ដោយ៖ តាំង វីដា | ថ្ងៃអាទិត្យ ទី13 ខែតុលា ឆ្នាំ2013, VOD
គណបក្សសង្គ្រោះជាតិ អំពាវនាវរកជំនួយពីសប្បុរសជនក្នុង និងក្រៅប្រទេស ដើម្បីទ្រទ្រង់គម្រោងធ្វើមហាបាតុកម្មអហិង្សា ដែលគ្រោងធ្វើនៅចុងខែតុលានេះ នៅទីលានប្រជាធិបតេយ្យ រាជធានីភ្នំពេញ ជំរុញឲ្យមានយុត្តិធម៌ដល់ម្ចាស់ឆ្នោត។
សេចក្តីអំពាវនាវ របស់គណបក្សសង្គ្រោះជាតិ ចុះថ្ងៃទី១៣ ខែតុលា ឆ្នាំ២០១៣នេះ ឲ្យដឹងថា គណបក្សសង្គ្រោះជាតិ សម្រេចធ្វើមហាបាតុកម្មអហិង្សាជាថ្មីទៀត ដែលមានរយៈពេលច្រើនថ្ងៃ និងទ្រង់ទ្រាយធំជាងមុន ចាប់ផ្តើមពីថ្ងៃទី២៣ ខែតុលា ឆ្នាំ២០១៣នេះ។
តាមគម្រោង គណបក្សសង្គ្រោះជាតិ គ្រោងធ្វើមហាបាតុកម្មលើកទី៣នេះ ដើម្បីយកញត្តិជូនអង្គការសហប្រជាជាតិ និងប្រទេសជាហត្ថលេខីនៃកិច្ចព្រមព្រៀងសន្តិភាពទីក្រុងបារីស ២៣ តុលា ១៩៩១ តាមរយៈតំណាងឧត្តមស្នងការអង្គការសហប្រជាជាតិប្រចាំកម្ពុជា។
លិខិតដដែលនេះ បន្តថា ដើម្បីសម្រួលដល់ដំណើរមហាបាតុកម្មអហិង្សា គណបក្សសង្គ្រោះជាតិ សូមអំពាវនាវដល់ជនរួមជាតិគ្រប់ទាំងក្នុង និងក្រៅប្រទេស បន្តជួយផ្តល់វិភាគទានជាថវិកា និងសម្ភារៈផ្សេងៗ ដើម្បីសម្រួលដល់ការដឹកជញ្ជូន ការសង់រោងស្នាក់នៅ ដំណើរការរៀបចំម្ហូបអាហារ សន្តិសុខ សុវត្ថិភាព និងសុខភាពជាដើម។
គណបក្សសង្គ្រោះជាតិ បានដឹកនាំធ្វើមហាបាតុកម្មអហិង្សាពីរលើកមកហើយ នៅទីលានប្រជាធិបតេយ្យ ដែលមានប្រជាពលរដ្ឋមកពីរាជធានីភ្នំពេញ និងបណ្តាខេត្តនានារាប់ម៉ឺននាក់ចូលរួម។
បាតុកម្មទាំងពីរលើក គឺកាលពីថ្ងៃទី០៧ ខែកញ្ញា ឆ្នាំ២០១៣ និងពីថ្ងៃទី១៥ ដល់ថ្ងៃទី១៧ ខែកញ្ញា ឆ្នាំ២០១៣ ក្នុងគោលបំណងទាមទារឲ្យមានការបង្កើតគណៈកម្មការឯករាជ្យមួយស៊ើបអង្កេត ភាពមិនប្រក្រតីនៃការបោះឆ្នោត កាលពីថ្ងៃទី២៨ ខែកក្កដា ឆ្នាំ២០១៣។
ប៉ុន្តែ គណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ច្រានចោលការទាមទារនេះ ដោយអះអាងថា ហួសនឹងក្របខណ្ឌច្បាប់៕
សូមសរសេរមកកាន់ លោក តាំង វីដា តាមរយៈ vida@vodhotnews.com
No comments:
Post a Comment