អ្នកដឹកជន្លង់ម្រេចនៅក្រចេះប្រតិកម្មតបនឹងសមត្ថកិច្ចដែលចាប់រថយន្ត
ដោយ ម៉ែន សុធីរ
2016-07-02 rfa
រថយន្តដឹកឈើធ្វើគ្រឿងផ្ទះ ត្រូវសមត្ថកិច្ចខែត្រក្រចេះ ឃាត់កាលពីថ្ងៃទី២ ខែកក្កដា ឆ្នាំ២០១៦។
Photo provided
មន្ត្រីរដ្ឋបាលព្រៃឈើស្រុកស្នួល ខែត្រក្រចេះ និងសមត្ថកិច្ចបានឃាត់រថយន្តដឹកជន្លង់ម្រេចរបស់ពលរដ្ឋមួយគ្រឿងទៀត នៅល្ងាចថ្ងៃទី២ កក្កដា បន្ទាប់ពីសមត្ថកិច្ចបានឃាត់រថយន្តសាំយ៉ុង ដឹកជន្លង់ម្រេច ដឹកក្ដារ និងឈើធ្វើគ្រឿងផ្ទះ ១៤គ្រឿង នៅស្រុកចិត្របូរី កាលពីថ្ងៃទី១ កក្កដា។
ពលរដ្ឋរស់នៅខែត្រក្រចេះ លោក សំ អឿន អះអាងថា ឈើជន្លង់ម្រេចរបស់លោកគឺទិញពីអ្នកភូមិដែលប្រមូលបានពីដីសម្បទានសេដ្ឋកិច្ច ក្នុងស្រុកចិត្របុរី ខែត្រក្រចេះ ចំនួន ៤០ដើម ប្រវែងជិត ៤ម៉ែត្រ បំណងដឹកទៅខែត្រត្បូងឃ្មុំ ត្រូវសមត្ថកិច្ចខែត្រក្រចេះ ឃាត់។ លោកថា ចំណាត់ការរបស់អាជ្ញាធរពុំមានតម្លាភាព ខណៈឈ្មួញនិងអ្នកមានអំណាចមួយចំនួនអាចដឹកជញ្ជូនឈើឆ្លងដែនទៅក្រៅប្រទេសបានដោយសេរី។
លោកថា ការអនុវត្តច្បាប់របស់សមត្ថកិច្ច និងមន្ត្រីជំនាញគឺជារឿងគំនុំ បន្ទាប់ពីលោកធ្លាប់បានថតមន្ត្រីអាវុធហត្ថស្រុកចិត្របុរី ជំរិតទារប្រាក់ពីពលរដ្ឋដឹកជន្លង់ម្រេចកន្លងមក ហើយបង្ហោះក្នុងបណ្ដាញសង្គមហ្វេសប៊ុក (Facebook)៖ «អយុត្តិធម៌ណាស់បង អយុត្តិធម៌ណាស់។ ឡានធ្នង់ គ្រញូង ដឹកពេញទឹកពេញដី អត់មើលទេ មើលតែឡានប្រជាពលរដ្ឋ។ ខ្ញុំមានលុយអីណា ចងការធនាគាររាប់ពាន់ បើខ្វះលុយរាប់ពាន់ដោះមិនរួចទេ ហើយតែចូលហើយមិនងាយចេញវិញទេ»។
វិទ្យុអាស៊ីសេរី មិនអាចទាក់ទងនាយខណ្ឌរដ្ឋបាលព្រៃឈើខែត្រក្រចេះ លោក ទ្រី សុភ័ក្រ្ភ ដើម្បីសុំការបំភ្លឺជុំវិញករណីនេះបានទេ នៅថ្ងៃទី២ កក្កដា។
ប្រធានកិច្ចការពិសេសសិទ្ធិមនុស្សកម្ពុជា លោក អ៊ូច ឡេង រកឃើញថា របរដឹកជន្លង់ម្រេចក៏ជាផ្នែកមួយបន្ទាប់បន្សំ បណ្ដាលឲ្យព្រៃឈើហិនហោច ខណៈលោកប្រទះឃើញរថយន្តយ៉ាងច្រើនស្អេកស្កះដែលចរាចរណ៍ពីខែត្រមណ្ឌលគិរី មកខែត្រកំពង់ចាម និងដឹកជញ្ជូនពីខែត្រក្រចេះ មកខែត្រត្បូងឃ្មុំ។ លោកយល់ថា សមត្ថកិច្ចគួរតែអប់រំណែនាំពលរដ្ឋ និងធ្វើកិច្ចសន្យាបញ្ឈប់ជាមុនសិនមុននឹងអនុវត្តច្បាប់។ ចំណែកពលរដ្ឋគួរតែផ្លាស់ប្ដូរមុខរបរនេះ៕
No comments:
Post a Comment