ដោយ៖ អ៊ឹង ប៊ុនថន | ថ្ងៃចន្ទ ទី4 ខែវិច្ឆិកា ឆ្នាំ2013, ម៉ោង 10:46 AM
ស្តាប់សំឡេង៖ | ចម្លងទុក |
គណបក្សសង្គ្រោះជាតិ ដែលទទួលបាន៥៥អាសនៈ ក្នុងចំណោម១២៣ តាមការប្រកាសលទ្ធផលជាផ្លូវការរបស់ គ.ជ.ប នោះ គឺមានខេត្ត-រាជធានីចំនួន៤ គណបក្សនេះទទួលជ័យជម្នះ ដែលជាមណ្ឌលមានអ្នកបោះឆ្នោតច្រើនជាងគេ។
សំអាងលើការគាំទ្រនេះ ប្រធានគណបក្សសង្គ្រោះជាតិ ព្រលយថា តំណែងអភិបាលរាជធានីភ្នំពេញ និងខេត្តចំនួន៣ទៀត ដូចជា កំពង់ចាម ព្រៃវែង និងកណ្តាល គួរតែប្រគល់ឲ្យគណបក្សសង្គ្រោះជាតិដែលឈ្នះដាច់នៅមណ្ឌលនោះ។
ហេតុអ្វី គណបក្សសង្គ្រោះជាតិ ចង់បានតំណែងអភិបាលខេត្ត-រាជធានីដែលខ្លួនឈ្នះឆ្នោត?
អ្នកវិភាគព្រឹត្តិការណ៍សង្គម លោក អ៊ូ វីរៈ មានប្រសាសន៍ថា អ្វីដែលគណបក្សសង្គ្រោះជាតិលើកឡើងនោះ ជាការចែងចែកអំណាច។ ប៉ុន្តែត្រូវស្នើឲ្យមានការអនុម័តច្បាប់មួយកំណត់ថា តំណែងអភិបាលខេត្ត-រាជធានីត្រូវតែងតាំងតាមរយៈប្រជាពលរដ្ឋជាអ្នកបោះឆ្នោត ៖ “ការចង់បែងចែកនេះ មិនមានអ្វីអាក្រក់ទេ ដូចខ្ញុំនិយាយតាំងពីដើមម្ល៉េះ ថាការបែងចែកអំណាចមិនមែនជារឿងអាក្រក់ទេ បើខ្លាចយើងអន់ ដូចខាងហ្វ៊ុនស៊ិនប៉ិច ហើយចូលទៅយើងពុករលួយ យើងធ្វើអ្វីមិនកើត នេះរឿងកំហុសយើងភ័យខ្លាចខ្លួនឯង យើងមិនទុកចិត្តខ្លួនឯង នេះខ្ញុំថាជារឿងមួយដែលមិនគួរជាមូលដ្ឋានមួយទេ ការភ័យខ្លាចដល់ថ្នាក់ ខ្លាចដូចហ្វ៊ុនស៊ុនប៉ិច ភ័យខ្លាចដល់ថ្នាក់នេះ ខ្ញុំមើលទៅឆ្លុះបញ្ជាំង ពីភាពទន់ខ្សោយនៃអ្នកនយោបាយ”។
បើទោះជាមិនទាន់មានច្បាប់ក៏ដោយ តែកាលពីអាណត្តិទី១ និងទី២ គណបក្សហ្វ៊ុនស៊ិនប៉ិច និងគណបក្សប្រជាជនកម្ពុជា បានចរចារគ្នាដើម្បីបែងចែកតំណែងអភិបាលខេត្ត-រាជធានី ទៅតាមសំឡេងឆ្នោតដែលខ្លួនឈ្នះនៅមណ្ឌលនោះ។
តើការចង់បានតំណែងជាអភិបាលខេត្ត-រាជធានី នៅមណ្ឌលដែលគណបក្សសង្គ្រោះជាតិ ឈ្នះឆ្នោត អាចទៅរួចទេ ខណៈប្រកាសមិនចូលរួមបង្កើតរដ្ឋាភិបាលចម្រុះជាមួយគណបក្សប្រជាជនកម្ពុជានោះ?
នាយកអង្គការឃ្លាំមើលការបោះឆ្នោតមួយហៅកាត់ថា ខុមហ្វ្រែល លោក គល់ បញ្ញា មានប្រសាសន៍ថា ការបែងចែកអំណាចទាំងក្នុងរដ្ឋសភា និងក្នុងរដ្ឋាភិបាល អាស្រ័យលើការចរចាគ្នា នៅពេលខាងមុខ បើទោះជាគណបក្សសង្គ្រោះជាតិ មិនចូលរួមបង្កើតរដ្ឋាភិបាលចម្រុះក៏ដោយ។ លោក បានលើកឧទាហរណ៍នៅប្រទេសថៃ និងប្រទេសម៉ាឡេស៊ី ៖ “ភឿថៃ[គណបក្សកាន់អំណាចនៅថៃបច្ចុប្បន្ន] គាត់កាន់រដ្ឋាភិបាលទៅ ប៉ុន្តែគណបក្សប្រឆាំងគេជាប់ឆ្នោតនៅ អភិបាលក្រុងបាងកក វាមិនមែនទាល់តែចូលរដ្ឋាភិបាលចម្រុះ បានទៅកាន់ មិនមានទេ វាស៊ីសង ថាតើសន្លឹកឆ្នោតទៅតាមខេត្តនីមួយៗ តាមក្រុងនីមួយៗ គេឲ្យទៅគណបក្សណា មិនទាក់ទិនទៅ និងរដ្ឋាភិបាលចម្រុះទេ ប៉ុន្តែខ្ញុំនិយាយនេះ និយាយពីការអនុវត្តកន្លងមក ដោយសារយើងគ្មានច្បាប់ទម្លាប់ត្រឹមត្រូវ អំពីការបែងចែងអំណាចទៅតាមខេត្តក្រុង កន្លងមកគណបក្សហ្វ៊ុនស៊ិនប៉ិច និងគណបក្សប្រជាជននេះ គេបានជជែកគ្នាពីការបែងចែកអំណាចនេះ មិនជាអ្វីទេព្រោះ នៅម៉ាឡេស៊ីអញ្ជឹងដែរ ៥រដ្ឋ ត្រួតត្រាដោយបក្សប្រឆាំងអញ្ជឹងដែរ ប៉ុន្តែមិនមែនគណបក្សអាន់វ៉ា[របស់លោក អាន់វ៉ាអ៊ីប្រាហ៊ីម] នោះទៅធ្វើរដ្ឋាភិបាលចម្រុះជាមួយ កាន់អំណាចម៉ាឡេស៊ី នោះទេ”។
មុនពេលឲ្យក្រុមបច្ចេកទេសនៃគណបក្សជាប់ឆ្នោតទាំងពីរជួបគ្នានៅនៅថ្ងៃទី៥ ខែវិច្ឆិកានេះ គណបក្សសង្គ្រោះជាតិ បានដាក់របៀបវារៈចំនួន៣ គឺការបង្កើតគណៈកម្មការស្វែងរកការពិត ចំពោះភាពមិនប្រក្រតីនៃការបោះឆ្នោត ការស្នើឲ្យសមាជិក គ.ជ.ប លាលែងពីតំណែង និងការកែទម្រង់ គ.ជ.ប តាមអនុសាសន៍អង្គការសហប្រជាជាតិ និងសង្គមស៊ីវិល។
ប៉ុន្តែលោក សម រង្ស៊ី ប្រាប់សមាជិកក្រុមប្រឹក្សាឃុំ-សង្កាត់របស់ខ្លួនកាលពីចុងសប្តាហ៍មុននេះថា តំណែងអភិបាលរាជធានី-ខេត្ត ដែលគណបក្សសង្គ្រោះជាតិឈ្នះឆ្នោត ក៏ជាបញ្ហាស្នួលដែលត្រូវលើកឡើង។ លោកអះអាងថា ការតែងតាំងអភិបាលរាជធានី-ខេត្ត គួរតែធ្វើឡើងដោយការបោះឆ្នោត ឬការតែងតាំងនោះ ត្រូវតែមានការឯកភាពពីគណបក្សសង្គ្រោះជាតិផងដែរ។
គណបក្សប្រជាជនកម្ពុជា ដែលឈ្នះឆ្នោត បានកាន់កាប់តំណែងអភិបាលខេត្ត-រាជធានីទាំងអស់កាលពីអាណត្តិទី៣ និងទី៤ ហើយពួកគេ គឺជាប្រធានគណបក្សនេះប្រចាំខេត្តនោះ។ ប៉ុន្តែលោក អ៊ូ វីរៈ ផ្តល់អនុសាសន៍ថា ការបោះឆ្នោតជ្រើសរើសតំណែងអភិបាលខេត្ត-រាជធានីជាការចាំបាច់ ៖ “ប្រសិនជាថា ច្បាប់មិនទាន់មាន បើមិនទាន់មានយើងធ្វើឲ្យមានទៅ ហើយចាំរៀបចំពេលវេលាដើម្បីឲ្យបោះឆ្នោត ខ្ញុំមើលទៅធ្វើទៅរួច ប៉ុន្តែទន្ទឹមនោះដែរ ប្រសិនជាមានការរៀបចំ ពេលវេលានឹងការបោះឆ្នោតនេះ ក៏មិនគួររៀបចំពេលណា ខុសពីការបោះឆ្នោតឆ្នាំ ២០១៧ ជាមួយឃុំសង្កាត់ដែរ វាគួរតែជាមួយគ្នា កុំឲ្យប្រជាពលរដ្ឋនោះគាត់រវល់ តែពីរឿងការបោះឆ្នោតខ្លាំងពេក ដែលធ្វើឲ្យគាត់នឿយណាយ នៃការបោះឆ្នោត វាក្លាយជារឿងបរាជ័យ សម្រាប់ការចូលរួមរបស់គាត”។
លោក គល់ បញ្ញា យល់ថា តំណែងអភិបាលខេត្ត-រាជធានីគួតែជ្រើសរើសទៅតាមឆន្ទៈម្ចាស់ឆ្នោត ព្រោះច្បាប់កំណត់ថា អភិបាលខេត្ត-រាជធានី ជាមន្ត្រីក្រមខណ្ឌស៊ីវិល ដែលត្រូវធ្វើការជាអាជ្ញាកណ្តាលតំណាងឲ្យផលប្រយោជន៍រួម មិនមែនប្រយោជន៍បក្សទេ ៖ “ប៉ុន្តែបញ្ហាគ្រាន់ថា គណបក្សប្រជាជន គាត់រៀបចំរចនាសម្ព័ន្ធ កន្លងមកសុទ្ធតែមន្រ្តីនយោបាយ អញ្ជឹងពាក្យថាមន្ត្រីនយោបាយ ទាល់តែមានប្រជាជនគាំទ្រ ពីថ្នាក់មូលដ្ឋានរបស់ខ្លួន បើអត់មានទេ វាអាចបញ្ហាដែរ ដូចជានៅរាជធានីភ្នំពេញ អំណាចអភិបាលរាជធានីធំណាស់ ព្រោះគេធ្វើប្រតិភូកម្មឲ្យ”។
បើតាម លោក គល់ បញ្ញា ការបោះឆ្នោតជ្រើសរើសអភិបាលខេត្ត-រាជធានី គួរធ្វើ តែលើមណ្ឌលមួយចំនួន ដែលមានអ្នកបោះឆ្នោតច្រើន ដូចជា រាជធានីភ្នំពេញ កំពង់ចាម កណ្តាល និងព្រៃវែង៕
សូមសរសេរមកកាន់ លោក អ៊ឹង ប៊ុនថន តាមរយៈ chanthorn@vodhotnews.com
2 comments:
បក្សប្រឆាំងមិនមានអ្នកស្រឡាញ់ជាតិទាំងអស់ទេ
អ្នកខ្លៈស្រឡាញ់ដុល្លាច្រើនជាង វាមិនខុសពីបក្ស
ប្រជាជនឡើយ ថ្ងៃអន្សាររបស់បក្សប្រឆាំងបានមក
ដល់ហើយ
Why the CNRP wants the Phnom Penh governor position?
BECAUSE THAT'S WHERE THE CORRUPTION AND MONEY TAKING PLACE.
Post a Comment