ដោយ យាង សុជាមេត្តា
2015-10-02 rfa
ប្រធានគណបក្សសង្គ្រោះជាតិ លោក សម រង្ស៊ី អះអាងថា គណបក្សប្រឆាំងមួយនេះនឹងមិនធ្វើបាបអ្នកមានទ្រព្យធនពេលខ្លួនឡើងកាន់អំណាច ដូចការចោទប្រកាន់របស់រដ្ឋាភិបាលឡើយ។
ការអះអាងរបស់លោក សម រង្ស៊ី បែបនេះ ធ្វើឡើងនៅក្នុងសិក្ខាសាលាស្ដីពី "ដំណើរឆ្ពោះទៅរកការបោះឆ្នោត ដើម្បីនាំមកនូវការផ្លាស់ប្ដូរ" ដែលរៀបចំដោយគណបក្សសង្គ្រោះជាតិ នៅថ្ងៃទី២ ខែតុលា នាសណ្ឋាគារ អ៊ីមភើរៀល (Imperial Garden) រាជធានីភ្នំពេញ។
លោក សម រង្ស៊ី ថ្លែងថា អ្នកមានទ្រព្យសម្បត្តិដែលរកស៊ីសុចរិតត្រឹមត្រូវ មិនត្រូវព្រួយបារម្ភថា ខ្លួននឹងត្រូវគេធ្វើបាបនោះទេ ពេលដែលគណបក្សសង្គ្រោះជាតិ ឈ្នះឆ្នោតដឹកនាំប្រទេស។ ការលើកឡើងរបស់លោក សម រង្ស៊ី បែបនេះ ទំនងជាលោកមានបំណងឆ្លើយតបទៅនឹងការលើកឡើងរបស់លោកនាយករដ្ឋមន្ត្រី ហ៊ុន សែន ដែលកាលពីពេលកន្លងទៅនេះ បានថ្លែងឲ្យអ្នកមានប្រយ័ត្នខ្លួន ពេលបក្សប្រឆាំងឡើងកាន់អំណាច។
នៅចំពោះមុខមន្ត្រី ប្រធាន អនុប្រធានក្រុមការងារ និងប្រធានគណៈកម្មាធិការប្រតិបត្តិរាជធានី-ខេត្ត គណបក្សសង្គ្រោះជាតិ ជាង ១៥០នាក់ លោក សម រង្ស៊ី លើកឡើងថា ការចោទប្រកាន់ទៅលើបក្សប្រឆាំងថា ស្អប់អ្នកមាន ឬនឹងធ្វើបាបអ្នកមាន គឺមិនត្រឹមត្រូវឡើយ។ លោកថា គណបក្សសង្គ្រោះជាតិ គឺជាបក្សសេរីនិយម ប្រជាធិបតេយ្យនិយម មិនមែនជាពួកកុម្មុយនិស្តផ្ដាច់ការដែលស្អប់អ្នកមានដូចខ្មែរក្រហមនោះទេ។
លោក សម រង្ស៊ី៖ «ថាគណបក្សសង្គ្រោះជាតិ គឺស្អប់អ្នកមាន តែឡើងមកកាន់អំណាចកម្ចាត់អ្នកមាន យកទ្រព្យសម្បត្តិពីអ្នកមានទាំងអស់ទៅចែកអ្នកក្រ រហូតដល់សម្លាប់អ្នកមាននេះ មិនមែនជាទ្រឹស្ដីម៉ាកលេនីន ទេ នេះជាទ្រឹស្ដីខ្មែរក្រហម អ្នកណាដែលនិយាយអ៊ីចឹង ប្រហែលមានអនុស្សាវរីយ៍ខ្មែរក្រហមច្រើន»។
លោក សម រង្ស៊ី ថ្លែងបន្តថា នៅក្នុងប្រទេសប្រជាធិបតេយ្យជឿនលឿន ដូចសហរដ្ឋអាមេរិក ឬបារាំង ក្តី គេត្រូវការអ្នកមានដើម្បីអភិវឌ្ឍប្រទេសរបស់គេ។ យ៉ាងណាក៏ដោយ លោកថា ដើម្បីឲ្យសង្គមគោរព ឬឲ្យតម្លៃ លុះណាតែអ្នកមាននោះជាមនុស្សរកស៊ីដោយស្របច្បាប់ សុចរិត មិនបៀតបៀន កេងប្រវ័ញ្ច ជាន់ឈ្លីអ្នកតូចទាប ដើម្បីបានជាប្រយោជន៍របស់ខ្លួន។ ត្រង់ចំណុចនេះហើយ ទើបលោក សម រង្ស៊ី ក្រើនរម្លឹកថា អ្នកមានទ្រព្យសម្បត្តិដែលបានមកដោយការរកស៊ីត្រឹមត្រូវ មិនចាំបាច់ខ្លាចថា គេនឹងធ្វើបាបខ្លួននោះទេ ពេលដែលមានការផ្លាស់ប្ដូររដ្ឋាភិបាលថ្មី។
លោក សម រង្ស៊ី ថ្លែងដែរថា ពេលគណបក្សសង្គ្រោះជាតិ ឈ្នះឆ្នោត បក្សប្រឆាំងមួយនេះ នឹងបង្កើតឲ្យមានប្រព័ន្ធតុលាការមួយឯករាជ្យ មិនស្ថិតក្រោមគំនាបរបស់អ្នកនយោបាយ។ លោកថា មានតែតុលាការឯករាជ្យទេ ទើបអាចសម្រេចសេចក្ដីថា អ្នកណាខុស អ្នកណាត្រូវពិតប្រាកដ។
លោក សម រង្ស៊ី ក៏មិនភ្លេចក្រើនរម្លឹកអ្នកមានដែលរកស៊ីទុច្ចរិត ឲ្យបញ្ឈប់ការរកស៊ីមិនត្រឹមត្រូវរបស់ខ្លួន ដើម្បីជៀសវាងកុំឲ្យតុលាការចាត់ការខ្លួនពេលដែលកម្ពុជា មានតុលាការមួយត្រឹមត្រូវ និងឯករាជ្យ៖ «ក្នុងអំណាចផ្ដាច់ការ តុលាការគឺតាមបញ្ជា យើងអត់ធ្វើអ៊ីចឹងទេ យើងមិនឲ្យមានអ្នកណាទៅចង្អុលឲ្យតុលាការធ្វើនេះធ្វើនោះទេ យើងត្រូវឲ្យតុលាការស៊ើបអង្កេតពេលមានពាក្យបណ្ដឹង។ ខ្ញុំជឿថា គណបក្សសង្គ្រោះជាតិ ឈ្នះឆ្នោត ប្រជារាស្ត្រច្រើនណាស់នឹងដាក់ពាក្យបណ្ដឹងរកយុត្តិធម៌។ ជម្រាបបងប្អូនពលរដ្ឋខ្មែរទាំងអស់ បងប្អូនរង់ចាំ ពេលសង្គ្រោះជាតិឈ្នះឆ្នោតឆ្នាំ២០១៨ បងប្អូនដាក់ពាក្យទៅតុលាការឯករាជ្យ តុលាការចាំទទួលពាក្យបណ្ដឹងបងប្អូន»។
នេះជាលើកទី១ ដែលលោក សម រង្ស៊ី បានថ្លែងសារនយោបាយជាសាធារណៈឆ្លើយតបទៅនឹងការលើកឡើងរបស់លោក ហ៊ុន សែន ចាប់តាំងពីលោកវិលត្រឡប់ពីបរទេសវិញ កាលពីថ្ងៃទី១៣ ខែកញ្ញា។
ឆ្លើយតបចំពោះការលើកឡើងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា អ្វីដែលលោក សម រង្ស៊ី លើកឡើងគឺគ្រាន់តែជាសារដើម្បីឃោសនា នយោបាយ និងបំភ័ន្តមតិបោកបញ្ឆោតប្រជាពលរដ្ឋប៉ុណ្ណោះ។ លោកថា កន្លងមកទាំងលោក សម រង្ស៊ី និងលោក កឹម សុខា តែងចាត់ទុកអ្នកមានថាជាថៅកែចិត្តខ្មៅ ឧកញ៉ាចិត្តខ្មៅ ឬអ្នកវិនិយោគចិត្តខ្មៅ។
លោកថា ចំណុចនេះហើយដែលបង្ហាញថា មេបក្សប្រឆាំងជាអ្នកនយោបាយរើសអើងវណ្ណៈនៅក្នុងសង្គមកម្ពុជា៖ «គាត់ថា បើគាត់ឈ្នះឆ្នោត គឺគាត់រឹបអូសទ្រព្យសម្បត្តិដីធ្លីរបស់អ្នកមានទៅចែកឲ្យអ្នកក្រ នេះជានយោបាយខ្មែរក្រហម គាត់មិនមែនខ្មែរក្រហមទេ តែគាត់យកនយោបាយខ្មែរក្រហមមកអនុវត្ត ធ្វើឲ្យប្រទេសជាតិច្របូកច្របល់។ រឿងនេះគាត់ថាតាំងពីឆ្នាំ១៩៩៥ មកម្ល៉េះ»។
យ៉ាងណាក៏ដោយ លោក សម រង្ស៊ី ថ្លែងថា គណបក្សសង្គ្រោះជាតិ នឹងមិនចាត់ទុកខ្មែរណាជាសត្រូវនោះទេ។ លើសពីនេះ លោកថា ពេលគណបក្សសង្គ្រោះជាតិ ឈ្នះឆ្នោត កម្ពុជាក៏គ្មានសង្គ្រាមអ្វីកើតឡើងនោះដែរ ទាំងសង្គ្រាមផ្ទៃក្នុង និងសង្គ្រាមជាមួយប្រទេសជិតខាង ដូចការលើកឡើងរបស់លោក ហ៊ុន សែន នៅពេលកន្លងមកនោះ។ លោកថា គណបក្សសង្គ្រោះជាតិ នឹងប្រើច្បាប់ និងសន្ធិសញ្ញាអន្តរជាតិ ព្រមទាំងតុលាការយុត្តិធម៌អន្តរជាតិ ដើម្បីដោះស្រាយជម្លោះជាមួយប្រទេសជិតខាង៕
No comments:
Post a Comment