ផ្ទះលោកអៀង សារី នៅម៉ាឡៃ ខេត្តបន្ទាយមានជ័យ ដែលកំពុងរៀបចំធ្វើពិធីបុណ្យសព លោកអៀង សារី Ieng Sary's house in Malia district in Banteay Meanchey. More pictures below.(ថ្ងៃទី 14 មីនា 2013,) | ដោយ: សូផុន CEN
ខេត្តបន្ទាយមានជ័យ:
សពលោក អៀង សារី អតីតរដ្ឋមន្ត្រីការបរទេសខ្មែរក្រហម
ត្រូវបានដឹកតាមឡាន យកទៅធ្វើបុណ្យ នៅផ្ទះរបស់លោក ក្នុងភូមិដូង
ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។ នៅទីនោះ
គឺជាអតីតទឹកដីតស៊ូរបស់ខ្មែរក្រហម
តាំងពីកកើតរដ្ឋាភិបាលចម្រុះត្រីភាគី រហូតដល់លោក អៀង សារី
ដឹកនាំកម្លាំងខ្មែរក្រហម ផ្តាច់ខ្លួន
មករួបរួមជាមួយរាជរដ្ឋាភិបាលកម្ពុជា។
តាមអតីតខ្មែរក្រហម
ផ្ទះរបស់លោកអៀងសារី នៅម៉ាឡៃ ជាអតីតតំបន់តស៊ូរបស់លោក
ក្រោយពីខ្មែរក្រហមដួលរលំ នៅឆ្នាំ១៩៧៩។ នៅទីនោះ
ក៏ជាអតីតកន្លែងប្រកាសសារតាំង នៃការបង្កើតរដ្ឋាភិបាលចម្រុះត្រីភាគី
ដែលមានភាគីកម្ពុជាប្រជាធិបតេយ្យខ្មែរក្រហម
ភាគីរណសិរ្សរំដោះប្រជាពលរដ្ឋខ្មែរ របស់សម្តេច សឺនសាន
និងភាគីរណសិរ្សហ្វ៊ុនស៊ិនប៉ិច ដឹកនាំដោយអតីតព្រះមហាវីរក្សត្រ
សម្តេចព្រះ នរោត្តម សីហនុ នៅឆ្នាំ១៩៨២។
ម៉ាឡៃ
នៅជាប់ព្រំដែនថៃ ក៏ជាកន្លែងអតីតទាហានខ្មែរក្រហម ផ្តាច់ខ្លួន
ធ្វើសមាហរណកម្ម ដែលដឹកនាំដោយលោក អៀង សារី
មករួបរួមជាមួយរាជរដ្ឋាភិបាល នៅឆ្នាំ១៩៩៦។
ចំណែកលោក អៀង វុធ
កូនប្រុសរបស់លោក អៀង សារី បានប្រាប់អ្នកកាសែតថា ការនាំយកសពលោក អៀង សារី
ទៅធ្វើបុណ្យ និងបូជា នៅផ្ទះឯស្រុកម៉ាឡៃ ដោយសារតែជាបំណងរបស់លោក
អៀង សារី ផង ហើយមួយវិញទៀត ដោយសារតែក្នុងសម័យតស៊ូ គឺលោក អៀង សារី
រស់នៅទីតាំងនៅម៉ាឡៃរហូតមក។
នៅផ្ទះរបស់លោក អៀង សារី
នៅម៉ាឡៃ រហូតដល់ព្រលប់ថ្ងៃទី១៤ ខែមីនា ឆ្នាំ២០១៣ ត្រូវបានគេរៀបចំ
សង់រោងបុណ្យ ដើម្បីប្រារព្ធពិធីបុណ្យសពលោកអៀងសារី តាមប្រពៃណី។
ភ្លៀងមួយមេធំ ក៏បានកើតឡើងនៅពេលព្រលប់ផងដែរ។
លោក ឌឹម សុខ
មេឃុំម៉ាឡៃ ក៏បានចូលរួមរៀបចំទទួលសពលោក អៀងសារី ដែលដឹកនាំតាមឡាន
ហើយអាចនឹងទៅដល់ នៅពាក់កណ្តាលយប់ ថ្ងៃទី១៤ ខែមីនា ឆ្នាំ២០១៣។
អតីតកម្មាភិបាលខ្មែរក្រហម នៅម៉ាឡៃ និងមកពីគ្រប់ទិសទី ភាគច្រើន បានសម្តែងការសោកស្តាយចំពោះមរណភាពរបស់លោកអៀងសារី។
គុណសម្បត្តិរបស់លោក អៀង សារី ក៏ត្រូវបានអតីតកម្មាភិបាលខ្មែរក្រហម
លើកឡើងផងដែរថា លោក អៀងសារី បានចូលរួមការពារបូរណភាពទឹកដី
និងកសាងសង្គមកម្ពុជាស្អាតស្អំ។ លោកអៀងសារី
ក៏ជាអ្នកធ្វើសមាហរណកម្ម កងកម្លាំងខ្មែរក្រហម
ដែលនាំឲ្យប្រទេសកម្ពុជា មានសុខសន្តិភាព និងការផ្សះផ្សារជាតិ
រហូតមកដល់សព្វថ្ងៃ។
កូនចៅរបស់លោក អៀង សារី
ក៏បានទៅជួបជុំនៅផ្ទះបុណ្យ ក្នុងឃុំម៉ាឡៃ ស្រុកម៉ាឡៃ ផងដែរ។ លោក
អៀងសារី មានកូន ៤ នាក់ ( ស្រី ៣ ប្រុស១ ) រស់នៅខេត្តប៉ៃលិន។
កូនស្រីចម្បងឈ្មោះ អៀង ម៉ិញ។ កូនស្រីទី២ ឈ្មោះ អៀង នាថ។ ទី៣-លោក
អៀង វុធ ដែលសព្វថ្ងៃ ជាអភិបាលរងខេត្តប៉ៃលិន និងកូនស្រីទី៤ ឈ្មោះ
អៀង រ៉ា។
លោក អៀង សារី បានទទួលមរណភាព កាលពីព្រឹកម៉ោង ៨
និង ៤៥ នាទី ព្រឹកថ្ងៃទី១៤ ខែមីនា ឆ្នាំ២០១៣ នៅមន្ទីរពេទ្យរុស្ស៊ី
ក្នុងទីក្រុងភ្នំពេញ។ រហូតដល់ម៉ោង ៣ រសៀល ទើបសាកសពរបស់លោកអៀងសារី
ត្រូវបានដឹកតាមឡានពេទ្យ ចេញពីមន្ទីរពេទ្យរុស្ស៊ី
បន្ទាប់ពីគ្រូពេទ្យជំនាញ និងសហព្រះរាជអាជ្ញាតុលាការខ្មែរក្រហម
បានពិនិត្យសាកសព ហើយបញ្ជាក់ថា លោកអៀងសារី អាយុ ៨៧ ឆ្នាំ ស្លាប់
ដោយជំងឺបេះដូង។
មរណភាពរបស់លោក អៀង សារី
ក៏ត្រូវបានសហព្រះរាជអាជ្ញា និងលោកចៅក្រម និល ណុន
ប្រធានអង្គជំនុំជម្រះសាលាដំបូង របស់តុលាការខ្មែរក្រហម
បានប្រកាសភ្លាមៗថា បទចោទប្រកាន់លើលោក អៀង សារី នៅសម័យខ្មែរក្រហម
ក៏ត្រូវរលត់ផងដែរ៕
A trench inside the compound of Ieng Sary's house.ត្រង់សេ នៅក្នុងផ្ទះលោកអៀង សារី
ត្រង់សេ នៅក្នុងផ្ទះលោកអៀង សារី
Malai District Hall សាលាស្រុកម៉ាឡៃ
56 year-old Pich Vann, Ieng Sary's bodyguard in Malai district. លោក ពេជ្រ វណ្ណ អាយុ ៥៦ឆ្នាំ ជាអតីតកងការពារលោក អៀង សារី នៅមណ្ឌលសារតាំងម៉ាឡៃ
61 year-old Keo Mony, aka Reaksmey, who is Ieng Sary's nephew and who is a caretaker of Ieng Sary's house in Malia district. លោកកែវ មុនី ហៅរស្មី អាយុ៦១ឆ្នាំ ជាក្មួយលោកអៀង សារី ដែលនៅនៅចាំ និងមើលថែផ្ទះឲ្យលោក អៀង សារី នៅម៉ាឡៃ
No comments:
Post a Comment