ដោយ ប្រាជ្ញ ចេវ
2016-07-02
អ្នកនាំពាក្យគណបក្សប្រជាជនកម្ពុជា លោក សុខ ឥសាន (ឆ្វេង) និងប្រធានក្រុមការងារគណៈកម្មការចំពោះកិច្ចពីខាងគណបក្សសង្គ្រោះជាតិ លោក សុន ឆ័យ ថ្លែងក្នុងសន្និសីទកាសែតក្រោយបញ្ចប់កិច្ចពិភាក្សាលើសំណូមពររបស់សហជីពទាក់ទងនឹងសេចក្ដីព្រាងច្បាប់សហជីព នៅថ្ងៃទី១៩ មករា ឆ្នាំ២០១៦។
RFA/Leng Maly
ក្រុមតំណាងរាស្ត្រគណបក្សសង្គ្រោះជាតិ នឹងដាក់លិខិតទៅរដ្ឋាភិបាលនៅសប្ដាហ៍ក្រោយឲ្យឆ្លើយបំភ្លឺរឿងការងារបោះឆ្នោត ខណៈគណបក្សនេះចង់ឃើញពលរដ្ឋចំណាកស្រុកអាចចុះឈ្មោះបោះឆ្នោត និងបោះឆ្នោតបាននៅព្រំដែន។ ចំណែកមន្ត្រីរដ្ឋាភិបាលមិនទាន់ឆ្លើយតបនៅឡើយទេ ដោយរង់ចាំពិនិត្យមើលលិខិតជាផ្លូវការសិន។
គោលបំណងនៃលិខិតរបស់ក្រុមតំណាងរាស្ត្រគណបក្សសង្គ្រោះជាតិ ដោយគណបក្សនេះលើកឡើងថា រដ្ឋាភិបាល និង គ.ជ.ប មានកាតព្វកិច្ចធានាសិទ្ធិពលរដ្ឋអាចបោះឆ្នោតបានដោយងាយស្រួល។ ជាងនេះទៅទៀត គណបក្សនេះចង់ឃើញរដ្ឋាភិបាល និងស្ថាប័នបោះឆ្នោត ជួយសម្រួលឲ្យពលរដ្ឋចំណាកស្រុក ជាពិសេសពលករខ្មែរនៅប្រទេសថៃ អាចចុះឈ្មោះបោះឆ្នោតនៅព្រំដែនបានមិនចាំបាច់មកស្រុកកំណើត។ តែទោះយ៉ាងណាក្តី សំណើនេះត្រូវបានអ្នកនាំពាក្យគណបក្សប្រជាជនកម្ពុជា និងអ្នកនាំពាក្យ គ.ជ.ប បដិសេធ។
ប្រធានក្រុមតំណាងរាស្ត្រគណបក្សសង្គ្រោះជាតិ លោក សុន ឆ័យ ឲ្យវិទ្យុអាស៊ីសេរី ដឹងនៅថ្ងៃទី២ ខែកក្កដា ថា លិខិតនេះ ក្រៅពីចង់ដឹងពីកិច្ចខំប្រឹងប្រែងរបស់រដ្ឋាភិបាលរឿងការងារបោះឆ្នោត តំណាងរាស្ត្រគណបក្សសង្គ្រោះជាតិ ក៏ចង់ដឹងពីទុក្ខលំបាករបស់រដ្ឋាភិបាលដែលមិនអាចឲ្យពលរដ្ឋក្រៅប្រទេសបោះឆ្នោតបាន។ លោកថា ក្រៅពីចង់ដឹងពីការងាររដ្ឋាភិបាល គណបក្សប្រឆាំងក៏គ្រោងចង់បានការឆ្លើយបំភ្លឺពីស្ថាប័នបោះឆ្នោតដែរ៖ «ពលរដ្ឋចំណាកស្រុកដែលចំនួនច្រើន ដូចជានៅក្នុងប្រទេសថៃ រដ្ឋត្រូវមានកាតព្វកិច្ចធានាសិទ្ធិរបស់គាត់ដើម្បីឲ្យគាត់អាចបោះឆ្នោតបង្កើតការិយាល័យបោះឆ្នោតនៅតាមព្រំដែន ហើយដែលអនុញ្ញាតឲ្យគាត់មកបោះឆ្នោតនៅព្រំដែនបាន ហើយចាំបូកសរុបនៅខេត្តចុះ»។
លោក សុន ឆ័យ ឲ្យដឹងដែរថា គណបក្សសង្គ្រោះជាតិ ចង់បានការឆ្លើយបំភ្លឺនេះ តាមរយៈលិខិត មិនមែនជាការឆ្លើយបំភ្លឺរបស់មន្ត្រីរដ្ឋាភិបាលនៅរដ្ឋសភាទេ។ បើតាមលោក សុន ឆ័យ តាមបែបបទរដ្ឋបាល ទោះតំណាងរាស្ត្រគណបក្សសង្គ្រោះជាតិ មិនទៅធ្វើការនៅសភា ក៏តំណាងរាស្ត្រគណបក្សនេះ អាចដាក់លិខិតស្នើទៅរដ្ឋាភិបាលតាមរយៈរដ្ឋសភាបានដែរ។
បើតាមគោលការណ៍ រដ្ឋសភាដាក់លិខិតទៅរដ្ឋាភិបាលបានរយៈពេល ៧ថ្ងៃ រដ្ឋាភិបាលត្រូវមានការឆ្លើយតបត្រឡប់ជាផ្លូវការមកវិញ។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ថា លោករង់ចាំមើលលិខិតរបស់បក្សប្រឆាំងដែលផ្ញើចេញទៅរដ្ឋសភាជាផ្លូវការសិន ថាតើក្រុមតំណាងរាស្ត្រគណបក្សសង្គ្រោះជាតិ ចង់បានការបំភ្លឺពីស្ថាប័នណាមួយរបស់រដ្ឋាភិបាល។
ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រាប់ថា ការបោះឆ្នោតគឺអាស្រ័យលើឆន្ទៈរបស់ពលរដ្ឋ។ លោកប្រាប់ដែរថា រយៈពេលនៃការចុះឈ្មោះបោះឆ្នោត គឺចំពេលរដូវភ្ជុំបិណ្ឌ ដូច្នេះពលរដ្ឋអាចមកលេងស្រុកកំណើតផង និងអាចចុះឈ្មោះបោះឆ្នោតផង។ លោកថា ការចង់បានរបស់គណបក្សសង្គ្រោះជាតិ បែបនេះ គ្រាន់តែចង់កេងចំណេញនយោបាយប៉ុណ្ណោះ៖ «ខ្ញុំយល់ថា សំខាន់អាស្រ័យទៅលើឆន្ទៈរបស់បងប្អូនពលរដ្ឋទេ បើសិនបងប្អូនពុះពារមកយើងស្វាគមន៍ ព្រោះយើងចង់បើកទូលាយឲ្យអ្នកចុះឈ្មោះនោះឲ្យបានច្រើន ប៉ុន្តែបើបងប្អូនថាមិនបាច់មកទេ ក៏គ្មានអ្នកណាបង្ខំបងប្អូនទេ»។
លោក សុខ ឥសាន បញ្ជាក់ថា គ្មានការចរចាណាមួយធ្វើឲ្យការការងារបោះឆ្នោត អាចដើរលើសធ្វើអ្វីដែលគណៈកម្មាធិការជាតិរៀបចំការបោះឆ្នោតធ្វើនោះទេ។
តាមរបាយការណ៍របស់ក្រសួងការងារ សព្វថ្ងៃមានពលរដ្ឋខ្មែរជិត ៥០ម៉ឺននាក់ កំពុងធ្វើការងារនៅប្រទេសថៃ។
ទាក់ទងរឿងចុះឈ្មោះបោះឆ្នោតនេះដែរ អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា មានប្រសាសន៍ថា ដោយសារបញ្ហាបច្ចេកទេស គ.ជ.ប មិនអាចចុះឈ្មោះពលរដ្ឋខ្មែរដែលធ្វើការនៅក្រៅប្រទេស អាចចុះឈ្មោះ និងបោះឆ្នោតនៅតាមព្រំដែនបានឡើយ។ ប៉ុន្តែលោកថា ប្រសិនពលករចំណាកស្រុកទាំងនោះមានអាសយដ្ឋាននៅទឹកដីព្រំដែនប្រទេសកម្ពុជា ឬត្រូវបានអាជ្ញាធរមូលដ្ឋាននៅតាមព្រំដែន ចេញលិខិតបញ្ជាក់ទីលំនៅពួកគេគឺអាចបោះឆ្នោត៖ «បាទ! ឲ្យតែគាត់មានអត្តសញ្ញាណប័ណ្ណសញ្ជាតិខ្មែរ ហើយអត្តសញ្ញាណប័ណ្ណមានដាក់អាសយដ្ឋាន ហើយអាសយដ្ឋាននោះខុសពីកន្លែងគាត់រស់នៅគ្រាន់តែគាត់សុំនៅសាលា ឃុំដើម្បីបញ្ជាក់ទីលំនៅ ឬទីសំណាក់របស់គាត់ ទោះជាគាត់រស់នៅមួយថ្ងៃ ឬមួយខែក៏ដោយ ហើយឃុំមើលទៅឃើញថា គាត់ពិតជាមកស្នាក់នៅដើម្បីធ្វើការ ឬប្រកបមុខរបរ គឺថា គាត់មានឱកាសចុះឈ្មោះបានហើយ»។
គណៈកម្មាធិការជាតិរៀបចំការបោះឆ្នោត ចាប់ផ្ដើមចុះឈ្មោះឆ្នោតរយៈពេលបីខែ ពីខែកញ្ញា ដល់ខែវិច្ឆិកា។ ដំណើរការនេះ គ.ជ.ប បានជ្រើសរើសបុគ្គលិកជាប់កិច្ចសន្យា គ្រោងជ្រើសរើសសមាជិក គ.ជ.ប ថ្នាក់ឃុំសង្កាត់ ហើយស្ថាប័នបោះឆ្នោតកំពុងរៀបចំកន្លែងរៀបចំដាក់ឧបករណ៍ចុះឈ្មោះបោះឆ្នោតចំនួន ២.៤០០គ្រឿងពីសហភាពអឺរ៉ុប។
កាលពីថ្ងៃទី១ ខែកក្កដា តំណាងរាស្ត្រគណបក្សសង្គ្រោះជាតិ ប្រកាសនៅទីស្នាក់ការកណ្ដាលរបស់ខ្លួនថា គណបក្សសង្គ្រោះជាតិ នឹងស្នើទៅគណបក្សប្រជាជនកម្ពុជា ដើម្បីឲ្យមានក្រុមការងារចំពោះកិច្ចដែលមានសមាសភាពគណបក្សទាំងពីរចូលរួមជជែកធ្វើយ៉ាងណាឲ្យពលរដ្ឋចំណាកស្រុកអាចចុះឈ្មោះបោះឆ្នោត និងបោះឆ្នោតនៅព្រំដែនបាន៕
No comments:
Post a Comment