The case of Governor Chhouk Bandith shooting protesters to return to court soon រឿងក្ដីលោក ឈូក បណ្ឌិត អាចនឹងបើក សវនាការក្នុង ពេលឆាប់ៗនេះ

លោក ឈូក បណ្ឌិត អតីតអភិបាលក្រុងបាវិត Chhouk Bandith, ex-governor of Bavet town.

កម្មការិនីរងគ្រោះទាំង៣នាក់ The three victims he shot and wounded.

The case of Governor Chhouk Bandith shooting protesters to return to court soon.

Tuesday, 30 October 2012 ដោយៈ ដើមអម្ពិល (DAP)-ID: 009

ស្វាយរៀងៈ សំណុំរឿងដ៏រសើបរបស់អតីត អភិបាលក្រុងបាវិត លោក ឈូក បណ្ឌិត ដែលត្រូវបានអូសបន្លាយ អស់រយៈពេលជិតមួយឆ្នាំមកនោះ អាចនឹងត្រូវបានលើកមកបើកសវនាការកាត់ទោស ក្នុងពេលឆាប់ៗ ខាងមុខ នេះ។

មន្រ្តីតុលាការខេត្តស្វាយរៀងម្នាក់ ដែលបានប្រាប់មជ្ឈមណ្ឌលព័ត៌មានដើមអម្ពិលនៅព្រឹកថ្ងៃទី៣០ ខែតុលា ឆ្នាំ២០១២ ក្នុងលក្ខខណ្ឌមិនបញ្ចេញឈ្មោះឲ្យដឹងថា ករណីលោក ឈូក បណ្ឌិត ត្រូវបានស៊ើបអង្កេតរួចរាល់ អស់ហើយ ដោយសំណុំរឿងមួយនេះ កំពុងតែស្ថិតនៅក្នុងដៃចៅក្រមកាត់ក្ដី។

លោកបានថ្លែងថា «ប្អូនឯងរង់ចាំមើលទៅ មិនយូរទេយ៉ាងយូពីរសប្ដាហ៍ទៀត នឹងមានការបើកសវនាការកាត់ក្តី លោក ឈូក បណ្ឌិត ជាក់ជាពុំខាន»។

ពាក់ព័ន្ធនិងសំណួរដែលសួរថា តើព្រះរាជអាជ្ញាអាចនិងប្ដូរបទចោទ ប្រកាន់អតីតអភិបាលក្រុងបាវិត ពីបទបង្ក របួសស្នាមដោយចេតនា មកប៉ុនប៉ងមនុស្សឃាតដោយចេតនា ឬយ៉ាងណា? មន្រ្តីរូបនេះបានបដិសេដមិនផ្ដល់ ចម្លើយ ដោយឲ្យរង់ចាំមើលដោយខ្លួនឯង។

លោក បិច ឈឿត ប្រធានតុលាការខេត្តស្វាយរៀង ដែលជាចៅក្រមស៊ើបសួរករណីលោក ឈូក បណ្ឌិត មិន អាចសុំការអត្ថាធិប្បាយពីការបរិច្ឆេទបើកសាវនាការកាត់ទោសអតីតអភិបាលក្រុងបាវិត បាននោះទេ ដោយ ទូរស័ព្ទរបស់លោកហៅចូលជាច្រើនដង តែមិនមានអ្នកទទួល ក៏ប៉ុន្តែកាលពីប៉ុន្មានសប្ដាហ៍មុន លោកធ្លាប់បាន ប្រាប់ដើមអម្ពិលថា សំណុំរឿងនេះ លោកបានសាកសួររូចរាល់អស់ហើយ ដោយលោកបានបញ្ជូនសំណុំរឿង ទៅកាន់លោកព្រះរាជអាជ្ញាឲ្យធ្វើការសន្និដ្ឋានជាចុងក្រោយ ហើយពេលដែលព្រះរាជអាជ្ញាសន្និដ្ឋានរួចរាល់ នឹង បញ្ជូនសំណុំរឿងមកលោកវិញ លោកនឹងកំណត់ថ្ងៃបើកសវនាការឆាប់ៗនេះ។

លោក ហ៊ីង ប៊ុនជា ព្រះរាជអាជ្ញាអមតុលាការខេត្តស្វាយរៀង ក៏មិនអាចទាក់ទងបានដែរ ដោយទូរស័ព្ទរបស់ លោក ហៅចូលជាច្រើនដង តែមិនមានអ្នកទទួល។

គួរបញ្ជាក់ថា អតីតអភិបាលក្រុងបាវិត លោកឈូក បណ្ឌិត គឺជាជនសង្ស័យតែម្នាក់គត់ ដែលបានបាញ់កម្មករ ឲ្យរងរបួសបីនាក់ នៅក្នុងបាតុកម្មតវ៉ា មួយនៅតំបន់សេដ្ឋកិច្ចពិសេសម៉េនហាតធេនក្រុងបាវិត។ ជនរងគ្រោះទាំង ៣នាក់ បានដាក់ពាក្យបណ្តឹងប្រឆាំងនឹងលោក ឈូក បណ្ឌិត ដោយទាមទារសំណងម្នាក់ៗ ៤៥.០០០ ដុល្លារ និងសូមឲ្យផ្ដន្ទាសទោសលោក ឈូក បណ្ឌិត ឲ្យបានធ្ងន់ធ្ងរបំផុត។

ជុំវិញរឿងក្ដីបាញ់ប្រហារពីសំណាក់លោក ឈូក បណ្ឌិត ដែលបណ្ដាលឲ្យកម្មកររោងចក្រស្បែកជើងរងរបួស ចំនួន ៣នាក់ខាងលើ បានអូសបន្លាយអស់រយៈពេលជាច្រើនខែមកហើយ។

តែទោះជាយ៉ាងណាក៏ដោយ ក៏ក្រុមសហជីព និងក្រុមអង្គការសង្គមស៊ីវិល កំពុងតែឃ្លាំមើលយ៉ាងយកចិត្តទុក ដាក់ ចំពោះបញ្ហានេះ បើទោះបីជារហូត មកដល់ពេលនេះ តុលាការនៅពុំទាន់ចាប់ជនបង្ករបួសស្នាមយកមក ផ្ដន្ទាទោសនៅឡើយក៏ដោយ ហើយក្រុមអង្គការសង្គមស៊ីវិលទាំងអស់នោះ រំពឹងថា តុលាការនឹងស្វែងរកយុត្តធម៌ ដល់ជនរងគ្រោះទាំងបីនាក់ ដោយធ្វើការចាប់ខ្លួនលោក ឈូក បណ្ឌិត មកផ្ដន្ទាទោស ដើម្បីជាការព្រមានដល់ មន្រ្តីរាជការដទៃទៀត កុំឲ្យយកគំរូតាមអតីតអភិបាលក្រុងបាវិតរូបនេះ៕