Cambodia to make an oral presentation to ICJ on the Preah Vihear case with Thailand វ៉ា គឹមហុង៖ កម្ពុជា នឹងធ្វើសវនាការ ផ្ទាល់មាត់ ជាមួយភាគីថៃ ក្នុងទំនាស់រឿង ប្រាសាទព្រះវិហារ នៅតុលាការអន្តរជាតិ

Senior Minister and Chairman of Cambodian Border committee Var Kim Hong (pictured) said Cambodia will make an oral presentation to the International Court of Justice (ICJ) in April 2013 regarding the Preah Vihear court case with Thailand.

Tuesday, 06 November 2012  ដោយៈ ដើមអម្ពិល(DAP): ID-014

ភ្នំពេញ៖ នៅក្នុងខែមេសា ឆ្នាំ២០១៣ ខាងមុខនេះ កម្ពុជា នឹងធ្វើសវនាការផ្ទាល់មាត់ជាមួយភាគីថៃ នៅក្នុងបណ្តឹងរបស់ប្រទេសកម្ពុជា ដែលស្នើឲ្យតុលាការយុត្តិធម៌ អន្តរជាតិ ធ្វើការបកស្រាយលើសាលក្រមឆ្នាំ១៩៦២ ក្នុងសំណុំរឿងក្តីប្រាសាទព្រះវិហារ ដើម្បីឲ្យដឹងថា ទឹកដីនៅម្តុំប្រាសាទព្រះវិហារ ដែលថៃអះអាងថា ទំហំ ៤,៦ គីឡូម៉ែត្រ ជាទឹកដីរបស់កម្ពុជា ឬក៏ជារបស់ថៃ។

លោកទេសរដ្ឋមន្រ្តី វ៉ា គឹមហុង ប្រធានគណៈកម្មាធិការកិច្ចការព្រំដែន បានឲ្យដឹងព័ត៌មាននេះ នៅក្នុងឱកាសដែលរូបលោកបានចូលរួម ជាអធិបតីភាពនៅក្នុង កម្មវិធីធ្វើបទបង្ហាញស្តីពី ប្រាសាទព្រះវិហារ បេតិកភណ្ឌពិភពលោក នៅព្រឹកថ្ងៃទី៦ ខែវិច្ឆកា ឆ្នាំ២០១២នេះ នាទីស្តីការគណៈរដ្ឋមន្រ្តី។

លោកមានប្រសាសន៍ថា «ឆ្លើយតាមលាយលក្ខណ៍អក្សរ គឺយើងបានចប់ហើយ មួយដំណាក់កាលហ្នឹង គឺយើងចូលទៅក្នុងដំណាក់ ដែលយើងធ្វើនីតិខាងសវនាការ ផ្ទាល់មាត់ គឺយើងត្រូវធ្វើការឆ្លើយឆ្លងគ្នាការពារជំហររៀងៗខ្លួន នៅចំពោះមុខតុលាការ នៅខែ៤ ឆ្នាំ២០១៣ ហើយបន្ទាប់មក តុលាការទុកពេលវេលាដើម្បីធ្វើការ សិក្សាចំហទាំងសងខាងនៅពាក់កណ្តាលឆ្នាំ២០១៣»។

សូមបញ្ជាក់ថា កម្ពុជា បានដាក់ពាក្យបណ្តឹង ទៅតុលាការយុត្តិធម៌អន្តរជាតិ (ICJ) កាលឲ្យបកស្រាយ សាលក្រមរឿងក្តីប្រាសាទព្រះវិហារ ពីខែឧសភា ឆ្នាំ២០១១។ ការដាក់ពាក្យបណ្តឹងនេះ គឺធ្វើឡើងក្រោយពេលដែលភាគីថៃ បានធ្វើសង្គ្រាមជាច្រើន លើកច្រើនសាមកលើកម្ពុជា ដែលបណ្តាលឲ្យប្រាសាទព្រះវិហារ របស់ ប្រទេសកម្ពុជា បានទទួលរងការខូចខាត ដោយសារគ្រាប់កាំភ្លើងរបស់ថៃ បាញ់ចូលក្នុងតំបន់នោះ។ ប្រាសាទព្រះវិហារ ត្រូវបានចុះបញ្ជីជាសម្បត្តិ បេតិកភ័ណ្ឌពិភព លោក កាលពីថ្ងៃទី៧ ខែកក្កដា ឆ្នាំ២០០៨៕