ដោយ៖ ដួង សុខា | ថ្ងៃសុក្រ ទី13 ខែកញ្ញា ឆ្នាំ2013, VOD
ស្តាប់សំឡេង៖ |
ចម្លងទុក |
លោក កឹម សុខា អនុប្រធានគណបក្សសង្គ្រោះជាតិ(រូបភាពពី flickr.com)
អនុប្រធានគណបក្សសង្គ្រោះជាតិ លោក កឹម សុខា
ដែលនឹងត្រូវចរចាជាមួយមេដឹកនាំកំពូលរបស់គណបក្សប្រជាជនកម្ពុជា
នៅថ្ងៃទី១៤ ខែកញ្ញា ក្រោមព្រះរាជធិបតីព្រះមហាក្សត្រ ឲ្យដឹងថា
គណបក្សនឹងបន្តទាមទារឲ្យបង្កើតគណៈកម្មការចម្រុះឯករាជ្យមួយ
ដោះស្រាយភាពមិនប្រក្រតីនៃការបោះឆ្នោត។ លោកអះអាងថា
គណបក្សនឹងមិនលើកពីការបែងចែកអំណាចទេ
ដរាបណាគណៈកម្មការនេះមិនត្រូវលើកយកមកពិភាក្សា
នៅចំពោះព្រះភក្ត្រព្រះមហាក្សត្រ។
វីអូឌី៖
តើគណបក្សយល់យ៉ាងណាចំពោះព្រះរាជសារព្រះមហាក្សត្រអញ្ជើញថ្នាក់ដឹកនាំ
កំពូលគណបក្សប្រជាជនកម្ពុជា និងគណបក្សសង្គ្រោះជាតិ
ចូលរួមប្រជុំក្រោមព្រះរាជធិបតីភាពរបស់ព្រះអង្គ
ដើម្បីដោះស្រាយបញ្ហាប្រទេសជាតិ?
លោក កឹម សុខា៖ យើងពិសោធន៍មើលក្នុងអាណត្តិមុនៗ
ពេលណាដែលមានភាពទាល់ច្រកខាងនយោបាយ
គឺកាលណាគ្មានសុឆន្ទៈរបស់គណបក្សកាន់អំណាច
ដើម្បីដោះស្រាយនយោបាយទេ ព្រះមហាក្សត្រលោកតែងតែតាំងជាអធិបតី
ជាអាជ្ញាកណ្តាល តាមរដ្ឋធម្មនុញ្ញរបស់យើង
ព្រោះព្រះរាជតួនាទីរបស់ព្រះមហាក្សត្រជាអាជ្ញាកណ្តាល
នៅក្នុងការឯកភាពជាតិ។ ឥទ្បូវនេះ គឺយើងឃើញថា គណបក្សប្រជាជន[កម្ពុជា
] ដែលចាញ់ឆ្នោត បែរតាំងខ្លូនថា ជាអ្នកឈ្នះ
ហើយប្រជាពលរដ្ឋគេអត់ព្រមទទួលយក។ ឥទ្បូវហ្នឹង
មានទំនាស់ធំណាស់ខាងនយោបាយនៅស្រុកខ្មែរ
ដោយសារគណបក្សប្រជាជនក្រាញអំណាច ដោយសារភាពប្រក្រតីនៃស្ថាប័នរដ្ឋ
ដូចជា គ.ជ.ប [គណៈកម្មាធិការជាតិរៀបចំការបោះឆ្នោត
] ជាដើម ធ្វើឲ្យប្រជាពររដ្ឋមានការមិនសប្បាយចិត្ត។
គម្រោងរបស់ប្រជាពលរដ្ឋ គឺធ្វើមហាបាតុកម្មធំ
ដូច្នេះហើយព្រះមហាក្សត្រលោកនឹងចេញមកធ្វើជាព្រះអាជ្ញាកណ្តាល។
ក៏ប៉ុន្តែ ជំហររបស់គណបក្សសង្គ្រោះជាតិ គឺយើងនៅខាងប្រជាពលរដ្ឋ។
យើងការពារឆន្ទៈរបស់ប្រជាពលរដ្ឋ យើងគោរពឆន្ទៈប្រជាពលរដ្ឋ។
តើប្រជាពលរដ្ឋខ្មែរចង់បានអ្វីបច្ចុប្បន្ននេះ?
ប្រជាពលរដ្ឋខ្មែរចង់បានយុត្តិធម៌ជុំវិញភាពមិនប្រក្រតីនៃ
ការបោះឆ្នោត។ ប្រជាពលរដ្ឋខ្មែរចង់បានការផ្លាស់ប្តូរ
មិនចង់នៅដដែលទេ។ ដូច្នេះហើយ គណបក្សសង្គ្រោះជាតិនៅខាងប្រជាពលរដ្ឋ
ទោះបីមានការជួបគា្នថ្នាក់កំពូលក្រោមអធិបតីភាពរបស់ព្រះមហាក្សត្រក៏
ដោយ ក៏ជំហររបស់គណបក្សសង្គ្រោះជាតិនៅដដែល
គឺការពារឆន្ទៈប្រជាពលរដ្ឋ រកយុត្តិធម៌ជូនប្រជាពលរដ្ឋ
ហើយទាមទារឲ្យមានការផ្លាស់ប្តូរនៅក្នុងសង្គមកម្ពុជាយើង។
នេះជាហើយជាជំហររបស់គណបក្សសង្គ្រោះជាតិ
ដែលយើងនឹងចូលជជែកគ្នាក្នុងក្របខណ្ឌហ្នឹង។
យើងនឹងមិនទៅជជែកពីរឿងចែកអំណាច
មុនរំលងឆន្ទៈប្រជាពលរដ្ឋជាដាច់ខាត។
យើងត្រូវការពារឆន្ទៈរបស់ប្រជាពលរដ្ឋសិន។ បើយើងរកទៅ
យើងទទួលស្គាល់ទាំងអស់គ្នា ថាប្រជាពលរដ្ឋបានឈ្នះហើយ
គណបក្សសង្គ្រោះជាតិបានឈ្នះហើយ
ទើបយើងឈានទៅរកជជែកគ្នាពីរឿងកែទម្រង់ប្រទេសជាតិបាន។
វីអូឌី៖ តើគណបក្សគ្រោងលើកបញ្ហាអ្វីខ្លះទូលថ្វាយព្រះមហាក្សត្រ ដើម្បីឲ្យព្រះអង្គព្រះរាជអន្តរាគមន៍ដោះស្រាយ?
លោក កឹម សុខា៖ ដូចខ្ញុំបានជម្រាបដដែល [យើង
]ទាមទារយុត្តិធម៌ ទាមទារបង្កើតគណៈកម្មការចម្រុះឯករាជ្យមួយ
ដើម្បីស្រាវជ្រាវពីភាពមិនប្រក្រតីនៃការបោះឆ្នោត
ដើម្បីការពារឆន្ទៈប្រជាពលរដ្ឋ ការពារសំទ្បេងឆ្នោតប្រជាពលរដ្ឋ។
ហ្នឹងហើយជាអ្វីចម្បងបំផុតដែលយើងត្រូវលើកទ្បើង។
វីអូឌី៖ ក្នុងការចរចានេះ
ប្រសិនបើសំណើរបស់គណបក្សសង្គ្រោះជាតិឲ្យបង្កើតគណៈកម្មការឯករាជ្យ
មួយស៊ើបអង្កេតពីភាពមិនប្រក្រតីនៃការបោះឆ្នោត
មិនត្រូវបានលើកយកមកពិភាក្សា តើគណបក្សសង្គ្រោះជាតិយល់ព្រមទេ?
លោក កឹម សុខា៖ ប្រសិនណាបើមិនមានគណៈកម្មការមួយឯករាជ្យ
ដើម្បីស៊ើបអង្កេតពីភាពមិនប្រក្រតីនៃការបោះឆ្នោតទេ
មាន័យថាការបោះឆ្នោតនេះ [យើង] រកការពិតមិនឃើញ។ មិនដឹងថាការពិតនោះខុសប៉ុណ្ណា ត្រូវប៉ុណ្ណា [យើង
] រកមិនឃើញ។ បើរកការពិតមិនឃើញទេ អ្នកណាអ្នកឈ្នះ?
គឺប្រជាពលរដ្ឋអ្នកឈ្នះ។ ប្រជាពលរដ្ឋណា?
ប្រជាពលរដ្ឋដែលចង់ឲ្យមានការផ្លាស់ប្តូរ។
ប្រជាពលរដ្ឋដែលគាំទ្រគណបក្សសង្គ្រោះជាតិ ជាអ្នកឈ្នះ។
អញ្ចឹងទាល់តែមានការទទួលស្គាល់ថា គណបក្សសង្គ្រោះជាតិឈ្នះ
ទើបអាចដោះស្រាយបញ្ហាហ្នឹងបាន។
វីអូឌី៖ គណបក្សរំពឹងថា
នឹងទទួលលទ្ធផលអ្វីខ្លះពីការប្រជុំរវាងថ្នាក់ដឹកនាំកំពូលគណបក្ស
ជាប់ឆ្នោតទាំងពីរ ក្រោមព្រះរាជាធិបតីភាពព្រះមហាក្សត្រ?
លោក កឹម សុខា៖ ក្តីប្រាថ្នារបស់យើងក្នុងជំនួបនេះ
គឺដើម្បីធ្វើយ៉ាងណារកយុត្តិធម៌ជូនប្រជាពលរដ្ឋ។ យ៉ាងហោចណាស់
ត្រូវទទួលស្គាល់ថា ការបោះឆ្នោតនេះមានភាពមិនប្រក្រតីយ៉ាងធ្ងន់ធ្ងរ
ហើយគណបក្សសង្គ្រោះជាតិទេ ដែលជាអ្នកឈ្នះ។
នេះហើយជាក្តីសង្ឃឹមរបស់យើង។
វីអូឌី៖
គណបក្សនឹងទួលថ្វាយព្រះមហាក្សត្រដូចម្តេចចំពោះព្រះរាជសាររបស់
ព្រះអង្គ ដែលគ្រោងកោះអញ្ជើញបេក្ខជនតំណាងរាស្ត្រជាប់ឆ្នោតទាំង១២៣រូប
ចូលប្រជុំរដ្ឋសភា នីតិកាលទី៥ លើកដំបូង នៅថ្ងៃទី២៣ ខែកញ្ញានេះ
ខណៈភាពតានតឹងនយោបាយមិនទាន់ត្រូវបានដោះស្រាយ?
លោក កឹម សុខា៖ គណបក្សបានផ្ញើលិខិតទៅទូលថ្វាយព្រះករុណា
តាំងពីមុនលោកយាងមកដល់ភ្នំពេញម្ល៉េះ។
យើងបានទូលថ្វាយសុំឲ្យលោកព្រះរាជអន្តរាគមន៍
ជុំវិញភាពមិនប្រក្រតីនៃការបោះឆ្នោត រកយុត្តិធម៌ជូនប្រជាពលរដ្ឋ
ជុំវិញការបោះឆ្នោតនេះសិន។ យើងបានបញ្ជាក់ក្នុងលិខិតនោះដែរថា
ដរាបណា មិនបានរកយុត្តិធម៌ជូនប្រជាពលរដ្ឋបានទេ គណបក្សសុំអធ្យាស្រ័យ
គឺយើងមិនអាចចូលរួមប្រជុំសភាជាមួយនឹងគណបក្សប្រជាជនបានទេ។
វីអូឌី៖
តើគណបក្សមានជំហរបែបណាចំពោះមហាបាតុកម្មអហិង្សាលើកទី២
ដែលគ្រោងធ្វើ នៅចុងសប្តាហ៍នេះ
ខណៈព្រះមហាក្សត្រកោះប្រជុំថ្នាក់ដឹកនាំកំពូលគណបក្សទាំងពីរ
ដើម្បីដោះស្រាយបញ្ហាប្រទេសជាតិ?
លោក កឹម សុខា៖ យើងត្រូវដឹងថា មហាបាតុកម្មដែលយើងគ្រោងធ្វើ នៅថ្ងៃទី១៥ ទី១៦ និង១៧ [ខែកញ្ញា] នេះ យើងធ្វើក្នុង[គោលបំណង]អ្វី? [យើងធ្វើ
] ក្នុងគោលបំណងរកយុត្តិធម៌ជូនប្រជាពលរដ្ឋ
ក្នុងគោលបំណងបង្កើតគណៈកម្មការមួយ
ស្រាវជ្រាវភាពមិនប្រក្រតីនៃការបោះឆ្នោត។ បើសិនណា
ការបង្កើតគណៈកម្មការនោះមិនទាន់បាន ភាពយុត្តិធម៌មិនទាន់បាន
បាតុកម្មយើងត្រូវតែធ្វើជាដាច់ខាត។ ប៉ុន្តែរហូតមកដល់ថ្ងៃនេះ
យើងអត់មានបានទទួលដំណោះស្រាយបង្កើតគណៈកម្មការចម្រុះ ដូច្នេះ
មានន័យថា យើងត្រូវតែធ្វើមហាបាតុកម្ម ថ្ងៃ១៥ ១៦ និង១៧
ជាដាច់ខាត។
វីអូឌី៖ ឯកឧត្តម មានន័យថា
ទោះបីមានព្រះរាជសារអញ្ជើញប្រជុំរបស់ព្រះមហាក្សត្រ
ក៏គណបក្សសង្គ្រោះជាតិ
នៅរក្សាជំហរធ្វើមហាបាតុកម្មអហិង្សាលើកទី២
នៅចុងសប្តាហ៍នេះដដែល?
លោក កឹម សុខា៖ បាទ មហាបាតុកម្មនេះ យើងធ្វើទៅតាមឆន្ទៈរបស់ប្រជាពលរដ្ឋ។ ដូច្នេះ យើងត្រូវតែធ្វើ ទោះបីមានការជួបប្រជុំគ្នា [រវាងមេដឹកនាំកំពូលនៃគណបក្សទាំងពីរ] បានដំណោះស្រាយប៉ុណ្ណា ក៏យើងត្រូវតែធ្វើ ដើម្បីប្រាប់ទៅប្រជាពលរដ្ឋថា ដោះ [ស្រាយបញ្ហា] ចេញ ឫមិនចេញ។ យើងដោះស្រាយ កម្រិតណា យើងត្រូវតែធ្វើ [មហាបាតុកម្ម
] ។ យើងអត់មានឈប់ទេ បាតុកម្មជាឆន្ទៈប្រជាពលរដ្ឋ។
ប្រជាពលរដ្ឋជាម្ចាស់នៃអំណាច ជាម្ចាស់នៃនយោបាយជាតិ។ ដូច្នេះ
យើងត្រូវតែធ្វើបាតុកម្មហ្នឹង។
វីអូឌី៖
ក្រសួងមហាផ្ទៃអនុញ្ញាតឲ្យគណបក្សសង្គ្រោះជាតិធ្វើមហាបាតុកម្មតែ
មួយថ្ងៃទេ គឺនៅថ្ងៃទី១៥ ខែកញ្ញា
និងមិនអនុញ្ញាតឲ្យដើរដង្ហែក្បួនបាតុកម្ម
ឬដង្ហែញត្តិតាមដងផ្លូវរាជធានីភ្នំពេញទេ។ តើគណបក្សយល់យ៉ាងណា?
លោក កឹម សុខា៖ យើងត្រូវគិតថា
ស្អីគេដែលធំជាងគេក្នុងសង្គមប្រជាធិបតេយ្យ? ឥទ្បូវ
យើងសួរទៅក្រសួងមហាផ្ទៃវិញ តើព្រះរាជាណាចក្រកម្ពុជាកាន់របបអ្វី?
បើ[កម្ពុជា] កាន់របបប្រជាធិបតេយ្យ ធំជាងគេ គឺឆន្ទៈប្រជាពលរដ្ឋ។
ប្រជាពលរដ្ឋជាម្ចាស់អំណាចទាំងអស់។
បើស្រុកខ្មែរជាស្រុកកុម្មុយនីស គឺវាស្រេចលើក្រសួងមហាផ្ទៃ
ឬរដ្ឋាភិបាលថាម៉េច ប្រជារាស្ត្រត្រូវធ្វើតាម។ ប៉ុន្តែ
បើរដ្ឋាភិបាលទទួលស្គាល់ថា រដ្ឋធម្មនុញ្ញខ្មែរ ប្រជាធិបតេយ្យ
ត្រូវលើកឆន្ទៈប្រជាពលរដ្ឋជាធំ។ បើប្រជាពលរដ្ឋចង់ធ្វើ [បាតុកម្ម]
គឺយើងត្រូវគោរពឆន្ទៈរបស់ប្រជាពលរដ្ឋ។ ក្រសួងមហាផ្ទៃ រដ្ឋាភិបាល
សមត្ថកិច្ច មានកាតព្វកិច្ចការពារសិទ្ធិរបស់ប្រជាពលរដ្ឋ។
ក្រសួងមហាផ្ទៃត្រូវពិចារណាទ្បើងវិញ បើលោកចង់កំណត់សិទ្ធិសេរីភាព។
បើលោកចង់កំណត់សិទ្ធិសេរីភាពរបស់ប្រជាពលរដ្ឋ
ឲ្យធ្វើបាតុកម្មតែប៉ុណ្ណេះ ឬប៉ុណ្ណោះ គឺវាទៅមិនរួចទេ៕
សរសេរមកកាន់លោក ដួង សុខា តាមរយៈ duong.sokha@vodhotnews.com
No comments:
Post a Comment