ដោយ៖ បូ សាវី | ថ្ងៃអាទិត្យ ទី25 ខែសីហា ឆ្នាំ2013 | VoD
លោក សម រង្ស៊ី ជួបប្រជាពលរដ្ឋនៅម្តុំផ្សារ ខេត្តសៀមរាប (រូបថត បូ សាវី)
ថ្នាក់ដឹកនាំគណបក្សសង្គ្រោះជាតិ នៅព្រឹកថ្ងៃអាទិត្យនេះ
ថ្លែងប្រាប់ប្រជាពលរដ្ឋនៅខេត្តសៀមរាប ថា គណបក្សខ្លួនឈ្នះឆ្នោត
ហើយប្តេជ្ញាថា នឹងរកមធ្យោបាយការពារជ័យជម្នះ
ដែលប្រជាពលរដ្ឋគាំទ្រ។
ការថ្លែងបែបនេះ ធ្វើឡើងនៅក្នុងពិធីបួងសួង
នៅខាងមុខប្រាសាទអង្គរវត្ដ និងនៅប្រាសាទអង្គរធំ
ដោយសូមឲ្យបារមីស័ក្ដិសិទ្ធិ នៃអតីតព្រះមហាក្សត្រខ្មែរសម័យអង្គរ
ឲ្យជួយរកភាពយុត្ដិធម៌ដល់ម្ចាស់ឆ្នោត ដោយចោទថា
សំឡេងឆ្នោតដែលប្រជាពលរដ្ឋបោះឆ្នោត ឲ្យគណបក្សប្រឆាំង កាលពីថ្ងៃទី២៨
ខែកក្កដា មានការលួចបន្លំ។
ប្រធានគណបក្សសង្គ្រោះជាតិលោក សម រង្ស៊ី មានប្រសាសន៏ថា
លទ្ធផលបោះឆ្នោតគណបក្សនេះ កំពុងទទួលបាន៩០%ហើយ។ លោកបូងសួង
ឲ្យបារមីព្រះមហាក្សត្រ សម័យមុន
ជួយរកសំឡេងឆ្នោតរបស់ប្រជាពលរដ្ឋគាំទ្រគណបក្សប្រឆាំង១០%ទៀត
ដែលបាត់បង់ ដោយសារការលួចបន្លំ ដោយគណបក្សប្រជាជនកម្ពុជា។
កន្លងមក គណបក្សសង្គ្រោះជាតិ អះអាងថា ខ្លួនទទួលបានសំឡេងគាំទ្រ ៦៣អាសនៈ
គណបក្សប្រជាជន ទទួលបាន ៦០អាសនៈ។ ចំណែកឯ គណបក្សប្រជាជនកម្ពុជាវិញ
ក៏បានអះអាងថា ខ្លួនទទួលបានសំឡេងគាំទ្រ ៦៨អាសនៈ ហើយគណបក្សសង្គ្រោះជាតិ
ទទួលបាន៥៥អាសនៈ។
លោក កឹម សុខា ជួបប្រជាពលរដ្ឋនៅខាងមុខប្រាសាទអង្គរ
ថ្មីៗនេះ គណបក្សប្រជាជនកម្ពុជា ក៏ធ្លាប់ចេញសេចក្តីប្រកាសព័ត៌មាន
ច្រានចោលរាល់ការចោទប្រកាន់ថា គណបក្សខ្លួនប្រើប្រាស់ គ.ជ.ប
ដើម្បីលួចសន្លឹកឆ្នោត។ គណបក្សប្រជាជនកម្ពុជា ក៏បង្ហាញជំហរ
ចរចាជាមួយគណបក្សសង្គ្រោះជាតិ
ដើម្បីដោះស្រាយភាពមិនប្រក្រតីនានាក្នុង
ពេលបោះឆ្នោតដោយសន្តិវិធីដែរ។ តែរហូតដល់ ថ្ងៃទី២៥ ខែសីហានេះ
គណបក្សទាំងពីរមិនទាន់ ឯកភាពគ្នា
ក្នុងការបង្កើតគណៈកម្មការដោះស្រាយភាពមិនប្រក្រតីនៅឡើយទេ។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ យល់ឃើញថា
ដើម្បីទម្លាយភាពទាល់ច្រកផ្នែកនយោបាយនេះ គឺ លោក សម រង្ស៊ី
ប្រធានគណបក្សសង្គ្រោះជាតិ ជាបេក្ខភាព នាយករដ្ឋមន្ត្រី និងលោក ហ៊ុន សែន
អនុប្រធានគណបក្សប្រជាជនកម្ពុជា ជាបេក្ខភាពនាយករដ្ឋមន្ត្រីដែរនោះ
ត្រូវជួបគ្នាចរចា ដើម្បីរកដំណោះស្រាយ។
មាត្រា៨២ថ្មីនៃរដ្ឋធម្មនុញ បានចែងថា រដ្ឋសភាបើកសម័យប្រជុំដំបូង
ហុកសិបថ្ងៃយ៉ាងយូរ ក្រោយពេលបោះឆ្នោត
តាមការកោះប្រជុំរបស់ព្រះមហាក្សត្រ។ បើគិតរយៈពេល៦០ថ្ងៃ
សម័យប្រជុំសភាដំបូង អាចនឹងចាប់ផ្តើមនៅ ចុងខែកញ្ញា
តែគណបក្សសង្គ្រោះជាតិ ធ្លាប់បង្ហាញជំហរថា
នឹងមិនចូលរួមប្រជុំនោះទេ ប្រសិនបើមិនមានដោះស្រាយភាពមិនប្រក្រតី
អំឡុងពេលបោះឆ្នោត ដើម្បីរកយុត្តិជូនប្រជាពលរដ្ឋនោះ៕
សូមសរសេរមកកាន់ លោក បូ សាវី តាមរយៈ savy@vodhotnews.com
No comments:
Post a Comment