Analysts: The opposition should request the government to send all soldiers back into their barracks អ្នកវិភាគ​៖​ បក្សប្រឆាំង​គួរ​ស្នើរដ្ឋាភិបាលឲ្យ​បញ្ជូន​កងទ័ព​ចូល​បន្ទាយ​វិញ​

ដោយ៖​ ថុល ស្រី​លក្ខណ៍​ | ថ្ងៃចន្ទ័ ទី12 ខែសីហា ឆ្នាំ2013, VOD

ស្តាប់សំឡេង៖​

ចម្លងទុក

​អ្នកវិភាគយល់ថា គណបក្សប្រឆាំង​គួរអំពាវនាវ​ឲ្យ​រដ្ឋាភិបាល​ បញ្ជូន​កងកំលាំង​ប្រដាប់អាវុធ​ទៅបន្ទាយ​វិញ ដោយ​ជៀសវាង​អំពាវនាវ​ឲ្យ​ពួកគេ​ចូលរួម​មហា​បាតុកម្ម ដែល​ខ្លួន​គ្រោង​ធ្វើ​នៅពេល​ខាងមុខ ដើម្បី​ប្រឆាំង​លទ្ធផល​ឆ្នោត​។​

ការលើកឡើង​របស់​អ្នកវិភាគ​នៅពេលនេះ​ ធ្វើឡើង​បន្ទាប់​ពីប្រធាន​គណបក្ស​សង្គ្រោះ​ជាតិ លោក សម រង្ស៊ី  កាលពី​ថ្ងៃ​សុក្រ​សប្តាហ៍​មុន បាន​សរសេរ​នៅក្នុង​ហ្វេ​សប៊ុ​ក​របស់​លោក អំពាវនាវ​ឲ្យ​កង​កំ​លាំ​ប្រដាប់អាវុធ ទាំងអស់​ចូលរួម​ជាមួយ​ប្រជាពលរដ្ឋ និង​យុវជន​ស្នេហា​ជាតិ ដើម្បី​ប្តូរ​មេដឹកនាំ​ចាស់​ចេញ​។ ការអំពាវនាវ​នេះ ត្រូវបាន​មន្ត្រី​រដ្ឋាភិបាល​ចាត់ទុកថា ជាការ​ញុះញង់​ឲ្យមាន​ការបះបោរ នៅក្នុង​ជួរ​កងទ័ព​ទៅវិញ​។​

អ្នកវិភាគ​ឯករាជ្យ​លោក ឡៅ ម៉ុង ហៃ មានប្រសាសន៍ថា  នេះ​មិនមែន​ជា​ពេល​សមរម្យ​ទេ ដែល​លោក សម រង្ស៊ី អំពាវនាវ​ឲ្យ​កងកំលាំងប្រដាប់អាវុធ​ ចូលរួម​បាតុកម្មអហិង្សា​ជាមួយ​ខ្លួន​។ លោក​យល់ថា បក្សប្រឆាំង​គួរតែ​អំពាវនាវ ឲ្យ​រដ្ឋាភិបាល​បញ្ជូន​កងទ័ព​ទាំងនោះ​ទៅ​បន្ទាយ​វិញ ព្រោះ​មិនមែន​ជា​ពេល​ដែល​ត្រូវ​ចល័ត​ទ័ព ឬ​ប្រើ​កង​ទ័ព​នោះទេ ហើយ​ថា​ជា​ពេល​ដែល​ត្រូវ​ជជែក​គ្នា​ដោយ​សន្តិវិធី​ ៖ “​អ្នក​ដែល​ ទទួលខុសត្រូវ​នឹង​ការនាំ​ទ័ព​ចេញ ក្រៅ​បន្ទាយ​នេះ​គួរតែ ពិនិត្យមើល​ស្ថានភាព​នេះ​ឡើង​វិញ ហើយ​គួរតែ​បញ្ជូន​កងទ័ព ត្រឡប់​ទៅ​ចូល​បន្ទាយ​វិញ​ទៅ ហើយ​ការទទួលខុសត្រូវ សណ្តាប់ធ្នាប់​អី​នេះ ទុក​បន្ទុក​ទៅលើ​នគរបាល​ជាតិ​យើង​នេះ បាន​ហើយ​”​។​

លោក ឡៅ ម៉ុងហៃ បន្ថែមថា កន្លងមក​ដូចជា ក្នុង​កិច្ចប្រជុំ​អាស៊ាន ព្រះ​បរមសព​ព្រះមហាវីរក្សត្រ នរោត្តម សីហនុ ក៏​មាន​មនុស្ស​ជាច្រើន​ប្រមូលផ្តុំ​គ្នា​ដែរ តែ​រដ្ឋាភិបាល​មិន​បាន​ប្រើ​កងទ័ព​ដើម្បី​ការពារ​នោះទេ​។​

ចំណែក​លោក​ស្រី ជា វណ្ណាត មានប្រសាសន៍ថា ចំពោះ​ការលើកឡើង​នូវពេលនេះ ហាក់ដូចជា​មិន​មាន​អ្វី​ប្លែក​ទេ​។ លោក​ស្រី​ថា នេះ​ជា​សិទ្ធិ​ក្នុង​ការបញ្ចេញមតិ របស់​គណបក្ស​នយោបាយ សំខាន់​ប្រើ​កុំឲ្យ​មាន​ភាពវឹកវរ​ ៖ “​ដើម្បី​ដឹង​នាំ​ប្រទេស ការនិយាយ​អញ្ចឹងៗ ជាការ​ធម្មតា​ដូច​ខ្ញុំ​នៅ​ស្រុក​ខ្មែរ មើល​ទូរទស្សន៍ ស្តាប់​វិទ្យុ ទៅ​ឮ​តែ​ប្រើ​ពាក្យសម្តី​អញ្ចឹងៗ សឹង​ថា​ស្រុក​ខ្មែរ​ពោរពេញ​ទៅដោយ សេរីភាព​ក្នុង​ការបញ្ចេញមតិ ជាពិសេស​ពី​សំណាក់​អ្នកនយោបាយ ម្ល៉ោះហើយ​ចំពោះ​ខ្ញុំៗ យល់ឃើញ​ថា​ធម្មតា​”​។​

គួរ​បញ្ជាក់ដែរថា ចាប់តាំងពី​ថ្ងៃ​ព្រហស្បតិ៍ សប្តាហ៍​មុនមក​ គេ​ឃើញ​មាន​ដឹក​រថពាសដែក ឡាន​ដឹក​លួស​បន្លា និង​មាន​ដាក់​រាយ​កងកំលាំងប្រដាប់អាវុធ នៅ​រាជធានី​ភ្នំពេញ តាម​បណ្តា​ខេត្ត​មួយចំនួន ត្រៀម​ជា​ស្រេច​ចាំ​ការពារ​សន្តិសុខ​សណ្តាប់ធ្នាប់ ខណៈ​គណបក្សប្រឆាំង​ព្រមាន​ធ្វើបាតុកម្ម​ទូទាំង​ប្រទេស ប្រឆាំង​លទ្ធផល​ឆ្នោត​៕

សូមសរសេរមកកាន់អ្នកនាង ថុល ស្រីលក្ខណ៍ តាមរយៈ sreyleak@vodhotnews.com

- See more at: http://vodhotnews.com/?p=article&id=15309&lang=kh#sthash.S7QxLtof.dpuf