តុលាការខេត្តកំពង់ធំដោះលែងពលរដ្ឋ៣នាក់ពាក់ព័ន្ធរឿងដីធ្លីឲ្យនៅក្រៅឃុំបណ្ដោះអាសន្ន
អ្នកស្រី ឃាង សុខលាង (ពីឆ្វេងទី២) អ្នកស្រី ឃាង សុខលាប (ពីឆ្វេងទី៣) លោក ចង់ ប៊ុនធឿន (ស្ដាំ) រស់នៅភូមិសូងសាង ឃុំក្រយា ស្រុកសន្ទុក ខេត្តកំពង់ធំ ត្រូវតុលាការសម្រេចដោះលែងឲ្យនៅក្រៅឃុំបណ្ដោះអាសន្ននៅរសៀលថ្ងៃទី២០ ខែកញ្ញា ឆ្នាំ២០១៥។
Photo LICADHO
តុលាការខេត្តកំពង់ធំ សម្រេចដោះលែងប្រជាពលរដ្ឋបីនាក់នៅឃុំក្រយា ស្រុកសន្ទុក ពាក់ព័ន្ធរឿងដីធ្លី ឲ្យនៅក្រៅឃុំបណ្ដោះអាសន្ននៅរសៀលថ្ងៃទី២០ កញ្ញា។ ការដោះលែងនេះ ធ្វើឲ្យពលរដ្ឋទាំងនោះរីករាយ ដោយអះអាងថា ពួកគេមិនបានប្រព្រឹត្តដូចការចោទប្រកាន់របស់សមត្ថកិច្ចឡើយ។
ដីកាសម្រេចដែលចេញដោយចៅក្រមស៊ើបសួរ នៃសាលាដំបូងខេត្តកំពង់ធំ គឺលោក អ៊ីវ បូរិន្ទ នៅថ្ងៃទី២០ កញ្ញា បានសម្រេចដាក់ជនទាំងបីនាក់ឲ្យស្ថិតនៅក្រោមការត្រួតពិនិត្យតាមផ្លូវរបស់តុលាការ។ ក្នុងដីកាបញ្ជាក់ថា ការសម្រេចនេះព្រោះសំណុំរឿងមួយនេះនៅមិនទាន់ស៊ើបអង្កេតឲ្យបានពេញលេញនៅឡើយ ទើបតុលាការសម្រេចមិនឃុំខ្លួនជនដែលត្រូវចោទទាំងនោះ។
យ៉ាងណា ក្នុងដីកាបានឲ្យដឹងទៀតថា ដើម្បីធានាបានថា ជនត្រូវចោទមានវត្តមាននៅចំពោះមុខតុលាការ និងជៀសវាងដល់ការរាំងស្ទះនៃនីតិវិធីស៊ើបសួរ ទើបខាងចៅក្រមសម្រេចដាក់ជនត្រូវចោទទាំងនោះ ឲ្យស្ថិតនៅក្រោមការត្រួតពិនិត្យរបស់តុលាការ។ ម្យ៉ាង គឺឲ្យស្របតាមមាត្រា២២៣ មាត្រា២២៦ និងមាត្រា២៣០ នៃក្រមនីតិវិធីព្រហ្មទណ្ឌ។
វិទ្យុអាស៊ីសេរី នៅមិនទាន់អាចទាក់ទងចៅក្រមស៊ើបសួរ លោក អ៊ីវ បូរិន្ទ ដើម្បីសាកសួរបន្ថែមលើបញ្ហានេះបានទេ នៅថ្ងៃទី២០ កញ្ញា។
ទោះជាបែបនេះក្តី ក្នុងដីកាសម្រេចបញ្ជាក់ថា ជនដែលត្រូវចោទទាំងបីនាក់ គឺស្ថិតនៅក្រោមការត្រួតពិនិត្យតាមផ្លូវតុលាការ រួមមាន ពលរដ្ឋទាំងនោះមិនត្រូវផ្លាស់ប្ដូរទីលំនៅដោយគ្មានការអនុញ្ញាតពីចៅក្រមស៊ើបសួរ ត្រូវបង្ហាញខ្លួននៅប៉ុស្តិ៍នគរបាលឃុំក្រយា រាល់មួយខែម្តង។ លើសពីនេះ ពួកគេត្រូវឆ្លើយតបទៅនឹងការកោះហៅរបស់ចៅក្រម ឬព្រះរាជអាជ្ញានៃសាលាដំបូងខេត្តកំពង់ធំ។ ជាមួយគ្នានេះ ពលរដ្ឋទាំងបីនាក់មិនត្រូវទៅកាន់តំបន់មានជម្លោះ ឬក៏កាន់កាប់ដីរដ្ឋនៅកន្លែងកើតហេតុឡើយ។
កាលពីថ្ងៃទី១៨ កញ្ញា មន្ត្រីរដ្ឋបាលព្រៃឈើស្រុកសន្ទុក សហការជាមួយសមត្ថកិច្ច ក្រោមការដឹកនាំដោយមន្ត្រីតុលាការ បានចាប់ខ្លួនពលរដ្ឋបីនាក់ រួមមាន អ្នកស្រី ឃាង សុខលាង អ្នកស្រី ឃាង សុខលាប ត្រូវជាបងប្អូននឹងគ្នា ព្រមទាំង លោក ចង់ ប៊ុនធឿន ជាប្ដីរបស់ អ្នកស្រី ឃាង សុខលាង ពាក់ព័ន្ធរឿងចូលកាន់កាប់ដីរបស់រដ្ឋដោយខុសច្បាប់។ ពួកគេជាប្រជាពលរដ្ឋនៅភូមិសូងសាង ឃុំក្រយា និងជាកម្មករក្រុមហ៊ុនចម្ការកៅស៊ូវៀតណាម ឈ្មោះ តានបៀន (Tan Bien) នៅទីនោះ។
យ៉ាងណា ពលរដ្ឋម្នាក់ក្នុងចំណោមបីនាក់ គឺអ្នកស្រី ឃាង សុខលាប សម្ដែងអារម្មណ៍ត្រេកអរ ខណៈតុលាការសម្រេចដោះលែងពួកគេ។ អ្នកស្រីអះអាងថា ពួកគាត់ទាំងបីនាក់មិនបានប្រព្រឹត្តដូចការចោទប្រកាន់របស់មន្ត្រីរដ្ឋបាលព្រៃឈើឡើយ ប៉ុន្តែស្របពេលអាជ្ញាធរចុះរកចាប់ខ្លួនឪពុកអ្នកស្រីមិនបាន ទើបឈានទៅចាប់ខ្លួនពួកគាត់៖ «ខ្ញុំអត់បានមកតវ៉ា បងថ្លៃខ្ញុំហ្នឹងអត់បានមកតវ៉ាទេ ប៉ុន្តែពេលគេចាប់ទៅ ខ្ញុំនិងបងស្រីខ្ញុំហ្នឹងឃើញអ៊ីចឹង ក៏មានអារម្មណ៍ថាភ័យ ហើយទៅ ខ្ញុំក៏ជួយចាប់ដៃសួរប៉ូលិសថា ចាប់បងថ្លៃខ្ញុំធ្វើអី? ហើយក៏គ្រវែងគ្រវាត់គ្នា ហើយក៏ចាប់ខ្ញុំ បងខ្ញុំ បងថ្លៃខ្ញុំដក់ខ្នោះ»។
ទាក់ទងករណីនេះ មន្ត្រីសម្របសម្រួលនៃអង្គការការពារសិទ្ធិមនុស្សលីកាដូ (LICADHO) ខេត្តកំពង់ធំ លោក ញ៉ូង សាមឿន មានប្រសាសន៍ថា ការដោះលែងពលរដ្ឋទាំងបីនាក់ឲ្យនៅក្រៅឃុំ គឺជាការសម្រេចមួយដ៏ត្រឹមត្រូវ ព្រោះពួកគេទាំងនោះមិនបានធ្វើខុសដូចការចោទប្រកាន់ទេ៖ «អ៊ីចឹងខ្ញុំយល់ថា ការដោះលែងឲ្យនៅក្រៅឃុំនេះ គឺត្រឹមត្រូវតាមនីតិវិធីហើយ ពីព្រោះគាត់ពិនិត្យអង្គហេតុ និងអង្គច្បាប់ទៅ ឃើញថា ពួកដែលសមត្ថកិច្ចចាប់ខ្លួនមកនេះ គឺមិនបានប្រព្រឹត្តបទល្មើសដោយផ្ទាល់នោះទេ»។
យ៉ាងណា ក្នុងដីកាសម្រេចរបស់តុលាការបញ្ជាក់ថា ប្រសិនបើពលរដ្ឋទាំងនោះគេចវេសពីកាតព្វកិច្ចត្រួតពិនិត្យរបស់តុលាការដោយចេតនា ខាងចៅក្រមស៊ើបសួរក៏អាចសម្រេចឃុំខ្លួនជនទាំងនោះបណ្ដោះអាសន្នបានតាមមាត្រា២៣០ នៃក្រមព្រហ្មទណ្ឌ។ រីឯមន្ត្រីសិទ្ធិមនុស្សដដែលលើកឡើងថា ការអនុវត្តច្បាប់ត្រឹមត្រូវ គឺជួយលើកតម្កើងដល់មុខមាត់តុលាការខេត្តកំពង់ធំ បានច្រើន ពីព្រោះកន្លងមក លោកសង្កេតឃើញថា តុលាការខេត្តនេះមិនបានលើកកម្ពស់ការអនុវត្តផ្លូវច្បាប់ឲ្យបានត្រឹមត្រូវដូចករណីនេះទេ៕
No comments:
Post a Comment