកាសលុបចោលសេចក្តីជូនដំណឹងរបស់ទីស្ដីការគណៈរដ្ឋមន្ត្រី ដែលធ្លាប់បានសម្រេចរុះរើប៉ាឆាវត្តដុតខ្មោច យកដីលក់ឲ្យក្រុមហ៊ុន អេង កាំង ឌីវើលុបមែន (Eng Kang Development)៕
No comments:
Post a Comment