A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Wednesday, 4 May 2016

តម្លាភាព​អន្តរជាតិ៖ ACU ​ត្រូវ​គេ​ប្រើ​ដើម្បី​បំបិត​មាត់​សង្គម​ស៊ីវិល

តម្លាភាព​អន្តរជាតិ៖ ACU ​ត្រូវ​គេ​ប្រើ​ដើម្បី​បំបិត​មាត់​សង្គម​ស៊ីវិល

លោក​ សុខ សំអឿន​ មេធាវី​ការពារ​សិទ្ធិមនុស្ស​ ថា​ លោក​ពិបាក​សន្និដា្ឋន​ចំពោះ​ការ​សម្រេច​ចោទ​ប្រកាន់​របស់​តុលាការ​ ដែល​នាំដល់​ការ​ឃុំ​ខ្លួន​អ្នក​ទាំង​ប្រាំ​នាក់​នោះ​ ព្រោះ​លោក​មិន​ទាន់​ដឹង​ច្បាស់​ថា​ តើ​តុលាការ​សំអាង​លើ​ហេតុផល​អ្វី​ដើម្បី​ធ្វើ​ការ​ចោទ​នេះ។

រូបឯកសារ៖ អ្នក​សារព័ត៌មាន​ព្យាយាម​សុំ​សម្ភាស​មេដឹកនាំ​សកម្មជន​សិទ្ធិមនុស្ស ក្នុង​អំឡុង​ពិធីហែរក្បួន​នៅ​មុខ​អង្គភាព​ប្រឆាំង​អំពើ​ពុក​រលួយ នៅ​រាជធានី​ភ្នំពេញ កាលពី​ថ្ងៃ​ព្រហស្បតិ៍ ទី២៩ ខែ​មេសា ឆ្នាំ​២០១៤។ (AP Photo/Heng Sinith)
រូបឯកសារ៖ អ្នក​សារព័ត៌មាន​ព្យាយាម​សុំ​សម្ភាស​មេដឹកនាំ​សកម្មជន​សិទ្ធិមនុស្ស ក្នុង​អំឡុង​ពិធីហែរក្បួន​នៅ​មុខ​អង្គភាព​ប្រឆាំង​អំពើ​ពុក​រលួយ នៅ​រាជធានី​ភ្នំពេញ កាលពី​ថ្ងៃ​ព្រហស្បតិ៍ ទី២៩ ខែ​មេសា ឆ្នាំ​២០១៤។ (AP Photo/Heng Sinith)


ហ៊ុល រស្មី
04 ឧសភា 2016 voa

ភ្នំពេញ—
អ្នក​ជំនាញ​ច្បាប់​ និង​សកម្មជន​សិទិ្ធ​មនុស្ស​ សម្តែង​ការ​ប្រយ័ត្ន​ប្រយែង​ ទៅនឹង​ការ​ថ្លែង​អំពីចំណាត់​ការ​ច្បាប់​ដែល​ធ្វើឡើង ​ដោយ​សាលាដំបូង​រាជធានី​ភ្នំពេញ​ បន្ទាប់​ពី​មន្ត្រី​សិទ្ធិ​មនុស្ស​របស់​សមាគម​អាដ​ហុក​បួន​រូប​ និង​អគ្គលេខា​ធិការ​រង​គណៈកម្មាធិការ​ជាតិ​រៀប​ចំ​ការ​បោះឆ្នោត​ ត្រូវ​បាន​បញ្ជូន​ទៅ​ឃុំ​ខ្លួន​ក្នុង​ពន្ធនាគា​រដាច់​ដោយ​ឡែក​ពីគ្នា​កាល​ពី​ថ្ងៃច័ន្ទ​កន្លង​ទៅ។​

លោក​ សុខ សំអឿន​ មេធាវី​ការពារ​សិទ្ធិមនុស្ស​ បាន​ប្រាប់​ VOA ​ថា​ លោក​ពិបាក​សន្និដា្ឋន​ចំពោះ​ការ​សម្រេច​ចោទ​ប្រកាន់​របស់​តុលាការ​ ដែល​នាំដល់​ការ​ឃុំ​ខ្លួន​អ្នក​ទាំង​ប្រាំ​នាក់​នោះ​ ព្រោះ​លោក​មិន​ទាន់​ដឹង​ច្បាស់​ថា​ តើ​តុលាការ​សំអាង​លើ​ហេតុផល​អ្វី​ដើម្បី​ធ្វើ​ការ​ចោទ​នេះ។

ការ​ថ្លែង​របស់​លោក​យ៉ាង​ដូច្នេះ​ បន្ទាប់​ពី​មាន​ការ​បញ្ចេញ​មតិ​ពី​ក្រុម​អ្នក​ឃ្លាំ​មើល​សិទ្ធិ​មនុស្ស​ និង​សេចក្តី​រាយការណ៍​ថា​ ការ​សម្រេច​ឃុំខ្លួន​នេះ​ បណ្តាល​មក​ពី​លុយ​ចំនួន​២០៤​ដុល្លារ​ ដែល​សមាគម​អាដហុក​ផ្តល់​ដល់​នាង ខុម​ ចាន់តារ៉ាទី​ ឬ​ស្រី​មុំ ​សម្រាប់​ដំណើរការ​ដាក់​ពាក្យ​បណ្តឹង។​ លោក​ សុខ សំអឿន​ ថ្លែង​យ៉ាង​ដូច្នេះ​ថា៖​

«បើសិន​យើង​និយាយ​ពីរឿង​ថា​ អូលុយ​ហ្នឹង​មិនមែន​សម្រាប់ ​ហ៊ឺ​អ្នក​ឯង​យក​២០០​ ហ្នឹង​ទៅ ហើយ​កុហក​ សុំ​ជួយ​កុហក​ទៅ​ អាហ្នឹង​ទៅ​ជា​សូក​ហើយ។​ យល់​ទេ​អញ្ចឹង?​ តែ​បើ​សិន​ឮ​គេ​ថា​ ទេ​អាហ្នឹង​មែន​ លោក​នាង​[មិន] ​មក​អាច​មកខ្លួន​ឯង​បាន​ទេ​អ្ហី​ ខ្ញុំ​អត់​មាន​លុយ​ទេ​ ខ្ញុំ​អត់មាន​ថវិកា​ទេ​ ខ្ញុំ​អស់​ការងារ​ធ្វើ​ហើយ​ ចង់​សុំ​ឲ្យ​លោក​ពឹងពាក់​ អាហ្នឹង​ គឺ​ចេញ​លុយ​ចេញ​កាក់​ដើម្បី​ជួយ​ ហើយ​អាហ្នឹង​មិន​ហៅ​ថា​ សូក​ប៉ាន់។​ ក៏ប៉ុន្តែ​គ្រាន់​តែ​អ្វីដែល​តុលាការ​គេ​ អាហ្នឹង​យើង​អត់​ដឹង​គេ​ផ្អែក​ទៅលើ​អ្វី​ទេ​ ដូច្នេះ​យើង​មិន​អាច​សន្និដ្ឋាន​ថា​ ការ​គេ​ចោទ​ត្រូវ​ឬខុស​ យើង​ម៉េច​នឹង​ដឹង​កើត»។



លោក​ មឿន ​តុលា ​នាយក​ប្រតិបត្តិ​នៃ​មជ្ឈមណ្ឌល​សម្ព័ន្ធ​ភាព​ការងារ ​និង​សិទ្ធិ​មនុស្ស​ (Center for Alliance of Labor and Human Rights) ​ឬ​ហៅ​កាត់​ថា Central ថ្លែង ​នៅ​មុន​ការ​សម្រេច​ឃុំ​ខ្លួន​អ្នក​ទាំង​ប្រាំ ដោយ​ក្តី​បារម្ភ​ថា​ ទឹកប្រាក់​២០៤​ដុល្លារ​ គ្រាន់​ជា​ទឹក​ប្រាក់​សម្រាប់​ជួយ​សម្រួល​ដល់​ជន​រងគ្រោះ​ ធ្វើការ​តស៊ូ​ខាង​ផ្លូវ​ច្បាប់​ប៉ុណ្ណោះ។

«បើសិន​ជា​ការ​ចោទ​ប្រកាន់​រឿង​ហ្នឹង​មែន​ ខ្ញុំ​គិត​ថា​ ជា​រឿង​អត់​ត្រឹម​ត្រូវ​ ដោយ​សារ​អ្វី?​ ដោយសារ​តែ​សង្គម​ស៊ីវិល​ ក្រៅ​អំពី​ការ​ផ្តល់​ សេវា​ផ្លូវ​ច្បាប់​ គឺ​គេ​មាន​កម្មវិធី​មួយ​ផ្តល់​សេវា​សង្គម»។

លោក នី ចរិយា (កណ្តាល) អតីត​មន្ត្រី​របស់​អង្គការ​អាដហុក និង​ជា​សមាជិក​ម្នាក់​នៃ​គណៈកម្មាការ​រៀបចំ​ការ​បោះឆ្នោត កំពុង​ត្រូវបាន​បញ្ចូន​ខ្លួន​ទៅ​អង្គភាព​ប្រឆាំង​អំពើ​ពុក​រលួយ​ បន្ទាប់​ពី​បាន​ចូលបង្ហាញ​ខ្លួន នៅ​សាលាដំបូង​រាជធានី​ភ្នំពេញ កាលពី​ថ្ងៃទី៣០ ខែមេសា ឆ្នាំ២០១៦។ (AP Photo/Heng Sinith)
លោក នី ចរិយា (កណ្តាល) អតីត​មន្ត្រី​របស់​អង្គការ​អាដហុក និង​ជា​សមាជិក​ម្នាក់​នៃ​គណៈកម្មាការ​រៀបចំ​ការ​បោះឆ្នោត កំពុង​ត្រូវបាន​បញ្ចូន​ខ្លួន​ទៅ​អង្គភាព​ប្រឆាំង​អំពើ​ពុក​រលួយ​ បន្ទាប់​ពី​បាន​ចូលបង្ហាញ​ខ្លួន នៅ​សាលាដំបូង​រាជធានី​ភ្នំពេញ កាលពី​ថ្ងៃទី៣០ ខែមេសា ឆ្នាំ២០១៦។ (AP Photo/Heng Sinith)


សាលាដំបូង​រាជធានី​ភ្នំពេញ​កាល​ពី​ថ្ងៃច័ន្ទ​កន្លង​ទៅ បាន​សម្រេច​ឃុំ​ខ្លួន​មន្ត្រី​សិទ្ធិ​មនុស្ស​នៃ​សមាគម​សិទ្ធិ​មនុស្ស​អាដហុក ​ចំនួន​៤រូប​ពី​បទ​ «សូក​ប៉ាន់​សាក្សី‍» ​និង​អគ្គលេខាធិការ​រង​គណៈ​កម្មាធិការ​ជាតិ​រៀបចំ​ការ​បោះឆ្នោត (គ.ជ.ប) ​ចំនួន​១រូប​ពី​បទ​ «សម​គំនិត​សូក​ប៉ាន់​សាក្សី»។​ នេះ​បើ​យោង​ទៅ​តាម​ការ​បញ្ជាក់​ពី​អ្នក​នាំ​ពាក្យ​សាលា​ដំបូង​រាជធានី​ភ្នំពេញ​ និង​មន្ត្រី​ឃ្លាំ​មើល​សិទ្ធិ​មនុស្ស។​

អ្នក​ដែល​ត្រូវ​បាន​សាលា​ដំបូង​រាជធានី​ភ្នំពេញ​សម្រេច​ឃុំ​ខ្លួន​នោះ​ រួមមាន​លោក​ នី​ ចរិយា​ អគ្គ​លេខា​ធិការ​រង​ គ.ជ.ប​ និង​លោក ​នី សុខា​ លោក ណៃ​ វ៉ង់ដា​ លោក​ យី​ សុខ​សាន្ត​ និង​លោកស្រី​ លឹម​ មុនី​ ដែល​ជា​មន្ត្រី​ស៊ើប​អង្កេត​របស់​សមាគម​សិទ្ធិ​មនុស្ស​អាដហុក។​

លោក​ អំ សំអាត​ ប្រធាន​ការិយាល័យ​បច្ចេកទេស​ស៊ើប​អង្កេត​នៃ​អង្គការ​សិទ្ធិមនុស្ស​លីកាដូ ថ្លែង​ថា​ ក្រុម​សង្គម​ស៊ីវិល​ នៅមាន​មន្ទិល​សង្ស័យ​នៅ​ឡើយ​ចំពោះ​បទ​ចោទ​ប្រកាន់​របស់​តុលាការ​ចំពោះ​អ្នក​ជាប់​ឃុំ​ទាំងប្រាំ​ ដោយសារ​តុលាការ​មិនទាន់​បញ្ជាក់​អំពី​អង្គ​ហេតុ​ និង​ភស្តុតាង​សម្រាប់​គាំទ្រ​បទ​ចោទ​ប្រកាន់​នោះ។​

«យើង​នៅ​មន្ទិល​សង្ស័យ​ ប៉ុន្តែ​អ្វី​ដែល​ខ្ញុំ​ជឿបាន​ គឺ​ត្រង់​ថា​ បុគ្គល​សមាគម​អាដហុក​ទាំង​អស់​ហ្នឹង​គាត់​ ធ្វើ​ការ​តាម​គោលការណ៍​ និង​បាន​ន័យ​ថា​ គោលការណ៍​ក៏ដូច​ជា​ ភារកិច្ច​ និង​ការងារ​របស់​សមាគម​អាដហុក​ សម្រាប់​ជួយ​ទៅ​ដល់​ប្រជាពលរដ្ឋ ​ពី​ព្រោះ​ យើង​ឃើញ​ហើយ​ ២០​ឆ្នាំ​ហើយ​ ដែល​គាត់​ធ្វើ​សម្រាប់​ជួយ​ប្រជាពលរដ្ឋ​ដែល​រងគ្រោះ​ ដោយសារ​បញ្ហា​រំលោភ​សិទ្ធិ​មនុស្ស​ បញ្ហា​រំលោភ​ដី​ធ្លី​ និង​បញ្ហា​អយុត្តិធម៌​ផ្សេងៗ​ទៀត​នោះ»។​

ការ​មិន​បញ្ចេញ​ឲ្យដឹង​ពី​ភស្តុតាង​ និង​អង្គហេតុ​ពី​សាលាដំបូង​រាជធានី​ភ្នំពេញ​ ដើម្បី​គាំទ្រ​ការ​ចោទ​ប្រកាន់​ទៅ​អ្នក​ជាប់​ឃុំ​ទាំង​ប្រាំ​នោះ​ ត្រូវ​បាន​អ្នក​ឃ្លាំមើល​សិទ្ធិ​មើល​ឃើញ​ថា មាន​ភាព​មិន​ប្រក្រតី​ បើ​ធៀប​ និង​ការ​ចេញ​សេចក្តី​ថ្លែងការណ៍​របស់​អយ្យការ​អម​សាលាដំបូង​រាជធានី​ភ្នំពេញ​ ចំពោះ​ការ​ចូល​ខ្លួន​បំភ្លឺ​របស់​នាង​ស្រីមុំ​ នៅ​សាលាដំបូង​រាជធានី ​ទាក់​ទិន​ការ​ចោទ​ប្រកាន់​ថា​ នាង​បាន​«ផ្តល់​សក្ខីកម្ម​ក្លែងក្លាយ​ និង​ប្រព្រឹត្ត​អំពើ​ពេស្យា​ចារ»​ ដែល​ធ្វើ​ឡើង​ដោយ​អង្គភាព​ប្រឆាំង​អំពើ​ភេរវកម្ម​នៃ​ក្រសួង​មហាផ្ទៃ។​ ការ​ចូលខ្លួន​បំភ្លឺ​របស់​ស្រីមុំ បាន​កើត​ឡើង​កាល​ពី​ខែ​មេសា។

នាង ខុម ចាន់ដារាទី ឬ ស្រី មុំ ដែលគេចោទថាជាស្រីកំណាន់របស់លោក កឹម សុខា ប្រធានស្តីទីនៃគណបក្សជំទាស់ បានបញ្ចប់ការបំភ្លឺ របស់ខ្លួន នាទីស្តីការក្រសួងមហាផ្ទៃ នាយកដ្ឋានប្រឆាំងភេរវកម្ម អំពីខ្សែអាត់សំឡេង ដែលគេបង្ហោះក្នុងទំព័រហ្វេសប៊ុក នៅថ្ងៃទី១១ ខែមិនា ឆ្នាំ២០១៦។ (នៅ វណ្ណារិន/VOA)
នាង ខុម ចាន់ដារាទី ឬ ស្រី មុំ ដែលគេចោទថាជាស្រីកំណាន់របស់លោក កឹម សុខា ប្រធានស្តីទីនៃគណបក្សជំទាស់ បានបញ្ចប់ការបំភ្លឺ របស់ខ្លួន នាទីស្តីការក្រសួងមហាផ្ទៃ នាយកដ្ឋានប្រឆាំងភេរវកម្ម អំពីខ្សែអាត់សំឡេង ដែលគេបង្ហោះក្នុងទំព័រហ្វេសប៊ុក នៅថ្ងៃទី១១ ខែមិនា ឆ្នាំ២០១៦។ (នៅ វណ្ណារិន/VOA)


នៅគ្រានោះ​ បន្ទាប់​ពី​ការ​សាកសួរ​នាង​ស្រីមុំ​ អយ្យការ​អម​សាលា​ដំបូង​រាជធានី​ភ្នំពេញ​ បាន​ចេញ​សេចក្តី​ថ្លែងការណ៍​ប្រាប់​សាធារណជន​ថា​ ស្រី​មុំ បាន​ទទួល​ស្គាល់​ថា​ នាង​ពិត​ជា​ធ្លាប់​មាន​ទំនាក់​ទំនង​ជាមួយ​ ឈ្មោះ កឹម​ សុខា​ និង​បាន​ទទួល​ស្គាល់​«សំឡេង​ក្នុង​ខ្សែ​អាត់​ថា​ ជា​សំឡេង​របស់​ខ្លួន»។

លោក​ អំ​ សំអាត​ ​ប្រធាន​ការិយាល័យ​បច្ចេកទេស​ស៊ើប​អង្កេត​នៃ​អង្គការ​សិទ្ធិមនុស្ស​លីកាដូ​ សម្តែង​ការ​ងឿង​ឆ្ងល់​ចំពោះ​ភាព​មិន​ប្រក្រតី​នេះ​ថា៖​

«នេះ​វា គេ​មើល​ទៅ ​វា​ថា​វា​ អត់​ស្មើ​ភាព​គ្នា។ ហើយ​បើ​យើង​គិតថា​ វិជ្ជាជីវៈ​តុលាការ​ កាលណា​យើង​ធ្វើ​សេចក្តី​ថ្លែងការណ៍​ជា​សាធារណៈ​ប៉ះពាល់​រឿង​ក្តី​ អាហ្នឹង​វាត្រូវ​កុំ​ធ្វើ​ទាំង​អស់។ បើសិនជា​យើង​ធ្វើមួយ​ មួយ​មិន​ធ្វើ ​អាហ្នឹង​នាំ​ឲ្យ​គេ​មាន​មន្ទិល​សង្ស័យ​ ថា​ហេតុ​អ្វី​រឿង​ពាក់​ព័ន្ធ​ជាមួយ​អង្គហេតុ ​រឿង សាច់​រឿង​តែ​មួយ​ហ្នឹង​ អ្នក​ដែល​ពាក់​ព័ន្ធ​នឹង​រឿង​ហ្នឹង​ដែរ ម៉េច​ក៏មិន​ព្រម​ធ្វើ​សេចក្តី​ថ្លែងការណ៍​ជា​សាធារណៈ​ ឲ្យ​គេដឹង​មូលហេតុ​អី្វ​ឲ្យ​បាន​ប្រាកដ​ប្រជា​ក្នុង​ការ​ចោទប្រកាន់​នោះ»។

ប៉ុន្តែ​ លោក​ព្រះរាជ​រង ​លី​ សុផាន់ណា​ អ្នក​នាំ​ពាក្យ​តុលាការ​ក្រុង​ភ្នំពេញ​ បាន​ការពារ​ការ​ចោទ​ប្រកាន់​របស់​តុលាការ​ ហើយ​ថា​ តុលាការ​មិន​អាចធ្វើ​ដូច​តំណាង​អយ្យការ​ ក្នុង​ដំណាក់​ស៊ើប​សួរ​នេះ​បាន​ទេ។​

«រឿង​ហ្នឹង​ វា​ពាក់​ព័ន្ធ​ជាមួយ​នីតិ​វិធី​ពាក់​ព័ន្ធ​ជាមួយ​នឹង​ ការ​ស៊ើប​សួរ​ហ្នឹង​ណ៎ាបង​ អញ្ចឹងៗ​ ខាង​យើង​អត់​អាច​ជូន​ អត់​អាច​ជម្រាប​ជូន​បង​នូវ​សំណួរ​ដែល​បង​សួរ​បាន​ទេ»។​

ទាក់​ទិន​ការ​ចោទ​ប្រកាន់​ដដែល​នេះ​ អង្គការ​តម្លាភាព​អន្តរជាតិ​ បាន​ចេញ​សេចក្តី​ថ្លែង​ការណ៍​កាល​ពីថ្ងៃ​ច័ន្ទ​កន្លងទៅ​ អំពាវនាវ​ឲ្យ​អាជ្ញាធរ​កម្ពុជា​បញ្ឈប់​នូវ​ការ​យាយី​ទៅ​លើ​សង្គម​ស៊ីវិល។​ លោក​ស្រី​ អេលេណា​ ប៉ានហ្វី​ឡូវ៉ា​ (Elena Panfilova) ​អនុប្រធាន​ក្រុម​ប្រឹក្សា​ភិបាល​របស់​អង្គការ​តម្លាភាព​អន្តរ​ជាតិ​ ត្រូវ​បាន​ដកស្រង់​សម្តី​ដើម​នៅ​ក្នុង​សេចក្តី​ថ្លែងការ​ណ៍​នោះ​ថា៖​

«អង្គការ​តម្លាភាព​អន្តរជាតិ​ មាន​ការ​ព្រួយ​បារម្ភ​យ៉ាង​ខ្លាំង​ចំពោះ​ការ​កើន​ឡើង​នូវ​ការ​ជ្រៀត​ជ្រែក​ផ្នែក​នយោបាយ​ និង​ការ​គំរាម​កំហែង​ដល់​អ្នក​ការពារ​សិទ្ធិ​មនុស្ស​ និង​អ្នក​ប្រឆាំង​អំពើ​ពុករលួយ។​ អង្គភាព​ប្រឆាំង​អំពើ​ពុករលួយ​មិន​គួរ​អនុវត្ត​តួនាទី​ខ្លួន ​ដើម្បី​យាយី​ និង​ព្យាយាម​បំបិទ​សំឡេង​សកម្មជន​សង្គម​ស៊ីវិល​ឡើយ»។​

VOA មិន​អាច​ទាក់​ទង​ លោក​ ឱម​ យិនទៀង​ ប្រធាន​អង្គភាព​ប្រឆាំង​អំពើ​ពុករលួយ​បាន​ទេ​ នៅ​ថ្ងៃ​អង្គារ​នេះ។

នៅថ្ងៃ​អង្គារ​នេះ​ដែរ អង្គការ​ឃ្លាំ​មើល​សិទ្ធិមនុស្ស​ Human Rights Watch បាន​ចេញ​សេក្តីថ្លែង​ការណ៍​ ស្នើ​ឲ្យ​រដ្ឋាភិបាល​បញ្ឈប់​យុទ្ធនាការ​កាត់​បន្ថយ​ការ​ឃ្លាំមើល​សិទ្ធិ​ក្នុង​ប្រទេស​កម្ពុជា។​ សេចក្តី​ថ្លែង​ការណ៍​ដដែល​នេះ​ សង្កត់ធ្ងន់​ថា​ ការ​យក​មក​កាត់​ទោស​ ដែល​មាន​ការ​ជាប់​ទាក់​ទង​នឹង​នយោបាយ​ គំរាម​កំហែង​ដល់​រាល់​កិច្ចការ​សិទ្ធិ​មនុស្ស៕

1 comment:

Anonymous said...

«សមាគមយុវជនកំណែទម្រង់រដ្ឋយល់ឃើញថា ខ្លឹមសារនៃសេចក្តីថ្លែងការណ៍របស់អង្គការ សមាគម ចំនួន២៧ ចុះថ្ងៃទី២៨ ខែមេសា ឆ្នាំ២០១៦ ស្តីពី សង្គមស៊ីវិលអំពាវនាវ​ឲ្យអាជ្ញាធរបញ្ឈប់ជាបន្ទាន់នូវការយាយីដល់អ្នកការពារសិទ្ធិមនុស្ស និង សេចក្តីថ្លែងការណ៍របស់ ក្រុមសមាជិកសភាគណបក្សសង្រ្គោះជាតិ ចុះថ្ងៃទី០៣ ខែឧសភា ឆ្នាំ២០១៦ មិនបានបកស្រាយលក្ខណៈផ្លូវច្បាប់ មានលក្ខណៈលម្អៀង ក្រោមចេតនា ការពារជនប្រព្រឹត្ត បទល្មើស ខណៈពេលដែលតុលាការមានសាក្សី និងភស្តុតាងដាក់បន្ទុក»។

សមាគមយុវជនកំណែទម្រង់រដ្ឋ បានអំពាវនាវអ្នកនយោបាយ អ្នកវិភាគឯករាជ្យ អង្គការ សមាគមទាំង២៧ ខាងលើមេត្តាពិនិត្យ និងពិចារណា ឡើងវិញនូវនីតិវិធីច្បាប់ ក៏ដូចជា ច្បាប់នានាដែលពាក់ព័ន្ធ ព្រោះថា ការអនុវត្តច្បាប់របស់ស្ថាប័នមានសមត្ថកិច្ច មិនមែនជាការយាយី ឫការគំរាម គំហែងដល់បុគ្គល រឺស្ថាប័នណាមួយនោះទេ ផ្ទុយទៅវិញ អ្នកនយោបាយ អ្នកវិភាគឯករាជ្យនិងអង្គការ សមាគមទាំង២៧ ខាងលើ គប្បីស្វែងរកគន្លឹះ ផ្លូវច្បាប់ ភស្តុតាង និងសាក្សីដោះបន្ទុកតតាំងផ្នែកច្បាប់ ជាជាងការតវ៉ាដល់គ្មានមូលដ្ឋានច្បាប់៕