ដោយ៖ ថុល ស្រីលក្ខណ៍ និង ញឹម សុខន | ថ្ងៃអាទិត្យ ទី24 ខែវិច្ឆិកា ឆ្នាំ2013, ម៉ោង 04:21 PM
សហព័ន្ធសហជីពចំនួន៤ គ្រោងបើកយុទ្ធនាការ ជំរុញឲ្យស្ថាប័នពាក់ព័ន្ធ តំឡើងប្រាក់ឈ្នួលដល់កម្មករ ក្នុងវិស័យឧស្សាហកម្មកាត់ដេរ ឲ្យបានយ៉ាងតិច១៥៤ដុល្លារក្នុងមួយខែ ដើម្បីធានាសុខភាព និងជីវភាពរស់នៅប្រចាំថ្ងៃ។
សេចក្តីប្រកាសព័ត៌មានរួមគ្នា របស់សហជីពចំនួន៤ រួមមាន សម្ព័ន្ធសហជីពប្រជាធិតេយ្យកម្មករកាត់ដេរកម្ពុជា (C-CAWDU) សហព័ន្ធសហជីពកម្ពុជា (CATU) និង សម្ព័ន្ធសហជីពមួយចំនួនទៀត ចេញផ្សាយ ថ្ងៃអាទិត្យ ទី២៤ ខែវិច្ឆិកានេះ ឲ្យដឹងថា នៅថ្ងៃចន្ទ ស្អែកនេះ ពួកគេ នឹងធ្វើសន្និសីទសារព័ត៌មាន បង្ហាញពីយុទ្ធសាស្ត្រទាមទារតំឡើងប្រាក់ឈ្នួលនេះ។
ប្រធានសហព័ន្ធសហជីពកម្ពុជា អ្នកស្រី យ៉ាង សុភ័ណ្ឌ ដែលចូលរួមចេញសេចក្តីប្រកាសព័ត៌មានដែរនោះ អះអាងថា ក្រុមការងារ បានដាក់លិខិត ទៅសមាគមន៍រោងចក្រកាត់ដេររួចហើយ កាលពីថ្ងៃទី៥ខែវិច្ឆិកា ប្រាប់ពីគោលបំណងនៃការធ្វើយុទ្ធនាការ និងការទាមទារសុំតំឡើងប្រាក់ឈ្នួលនេះ។
អ្នកស្រី សុភ័ណ្ឌ បន្តថា សហជីពទាមទារ ៦ចំណុចដូចជា សុំតំឡើងប្រាក់ឈ្នួលគោល ១៥៤ដុល្លារក្នុង១ខែ បញ្ឈប់ការប្រើប្រាស់កិច្ចសន្យារយៈពេលខ្លី តំកល់ប្រាក់អតីតភាពកម្មករនៅធនាគារ ស្នើមិនឲ្យមានអ្នកមានអំណាចកាងពីក្រោយក្រុមហ៊ុន ដោះស្រាយបញ្ហាកម្មកររោងចក្រSL និងទាមទារប្រាក់ថ្លៃអាហារ ៣ពេលដល់កម្មករ។
អ្នកស្រី ព្រមានថា បើតំណាងរោងចក្រ មិនឆ្លើយតបនៅសប្តាហ៍ក្រោយនេះទេ កម្មករ នឹងធ្វើកូដកម្មតាមរោងចក្របន្តទៀតនៅពេលខាងមុខ ដើម្បីជំរុញករណីនេះឲ្យភាគីពាក់ព័ន្ធយកចិត្តទុកដាក់ ពីផលលំបាករបស់កម្មករ។
ប្រធានសមាគមន៍រោងចក្រកាត់ដេរកម្ពុជា លោក វ៉ាន់ ស៊ូអៀង ប្រតិកម្មថា ការទាមទាររបស់សហជីពទាំងនោះ មិនផ្អែកលើច្បាប់ស្តីពីការងារទេ។
ប្រាក់ឈ្នួលគោលរបស់កម្មករបច្ចុប្បន្ននេះមានត្រឹម ៨០ដុល្លារប៉ុណ្ណោះក្នុងមួយខែ ដែលអ្នកជំនាញសេដ្ឋកិច្ច គិតថាមិនអាចទ្រទ្រង់ជីវភាពរស់នៅប្រចាំថ្ងៃបាន ខណៈទំនិញលើទីផ្សារមានតម្លៃខ្ពស់៕
សូមសរសេរមកកាន់ អ្នកនាង ថុល ស្រីលក្ខណ៍ តាមរយៈ sreyleak@vodhotnews.com
No comments:
Post a Comment