ដោយ៖ ដួង សុខា | ថ្ងៃសុក្រ ទី1 ខែវិច្ឆិកា ឆ្នាំ2013, ម៉ោង 02:00 PM
ស្តាប់សំឡេង៖ | ចម្លងទុក |
លោក ហ៊ុន សែន អនុប្រធានគណបក្សប្រជាជនកម្ពុជា(រូបភាពពី ទទក)
គណបក្សប្រជាជនកម្ពុជា(CPP) ដែលកំពុងដឹកនាំរាជរដ្ឋាភិបាលអាណត្តិទី៥តែឯង ច្រានចោលជាច្រើនលើកមកហើយនូវការទាមទាររបស់គណបក្សសង្គ្រោះជាតិឲ្យបង្កើតគណៈកម្មការឯករាជ្យមួយស៊ើបអង្កេតពីភាពមិនប្រក្រតីនៃការបោះឆ្នោត ក្រៅក្របខ័ណ្ឌគណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប និងក្រុមប្រឹក្សាធម្មនុញ្ញ។
គណបក្សកាន់អំណាចបកស្រាយថា ការដោះស្រាយភាពមិនប្រក្រតីនៃការបោះឆ្នោតជ្រើសតាំងតំណាងរាស្ត្រ នីតិកាលទី៥ កាលពីថ្ងៃទី២៨ ខែកក្កដា ឆ្នាំ២០១៣ គឺហួសពេល និងហួសក្របខ័ណ្ឌច្បាប់ ពោលគឺ គ.ជ.ប និងក្រុមប្រឹក្សាធម្មនុញ្ញបានដោះស្រាយជាស្ថាពររាល់បញ្ហាបោះឆ្នោតទាំងអស់ហើយ។ ប៉ុន្តែ គណបក្សសង្គ្រោះជាតិលើកទ្បើងថា ស្ថាប័នទាំងពីរនេះមិនឯករាជ្យ ដោយបំពេញការងារលម្អៀងទៅគណបក្សប្រជាជនកម្ពុជា។
នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោយដោយត្រឹមត្រូវ និងយុត្តិធម៌នៅកម្ពុជា ហៅកាត់ និកហ្វិច(Nicfec) លោក ហង្ស ពុទ្ធា យល់ថា គណបក្សប្រជាជនកម្ពុជាបដិសេធដោះស្រាយភាពមិនប្រក្រតីនៃការបោះឆ្នោតក្រៅក្របខណ្ឌ គ.ជ.ប និងក្រុមប្រឹក្សាធម្មនុញ្ញ ពីព្រោះគណបក្សនេះបារម្ភថា ការស៊ើបអង្កេតអាចធ្វើឲ្យអាសនៈសភារបស់ខ្លួនប្រែប្រួល ៖ "ប្រសិនជាប្រែប្រួល ទៅរកគណបក្សប្រជាជន អាសនៈកាន់តែច្រើន វាមិនអី ប៉ុន្តែប្រសិនជាប្រែប្រួលទៅរកការថយអាសនៈ នៅក្នុងសភា វាធ្វើឲ្យខាត អញ្ជឹងអ្វីដែលគណបក្សប្រជាជនលោកបានគិតនោះថា ឥឡូវជាជោគជ័យហើយ អញ្ជឹងមិនចង់ឲ្យមានការប្រែប្រួលអាសនៈនេះទេ"។
លទ្ធផលបោះឆ្នោតផ្លូវការដែលប្រកាសដោយ គ.ជ.ប កាលពីថ្ងៃទី៨ ខែកញ្ញា ឆ្នាំ២០១៣ បង្ហាញថា គណបក្សប្រជាជនកម្ពុជារបស់ លោកនាយករដ្ឋមន្ត្រី ហ៊ុន សែន ទទួលបានអាសនៈរដ្ឋសភាចំនួន៦៨ ក្នុងចំណោមអាសនៈ១២៣។ ចំណែក គណបក្សសង្គ្រោះជាតិទទួលបាន៥៥អាសនៈ។ ប៉ុន្តែ គណបក្សសង្គ្រោះជាតិដែលដឹកនាំដោយ លោក សម រង្ស៊ី និងលោក កឹម សុខា មិនទទួលយកលទ្ធផលនេះទេ ដោយលើកហេតុផលថា ការបោះឆ្នោតមានភាពមិនប្រក្រតីធ្ងន់ធ្ងរ។ ភាពមិនប្រក្រតីដែលគណបក្សនេះបរិហារ មានដូចជា ការបាត់ឈ្មោះអ្នកបោះឆ្នោត ការរាប់សន្លឹកឆ្នោត ជាដើម។
លោក ហង្ស ពុទ្ធា លើកហេតុផលមួយទៀតដែលគណបក្សកាន់អំណាចមិនស៊ើបអង្កេតលទ្ធផលបោះឆ្នោតទ្បើងវិញ ដោយសារខ្លួនសង្ស័យថា ភាពមិនប្រក្រតីមួយចំនួននៃដំណើរការបោះឆ្នោតពាក់ព័ន្ធការអនុវត្តន៍ខុសនីតិវិធីរបស់មន្ត្រីមូលដ្ឋាន ឬសកម្មជនរបស់ខ្លួន។ លោកគិតថា ការបដិសេធស៊ើបអង្កេតបញ្ហាបោះឆ្នោតក៏បង្ហាញពីអាថ៌កំបាំងរវាង គ.ជ.ប និងគណបក្សប្រជាជនកម្ពុជាផងដែរ ៖ "ភស្តុតាងមួយចំនួនដែលប្រកិតៗទៅនឹងភាពមិនប្រក្រតី របស់ គ.ជ.ប និងអាជ្ញាធរដែនដី ដែលជាសមាជិករបស់គណបក្សប្រជាជន នោះវាហាក់ដូចជាប្រកិតៗ ឈានទៅបើកការបង្ហាញថា មានទំនាក់ទំនងគ្នា រវាងគណបក្សជាមួយនិងស្ថាប័នបោះឆ្នោត"។
ទោះយ៉ាងណា អនុប្រធានគណបក្សប្រជាជនកម្ពុជា លោក ហ៊ុន សែន អះអាងប្រាប់ថ្នាក់ដឹកនាំកំពូលគណបក្សសង្គ្រោះជាតិ ក្នុងកិច្ចចរចានយោបាយទ្វេភាគី កាលពីថ្ងៃទី១៦កញ្ញា ឆ្នាំ២០១៣ ថា ភាពមិនប្រក្រតីនៃការបោះឆ្នោតមិនប៉ះពាល់ធ្ងន់ធ្ងរដល់លទ្ធផលបោះឆ្នោតទេ។
អ្នកវិភាគនយោបាយ លោក សុខ ទូច ថ្លែងថា អំណះអំណាងរបស់គណបក្សប្រជាជនកម្ពុជាដែលថា ការដោះស្រាយវិវាទបោះឆ្នោត មានតែ គ.ជ.ប និងក្រុមប្រឹក្សាធម្មនុញ្ញទេដែលមានសមត្ថកិច្ច គឺត្រឹមត្រូវទៅតាមផ្លូវច្បាប់។ ប៉ុន្តែ លោកថា អ្នកនយោបាយក៏ត្រូវគោរពឆន្ទៈរបស់ប្រជាពលរដ្ឋដែរ។ លោក វិភាគថា ប្រសិនបើការស៊ើបអង្កេតត្រូវបានធ្វើទ្បើង គណបក្សកាន់អំណាចអាចនឹងខាតប្រយោជន៍ ៖ "ខាត ចង់និយាយថា វាមិនមានអ្វីចំណេញ វាត្រូវតែរកឃើញចំនួនកើនរបស់គណបក្សសង្គ្រោះជាតិ ព្រោះកន្លែងខ្លះត្រូវការតែ ១៦០សំឡេងទេ តែបាត់មួយកៅអីទៀតត្រូវឡើងគណបក្សសង្គ្រោះជាតិ ដូចជាខេត្តកណ្តាល ដូចជាបញ្ហាខេត្តក្រចេះ បញ្ហាសៀមរាប ទាំងអស់នេះដែលវានាំឲ្យមានបញ្ហា"។
ប្រធានគណបក្សសង្គ្រោះជាតិ លោក សម រង្ស៊ី បានប្រកាសថា បើគ្មានការលួចបន្លំសន្លឹកឆ្នោតទេ គណបក្សលោកទទួលបានអាសនៈនៅរដ្ឋសភា យ៉ាងតិច៦៣។ គណបក្សនេះបានដឹកនាំធ្វើមហាបាតុកម្មអហិង្សា ៣លើកមកហើយ ដើម្បីបន្តទាមទាររកយុត្តិធម៌ជូនម្ចាស់ឆ្នោត។
អ្នកស្រាវជ្រាវឯករាជ្យពីការអភិវឌ្ឍន៍សង្គម លោក កែម ទ្បី កត់សម្គាល់ថា គ.ជ.ប និងក្រុមប្រឹក្សាធម្មនុញ្ញ ជាស្ថាប័នរដ្ឋដែលគ្រប់គ្រងដោយគណបក្សកាន់អំណាច។ លោកថា ចំណុចនេះទើបធ្វើឲ្យគណបក្សនេះស្ទាក់ស្ទើរយល់ព្រមឲ្យមានការស៊ើបអង្កេត ដោយគណៈកម្មការឯករាជ្យចម្រុះមួយ ក្រៅពី គ.ជ.ប និងក្រុមប្រឹក្សាធម្មនុញ្ញ។ លោក រកឃើញថា ភាពលម្អៀងពាក់ព័ន្ធនឹងដំណើរការបោះឆ្នោតទៅរកគណបក្សកាន់អំណាច មានលក្ខណៈធំធេង ដែលជាហេតុធ្វើឲ្យគណបក្សនេះមិនស៊ើបអង្កេតលទ្ធផលបោះឆ្នោតទ្បើងវិញ ៖ "ប្រសិនជាមានការស៊ើបអង្កេតច្បាស់លាស់ត្រឹមត្រូវ គណបក្សប្រជាជន អាចខាតចំនួនកៅអី ឬក៏អាចចាញ់នៅក្នុងការបោះឆ្នោត នោះទៀត អញ្ជឹងបានជាគណបក្សប្រជាជនមិនអនុញ្ញាតឲ្យស្ថាប័នផ្សេង ក្រៅពី គ.ជ.ប និងក្រុមប្រឹក្សាធម្មនុញ្ញ ស៊ើបអង្កេតទេ"។
លោកគិតថា ប្រសិនបើគណៈកម្មការឯករាជ្យមួយត្រូវបានបង្កើតទ្បើង ហើយរកឃើញពីភាពមិនប្រក្រតីនៃការបោះឆ្នោតអាណត្តិទី៥នេះ ភាពមិនប្រក្រតីទាំងនោះក៏អាចឆ្លុះបញ្ចាំងផងដែរពីភាពមិនប្រក្រតីនៃការបោះឆ្នោតអាណត្តិមុនៗ ដែលនាំឲ្យគណបក្សប្រជាជនកម្ពុជាឈ្នះឆ្នោត។
រហូតមកដល់ពេលនេះ គណបក្សសង្គ្រោះជាតិនៅតែរក្សាជំហរធ្វើពហិការចូលប្រជុំរដ្ឋសភា ដរាបណាការទាមទាររបស់ខ្លួនឲ្យមានការស៊ើបអង្កេតពីភាពប្រក្រតីនៃការបោះឆ្នោតដោយមានការចូលរួមពីអ្នកសង្កេតការណ៍ជាតិ-អន្តរជាតិ មិនមានដំណោះស្រាយ។
អ្នកវិភាគ និងអ្នកឃ្លាំមើលការបោះឆ្នោត អះអាងផ្ទុយពីគណបក្សប្រជាជនកម្ពុជាថា ការទាមទាររបស់គណបក្សសង្គ្រោះជាតិមិនទាន់ហួសពេល ឬហួសក្របខ័ណ្ឌច្បាប់ទេ ប្រសិនបើអ្នកនយោបាយមានឆន្ទៈស្វែងរកយុត្តិធម៌ជូនប្រជាពលរដ្ឋជាម្ចាស់ឆ្នោត ដោយហ៊ានទទួលស្គាល់ការពិត៕
សូមសរសេរមកកាន់ លោក ដួង សុខា តាមរយៈ duong.sokha@vodhotnews.com
No comments:
Post a Comment