A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Friday 21 December 2012

The Cambodia National Rescue Party urges the government to reform the judicial system បក្ស​សង្គ្រោះ​ជាតិ​ជំរុញ​ឲ្យ​រដ្ឋាភិបាល​កែ​ទម្រង់​ប្រព័ន្ធ​យុត្តិធម៌​បច្ចុប្បន្ន

ដោយ ម៉ម មុនីរតន៍ 2012-12-21 RFA
គណបក្ស​សង្គ្រោះ​ជាតិ ជំរុញ​ឲ្យ​រដ្ឋាភិបាល​ត្រូវ​ធ្វើ​កំណែ​ទម្រង់​ប្រព័ន្ធ​តុលាការ​ដែល​មាន​នៅ​ក្នុង​ពេល​បច្ចុប្បន្ន​នេះ​ចេញ។
ការ​ទាម​ទារ​របស់​គណបក្ស​នេះ ធ្វើ​ឡើង​បន្ទាប់​ពី​មាន​ដីកា​ដំណោះស្រាយ​មួយ​របស់​សាលា​ដំបូង​ខេត្ត​ ស្វាយរៀង ឲ្យ​អតីត​អភិបាល​ក្រុង​បាវិត លោក ឈូក បណ្ឌិត រួច​ផុត​ពី​ការ​ចោទ​ប្រកាន់​ក្នុង​ពេល​ថ្មីៗ​នេះ ពាក់ព័ន្ធ​នឹង​ការ​បាញ់​កម្មករ​ពេល​ធ្វើ​កូដកម្ម​នៅ​មុខ​រោងចក្រ។
គណបក្ស​សង្គ្រោះ​ជាតិ ដែល​ទើប​បង្កើត​ឡើង​ថ្មី ជំរុញ​ឲ្យ​ក្រសួង​ជំនាញ​ពាក់ព័ន្ធ​ត្រូវ​ពិនិត្យ និង​កែ​ទម្រង់​ឡើង​វិញ​ជា​បន្ទាន់​លើ​ប្រព័ន្ធ​យុត្តិធម៌ ដោយ​សារ​តែ​គេ​រក​ឃើញ​ថា ស្ថាប័ន​នេះ​មិន​បាន​ផ្ដល់​ការ​ជំនុំ​ជម្រះ​ក្ដី​ប្រកប​ដោយ​ភាព​សុក្រឹត និង​សច្ចភាព​សម្រាប់​ជន​រងគ្រោះ​ពិត​ប្រាកដ​នោះ​ទេ។
សេចក្ដី​ប្រកាស​ព័ត៌មាន​របស់​គណបក្ស​សង្គ្រោះ​ជាតិ ចេញ​ផ្សាយ​នៅ​ថ្ងៃ​ទី២០ ខែ​ធ្នូ ហើយ​វិទ្យុ​អាស៊ីសេរី ទទួល​បាន​នៅ​ថ្ងៃ​ទី២១ ឲ្យ​ដឹង​ថា ការ​ជំនុំ​ជម្រះ​ក្ដី​ក្នុង​ពេល​កន្លង​ទៅ​របស់​តុលាការ​កម្ពុជា ពុំ​បាន​ផ្ដល់​យុត្តិធម៌​ស្មើភាព​រវាង​ពលរដ្ឋ​ក្រីក្រ និង​មន្ត្រី​មាន​អំណាច ឬ​បុណ្យសក្តិ​នោះ​ទេ។
ការ​លើក​ឡើង​នៅ​ក្នុង​សេចក្ដី​ប្រកាស​ព័ត៌មាន​របស់​បក្ស​សង្គ្រោះ​ជាតិ នេះ គឺ​សំដៅ​ដល់​សេចក្ដី​សម្រេច​របស់​តុលាការ​ខេត្ត​ស្វាយរៀង ដែល​ចេញ​ដីកា​ដំណោះស្រាយ​ឲ្យ​លោក ឈូក បណ្ឌិត រួច​ផុត​ពី​ការ​ចោទ​ប្រកាន់។ ករណី​លោក ឈូក បណ្ឌិត នេះ មាន​សាក្សី និង​ភស្តុតាង​បញ្ជាក់​ថា អតីត​អភិបាល​ក្រុង​បាវិត រូប​នេះ គឺ​ជា​ជន​សង្ស័យ​តែ​ម្នាក់​គត់​ក្នុង​ការ​បាញ់​ប្រហារ​កម្មការិនី ៣​នាក់​ឲ្យ​រង​របួស កាល​ពី​ថ្ងៃ​ទី២០ ខែ​កុម្ភៈ ឆ្នាំ​២០១២។
ចំណែក​លោក ប៉ុល ហំម អនុប្រធាន​គណៈកម្មាធិការ​បណ្ដោះ​អាសន្ន​គណបក្ស​សង្គ្រោះ​ជាតិ ឲ្យ​ដឹង​ថា ប្រព័ន្ធ​យុត្តិធម៌​របស់​ប្រទេស​កម្ពុជា គឺ​ស្ថិត​នៅ​ក្រោម​ការ​អោប​ក្រសោប​របស់​រដ្ឋាភិបាល​ដែល​គ្រប់គ្រង​ដោយ​ គណបក្ស​ប្រជាជន​កម្ពុជា។ លោក ប៉ុល ហំម បន្ត​ថា ការ​ប្រើប្រាស់​សិទ្ធិ​ក្នុង​ការ​ជំនុំ​ជម្រះ​ក្ដី​របស់​ចៅក្រម បាន​ប្រាស​ចាក​​នូវ​ឆន្ទានុសិទ្ធិ​ពី​ក្របខ័ណ្ឌ​ច្បាប់​យ៉ាង​ពិត​ប្រាកដ៖ «ទាក់ ​ទង​ទៅ​នឹង​ប្រព័ន្ធ​យុត្តិធម៌​នេះ ខ្ញុំ​មើល​ឃើញ​ថា តុលាការ​នៅ​ស្រុក​ខ្មែរ​ហ្នឹង គឺ​មិន​ទាន់​មាន​ឯករាជ​ភាព​ទេ។ យើង​ឃើញ​គ្រប់​គ្នា​ហើយ​ថា ចៅក្រម​ហ្នឹង​ទំនង​ជា​ស្ថិត​នៅ​ក្រោម​ឥទ្ធិពល​នៃ​អ្នក​កាន់​អំណាច​ នីតិប្រតិបត្តិ។ ដូច្នេះ​ហើយ បាន​យើង​យល់​ថា​វា​គួរ​តែ​មាន​ការ​រៀបចំ​ឲ្យ​បាន​ល្អ​ប្រសើរ»
ទោះ​យ៉ាង​នេះ​ក្តី នាយក​ខុទ្ទកាល័យ​ក្រសួង​យុត្តិធម៌ និង​ជា​លេខាធិការ​ក្រុម​ប្រឹក្សា​នៃ​អង្គ​ចៅក្រម គឺ​លោក សំ ប្រជាមានិត បាន​បដិសេធ​ទៅ​នឹង​ការ​ចោទ​ប្រកាន់​របស់​បក្ស​សង្គ្រោះ​ជាតិ នេះ។ លោក​មាន​ប្រសាសន៍​ថា ទាំង​ចៅក្រម និង​ព្រះរាជ​អាជ្ញា​កំពុង​បំពេញ​កិច្ចការ​របស់​ខ្លួន​តាម​កាតព្វកិច្ច​ ច្បាប់​យ៉ាង​ខ្ជាប់ខ្ជួន ដែល​ពុំ​ចាំ​បាច់​ទាម​ទារ​ការ​កែទម្រង់​ណា​មួយ​នោះ​ទេ៖ «ខ្ញុំ​មិន​មាន​ អី​អត្ថាធិប្បាយ​ចំពោះ​ខាង​គាត់​នោះ​ទេ។ ប៉ុន្តែ​រាល់​ថ្ងៃ​នេះ តុលាការ​គឺ​ធ្វើ​ការ​ដោយ​យុត្តិធម៌​ហើយ និង​ទៅ​តាម​ច្បាប់​នីតិវិធី​ត្រឹមត្រូវ​ណាស់ មិន​មាន​អី​ប្រាស​ចាក​ច្បាប់​ទម្លាប់​អី​ទេ​បាទ ហើយ​ការ​លើក​ឡើង​របស់​គាត់​យ៉ាង​ណា គឺ​ខ្ញុំ​មិន​ដឹង​ទេ។ រាល់​ថ្ងៃ​គេ​ខំ​ប្រឹង​ណាស់​ណា​ធ្វើ​ការ​រាល់​ថ្ងៃ​ឃើញ​ទេ ចៅក្រម​តស៊ូ​ធ្វើ​ការ​មិន​ថា​លំបាក​ម៉េច គាត់ ហើយ​ការងារ​ជម្រះ​ក្ដី​មួយៗ គឺ​ត្រូវ​ការ​ស៊ើប​អង្កេត​ណាស់»
ចំណែក​លោក សុខ សំអឿន នាយក​អង្គការ​ក្រុម​អ្នក​ច្បាប់​ការពារ​សិទ្ធិ​កម្ពុជា ពន្យល់​ថា ដើម្បី​ធានា​ពី​ឯករាជ​ភាព​នៃ​ប្រព័ន្ធ​យុត្តិធម៌​ទៅ​បាន ដរាប​ណា​តុលាការ​មិន​ស្ថិត​ក្រោម​គណបក្ស​នយោបាយ ឧត្ដម​ក្រុម​ប្រឹក្សា​នៃ​អង្គ​ចៅក្រម ត្រូវ​មាន​វិន័យ​ច្បាស់​សាល់ និង​ចៅក្រម​ត្រូវ​ប្រាកដ​ថា​រដ្ឋ​ឧបត្ថម្ភ​គ្រប់គ្រាន់​ទាំង​ផ្នែក​ថវិកា និង​សម្ភារ​បំពេញ​បេសកកម្ម​ជាដើម៖ «ទី​មួយ គឺ​ប្រហែល​ជា​ត្រូវ​ធ្វើ​យ៉ាង​ណា​ឲ្យ​ឧត្ដម​ក្រុម​ប្រឹក្សា​​អង្គ​ចៅក្រម​ ហ្នឹង​ឯករាជ ហើយ​អាច​ធ្វើ​ការងារ​គ្រប់គ្រង​ចៅក្រម​បាន។ ទីពីរ ប្រហែល​ត្រូវ​ធ្វើ​ច្បាប់​លក្ខន្តិកៈ​ចៅក្រម​ហ្នឹង​ឲ្យ​មាន​សីលធម៌​ទៅ ហើយ​ទន្ទឹម​នឹង​អើ​ខ្ញុំ​ថា​ត្រូវ​តែ​ធ្វើ​ច្បាប់​មួយ​ចង ធ្វើ​ម៉េច​ចៅក្រម​កុំ​ឲ្យ​ចូល​បក្ស ហើយ​ក្រៅ​ពី​នោះ​គឺ​ប្រហែល​ជា​ត្រូវ​ការ​កែលំអ​កម្មវិធី​ហ្វឹកហ្វឺន​ចៅក្រម។ ទន្ទឹម​នឹង ខ្ញុំ​គិត​ថា​ប្រហែល​ជា​រដ្ឋ​ត្រូវ​ដំឡើង​ប្រាក់​ខែ ហើយ​សង់​ផ្ទះ​ឲ្យ​ចៅក្រម ព្រោះ​ចៅក្រម​គាត់​ផ្លាស់​ទៅ​ខេត្ត​ផ្សេងៗ​បួន​ឆ្នាំ​ម្ដង​នោះ​ណា ហើយ​ផ្លាស់​ហ្នឹង​ក៏​ត្រូវ​ធ្វើ​ឲ្យ​ម៉ិតប្រាយ​ដែរ កុំ​ឲ្យ​ផ្លាស់​ចុះ​ផ្លាស់​ឡើង​មក​ដដែល»
អ្នក​រាយការណ៍​ពិសេស​របស់​អង្គការ​សហប្រជាជាតិ​ទទួល​ផ្នែក​សិទ្ធិ​មនុស្ស ​ប្រចាំ​កម្ពុជា លោក សុរិយា ស៊ូប៊ែឌី (Surya Subedi) រក​ឃើញ​ថា ការ​ទទួល​បាន​យុត្តិធម៌​តាម​រយៈ​ការ​ជំនុំ​ជម្រះ​ក្ដី​នៅ​កម្ពុជា មិន​ទាន់​មាន​ភាព​ប្រសើរ​នៅ​ឡើយ​ទេ។ បញ្ហា​នេះ​លោក​ថា​រដ្ឋាភិបាល​កម្ពុជា គួរ​ធ្វើ​កំណែ​ទម្រង់​បន្ថែម​ទៀត៕

No comments: