គណៈកម្មាធិការប្រព្រឹត្តិកម្ម(CHRAC)
គណៈកម្មាធិការខុមហ្វ្រែល(COMFREL) និងគណៈកម្មាធិការនិកហ្វិច(NICFEC)
នៅថ្ងៃសុក្រនេះ
ថ្កោលទោសចំពោះការរារាំងវេទិកាជួបជុំផ្លាស់ប្តូរពត៌មាន
រវាងប្រជាពលរដ្ឋ តំណាងរាស្ត្រ និងក្រុមប្រឹក្សាឃុំ ក្នុងខេត្តបាត់ដំបង
ស្តីអំពី “ដំណើរការបោះឆ្នោតក្នុងប្រទេសកម្ពុជា”
ដែលរៀបចំឡើងដោយមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ
(CCIM)។
ការថ្កោលទោសរបស់អង្គការសង្គមស៊ីវិលនេះ ធ្វើទ្បើង
បន្ទាប់ពីកាលពីព្រឹកថ្ងៃទី២២ ខែសីហានេះ
កម្លាំងនគរបាលក្រុងបាត់ដំបង ប្រមាណជា ៤០នាក់ ប្រដាប់ដោយខែល និងដំបង
បានឈរនៅមុខកន្លែងរៀបចំវេទិកា ដែលមានទីតាំងនៅភូមិអង់
សង្កាត់អូចារ ក្រុងបាត់ដំបង ខេត្តបាត់ដំបង
ហើយបានរារាំងមិនឲ្យប្រជាពលរដ្ឋចូលរួមផ្លាស់ប្តូរយោបល់
និងសំដែងមតិក្នុងវេទិកានេះទេ ដោយរួមទាំង អ្នកស្រី មួរ សុខហួរ
អ្នកតំណាងរាស្ត្រជាប់ឆ្នោតខាងគណបក្សសង្គ្រោះជាតិផងដែរ។
ការរារាំងនេះបានធ្វើឲ្យមានការប៉ះទង្គិចគ្នារវាងប្រជាពលរដ្ឋ
និងកងកម្លាំងនគរបាល តែមិនបណ្តាលឲ្យមានរបួសធ្ងន់ធ្ងរទេ។
សេចក្តីថ្លែងការណ៍រួមរបស់អង្គការទាំងបី ចេញផ្សាយ
នៅថ្ងៃទី២៣ ខែសីហានេះ ចាត់ទុក ទង្វើរបស់កងកម្លាំងនគរបាល
ដែលបានរារាំងប្រជាពលរដ្ឋ
ថាជាការរំលោភទៅលើសិទ្ធិសេរីភាពក្នុងការជួបជុំ
ដែលនាំឲ្យប៉ះពាល់យ៉ាងធ្ងន់ធ្ងរ
ដល់សិទ្ធិសេរីភាពក្នុងការសំដែងមតិរបស់ប្រជាពលរដ្ឋ
ដែលច្បាប់បានការពារ។
សេចក្តីថ្លែងការណ៍ បន្តថា ការជួបជុំរបស់ប្រជាពលរដ្ឋ
គឺមានសារៈសំខាន់ណាស់
ក្នុងការលើកស្ទួយប្រជាធិបតេយ្យនៅក្នុងប្រទេសកម្ពុជា។ ការរារាំង
ប្រជាពលរដ្ឋមិនឲ្យចូលរួមវេទិកានៅក្នុងខេត្តបាត់ដំបងនេះ
ជាសញ្ញាមួយក្នុងការគំរាមកំហែងដល់ប្រជាពលរដ្ឋផ្សេងទៀតមិនឲ្យចូលរួម
នៅពេលមានវេទិកា ក្រោយៗទៀត។
ដើម្បីលើកស្ទួយសិទ្ធិមនុស្ស
និងលទ្ធិប្រជាធិបតេយ្យនៅក្នុងប្រទេសកម្ពុជា អង្គការសង្គមស៊ីវិល
សំណូមពរដល់រាជរដ្ឋាភិបាល ណែនាំ និងដាក់ទណ្ឌកម្មដល់កងកម្លាំងនគរបាល
ដែលបានបង្កការរំខានដល់ដំណើរការជួបជុំនេះ។
អង្គការសង្គមស៊ីវិល ក៏សូមឲ្យរាជរដ្ឋាភិបាល
ក្នុងឋានៈជាប្រទេសហត្ថលេខី នៃសន្ធិសញ្ញាសិទ្ធិមនុស្ស
ត្រូវគោរពកាតព្វកិច្ចឲ្យបានម៉ឺងម៉ាត់
ជាពិសសេសការលើកកម្ពស់សេរីភាពក្នុងការជួបជុំ បញ្ចេញមតិ
និងសេរីភាពក្នុងការបង្កើតសមាគម
ដែលជាប្រភពដ៏សំខាន់នៃការបណ្តុះបណ្តាល
និងការអនុវត្តន៍លទ្ធិប្រជាធិបតេយ្យ នៅកម្ពុជាយើង៕
សូមសរសេរមកកាន់ លោក ដួង សុខា តាមរយៈ duong.sokha@vodhotnews.com
No comments:
Post a Comment