Interior Minister Sar Kheng waits for a request from the CNRP to to negotiate លោក ស ខេង រង់ចាំ​ការស្នើសុំ​ចរចា​របស់​គណបក្ស​សង្គ្រោះ​ជាតិ​

ដោយ៖​ ឡាយ សាមាន​ | ថ្ងៃអង្គារ៍ ទី27 ខែសីហា ឆ្នាំ2013 VoD

រដ្ឋមន្ត្រីក្រសួង​មហាផ្ទៃ លោក ស ខេង​(រូបភាពពី interior.gov.kh)

​ រដ្ឋមន្ត្រីក្រសួង​មហាផ្ទៃ លោក ស ខេង និង​ជា​ថ្នាក់​ដឹកនាំ​ក្រុម​ជំនាញ​ចរចា​រក​ដំណោះស្រាយ​ជាមួយ​គណបក្ស​ សង្គ្រោះ​ជាតិ ឲ្យដឹង​នៅ​ថ្ងៃ​អង្គារ​នេះ​ថា លោក​នឹង​ចូលរួម​ចរចា​ជាមួយ​គណបក្ស​ប្រឆាំង ប្រសិនបើ​មាន​ការស្នើ​ជា​ផ្លូវការ​ជាក់លាក់​មួយ ពី​ថ្នាក់ដឹកនាំ​គណបក្ស​។​

​លោក ស ខេង ថ្លែង​បែប​នេះ​ជា​ការឆ្លើយតប​នឹង​ការលើកឡើង​របស់​ប្រធាន​គណបក្ស​សង្គ្រោះ​ ជាតិ លោក សម រង្ស៊ី ដែល​បាន​លើក ឡើង​កាលពី​ថ្ងៃ​ចន្ទ ជា​លក្ខណៈ​រិះគន់ថា គណបក្ស​ប្រជាជន​កម្ពុជា មិន​បញ្ជូន​អ្នកចរចា​ជាន់ខ្ពស់ ដែល​មាន​សិទ្ធិ​សម្រេច​។​

​លោក ស ខេង ប្រាប់​VOD​ថា លោក សម រង្ស៊ី មិនគួរ​ថ្លែង​តាម​សន្និសីទ​សារព័ត៌មាន​ទេ គួរតែ​មាន​ការប្រាស្រ័យ​ទាក់ទង​គ្នា តាមរយៈ​លោក ព្រំ សុខា មក​ពី​ខាង​គណបក្ស​ប្រជាជន​កម្ពុជា និង លោក យឹម សុវណ្ណ មក​ពី​ខាង​គណបក្ស​សង្គ្រោះ​ជាតិ​។  លោក ស ខេង បានបញ្ជាក់​ថា​៖«​ខ្ញុំ​មាន​ត្រង់​ស៊ី​ប​មួយ​របស់​ខ្ញុំ គឺ​ថា​ធ្វើ​អី​ដែល​មិន​ជាក់លាក់ ខ្ញុំ​មិន​អាច​ធ្វើបាន​ទេ​»​។​

ក្នុង​សន្និសីទ​សារព័ត៌មាន​កាល​ពី​ថ្ងៃ​ ចន្ទ លោក​សម រង្ស៊ី មានប្រសាសន៍ថា គណបក្ស​សង្គ្រោះ​ជាតិ​នៅតែ​មាន​ជំហរ​ក្នុង​ការចចារ​ជាមួយ​គណបក្ស​ប្រជាជន​​ កម្ពុជា ប៉ុន្តែ​គណបក្សកាន់អំណាច ត្រូវ​បញ្ជូន​មន្ត្រី​ដែល​មាន​សិទ្ធិ​សម្រេច​​លើ​កិច្ចចរចារ​នេះ ដើម្បីឲ្យ​ទទួលបានល​ទ្ធ​ផល​។ លោក​ថា គណបក្ស​​​ប្រជាជន ដូច​ជា​លេងសើច ដោយ​យក​មនុស្ស​មិន​អាច​សម្រេច​អ្វី​បាន មក​ចរចា​។​

​ប្រធាន​មជ្ឈមណ្ឌល​សិទ្ធិមនុស្ស​កម្ពុជា លោក អ៊ូ វីរៈ សរសេរ​នៅលើ​ហ្វេ​ស​ប៊ុកខ្លួន​ថា វា​ជា​ពេលវេលា​សម្រាប់​មេដឹកនាំ​នៃ​គណបក្ស​ប្រជាជន​កម្ពុជា ដឹក​នាំ​​ដោយ​​ លោក​​ស ខេង និង​គណបក្ស​សង្គ្រោះ​ជាតិ ដឹកនាំ​ដោយ​លោក​កឹម សុខា ជួបគ្នា ហើយ​របៀបវារៈ​នៃ​ការពិភាក្សា គឺ​ការស៊ើបអង្កេត​ភាព​មិន​ប្រក្រតី កំណែ​ទម្រង់ និង​​ការ​ចែករំ​លែក​​អំណាច​​មួយ ដើម្បី​បង្កើត​ការត្រួតពិនិត្យ និង​តុល្យភាព​។​

​ឯកអង្គ​រដ្ឋទូត​អាមេរិក​ប្រចាំ​កម្ពុជា លោក William E. Todd សរសេរ​នៅលើ​ប្លុក​របស់​ខ្លួន​ថា លោក​ជឿជាក់​ថា នេះ​ជា​ឱកាស​មួយ​សម្រាប់​គណបក្ស​ទាំង​ពីរ ធ្វើការ​រួមគ្នា​និង​យល់ព្រម​លើ​កំណែ​ទម្រង់​​សេដ្ឋកិច្ច​និង​ប្រជាធិបតេយ្យ ​។ លោក William E. Todd  បញ្ជាក់ថា​ ៖« វា​នៅតែ​ជា​ការ​សំខាន់​ចាំបាច់ ដែល​ភាគី​​ទាំង​​ពីរ​​ត្រូវ​​ត្រឡប់​​មក​តុ​ចរចា ហើយ​ធ្វើការ​ជាមួយ​​គ្នា​ដើម្បី​សំរេចបាន​នូវ​លទ្ធផល​មួយ ដែល​បម្រើ​ឧត្តមប្រយោជន៍​របស់​ប្រជាជន​កម្ពុជា​។ ខ្ញុំ​សង្ឃឹមថា​ភាគី​ទាំងពីរ​អាច ជំនះបាន​លើ​ការ​ខ្វែង​គំនិត​​គ្នា អនុវត្ត​ដំណើរការ​ស៊ើបអង្កេត​ប្រកបដោយ​តម្លាភាព​និង​យុត្តិធម៌ ហើយ​​ដើរ ទៅ​មុខ​ជាមួយ​របៀបវារៈ​កែទម្រង់ ដែល​ផ្តល់​ប្រយោជន៍​ដល់​ប្រទេស​កម្ពុជា​»​។​

​គួរបញ្ជាក់​ថា ចាប់ពី​ការបោះឆ្នោត​ថ្នាក់​ជាតិ​នីតិកាល​ទី​៥ បានបញ្ចប់ មន្ត្រី​គណបក្ស​សង្គ្រោះ​ជាតិ និង​គណបក្ស​ប្រជាជន​កម្ពុជា បាន​ជួប​ច​ចារ​គ្នា ចំនួន​បី​​លើក​​រួចមកហើយ ប៉ុន្តែ​មិន​ទទួលបាន​លទ្ធផល​អ្វី​នៅឡើយ​ទេ រហូត​មក​ក​ដល់ពេល​នេះ​៕

​សរសេរ​មកកាន់ លោក ឡាយ សា​មាន តាមរយៈ ​laysamean168@yahoo.com