តុលាការខេត្តបាត់ដំបង រងការរិះគន់ថារើសអើងខាងផ្នែកនយោបាយ
ដោយ សួន សុផលមុនី
2012-06-30 Radio Free Asiaតុលាការខេត្តបាត់ដំបង រងការរិះគន់ថា មានការរើសអើងខាងផ្នែកនយោបាយ ដោយពុំបានលើកយកសំណុំរឿងព្រហ្មទណ្ឌរបស់សកម្មជនគណបក្សប្រឆាំង ដែលប្ដឹងកងការពារក្រុមហ៊ុនឯកជនមួយ យកមកចាត់ការទេ។
តុលាការខេត្តបាត់ដំបង បានចេញដីកាកោះហៅអ្នកភូមិជាច្រើននាក់ នៅឃុំចក្រី ស្រុកភ្នំព្រឹក ខេត្តបាត់ដំបង ឲ្យចូលខ្លួនដើម្បីសាកសួរនៅដើមខែកក្កដា ខាងមុខនេះ តាមសំណុំរឿងព្រហ្មទណ្ឌរបស់បុគ្គល ឈ្មោះ វ៉ន គយ និងឈ្មោះ ឆាត វ៉ាន់ ជាអ្នកបម្រើការឲ្យក្រុមហ៊ុនឯកជនមួយ ដែលបានប្ដឹងចោទប្រកាន់ពីបទគំរាមសម្លុត នៅក្នុងជម្លោះដីធ្លីកាន់កាប់ដីនៅខេត្តភាគពាយ័ព្យ ជាប់ព្រំដែនកម្ពុជា ថៃ។
លោក សឹង ហៀង ជាសកម្មជនគណបក្ស សម រង្ស៊ី និងជាជនជាប់ចោទបានថ្លែងថា លោក តូច សុភក្តី ជាតំណាងអយ្យកាសាលាដំបូង ខេត្តបាត់ដំបង កាលពីថ្ងៃទី១៣ ខែមិថុនា បានចេញដីកាកោះឲ្យអ្នកភូមិ៦នាក់ ចូលខ្លួនទៅតុលាការនៅថ្ងៃទី៥ ខែកក្កដា ដើម្បីឆ្លើយបំភ្លឺពីដំណើររឿងគំរាមកំហែង។
ជនត្រូវកោះហៅទាំង៦នាក់មាន ឈ្មោះ សឹង ហៀង ឈ្មោះ ផាវ បុត្រ ឈ្មោះ អ៊ូច ហៀង ឈ្មោះ សិន បូ ឈ្មោះ អ៊ុត ទូច និងឈ្មោះ កែត សារ៉ុំ។ ពួកគាត់ជាអ្នកភូមិរស់នៅឃុំចក្រី ស្រុកភ្នំព្រឹក ខេត្តបាត់ដំបង។
លោក សឹង ហៀង ដែលជាជនរងគ្រោះក្នុងការបាញ់ប្រហារនៅក្នុងជម្លោះដីធ្លី កាលចុងឆ្នាំ២០១១ បានថ្លែងថា រូបលោកធ្លាប់បានដាក់ពាក្យបណ្ដឹងករណីទាហានការពារក្រុមហ៊ុន បាញ់ប្រហារអ្នកភូមិបីនាក់ បណ្ដាលឲ្យរបួសធ្ងន់ ទៅតុលាការខេត្តបាត់ដំបង ដែរ ប៉ុន្តែតុលាការពុំបានលើកបណ្ដឹងរបស់គាត់មកចាត់ការទេ។
វិទ្យុអាស៊ីសេរី បានទូរស័ព្ទទៅលោក នួន សាន ព្រះរាជអាជ្ញាតុលាការខេត្តបាត់ដំបង ដើម្បីសុំការបញ្ជាក់បន្ថែមលើបញ្ហានេះ ប៉ុន្តែទូរស័ព្ទពុំមានអ្នកទទួល។ យ៉ាងនេះក្ដី មន្ត្រីអង្គការសិទ្ធិមនុស្ស លីកាដូ (Licadho) លោក ហេង សាយហុង បានបញ្ជាក់ថា ករណីប្ដឹងផ្ដល់គ្នានេះ ផ្ទុះចេញពីជម្លោះដីធ្លី។ ក្នុងន័យនេះ លោកបានស្នើសុំឲ្យតុលាការពិនិត្យ និងព្យួរសំណុំរឿងចោល មិនចាត់ការ។
ក្រុមហ៊ុន សួន មានសម្បត្តិ បានទទួលអាជ្ញាប័ណ្ណពីរាជរដ្ឋាភិបាលកម្ពុជា ដើម្បីវិនិយោគដាំដំណាំកសិឧស្សាហកម្មលើផ្ទៃដីសម្បទានសេដ្ឋកិច្ច ទំហំ៤ពាន់ហិកតារ ស្ថិតនៅក្នុងតំបន់ដែនជម្រកសត្វព្រៃរនាមដូនសំ ខេត្តបាត់ដំបង។ ការផ្ដល់ដីសម្បទានសេដ្ឋកិច្ចនេះ បានធ្វើឲ្យប៉ះពាល់ដីស្រែចម្ការរបស់អ្នកភូមិ ហើយកើតមានអំពើហិង្សា។
កាលពីថ្ងៃទី១២ ខែធ្នូ ឆ្នាំ២០១១ កងទាហានការពារក្រុមហ៊ុន សួន មានសម្បត្តិ បានបាញ់ជាច្រើនគ្រាប់បណ្ដាលឲ្យអ្នកភូមិបីនាក់ របួសធ្ងន់ដឹកទៅសង្គ្រោះនៅមន្ទីរពេទ្យ។ ហេតុការណ៍នេះ បានកើតឡើងនៅលើដីប្រទាញប្រទង់គ្នា រវាងក្រុមហ៊ុន សួន មានសម្បត្តិ និងក្រុមអ្នកភូមិម្ចាស់ដី ក្នុងឃុំចក្រី ស្រុកភ្នំព្រឹក ខេត្តបាត់ដំបង។
ការផ្ទុះអាវុធនោះ ធ្វើឲ្យអ្នកភូមិបីនាក់រងរបួសចំភ្លៅពីរនាក់ និងរបួសចំស្មងជើងម្នាក់។ ភាគីទាហានការពារក្រុមហ៊ុនអះអាងថា ការបាញ់នេះ គឺដើម្បីការពារខ្លួន នៅគ្រាដែលមានក្រុមអ្នកភូមិចំនួនពី៥ទៅ៦នាក់ បានសម្រុកចូលទៅដណ្ដើមយកទូរស័ព្ទពីកងសន្តិសុខការពារឲ្យ ក្រុមហ៊ុន។ កងសន្តិសុខក្រុមហ៊ុន បានដកយកទូរស័ព្ទពីក្រុមអ្នកភូមិយកទៅរក្សាទុក មិនឲ្យថតរូប និងអាត់សំឡេង ពីសកម្មភាពនានា របស់ក្រុមហ៊ុន នៅលើដីនៅតំបន់នោះ៕
No comments:
Post a Comment