ដោយ៖ ស៊ុន ណារិន | ថ្ងៃអង្គារ ទី16 មិថុនា 2015,
រដ្ឋមន្រ្តីក្រសួងការបរទេសកម្ពុជា លោក ហោ ណាំហុង នៅថ្ងៃអង្គារនេះ បានផ្ញើលិខិតមួយទៅប្រធានរដ្ឋសភា លោក ហេង សំរិន ដោយបានបញ្ជាក់ប្រាប់ថារូបលោកបានដាក់កំណត់ទូតទៅរដ្ឋាភិបាលវៀតណាមអំពីការឈ្លានពានរបស់វៀតណាមមកលើដីកម្ពុជានៅខេត្តរតនគិរី។
លិខិតរបស់លោក ហោ ណាំហុង ចុះថ្ងៃទី១៦ ខែមិថុនា ស្តីពី«ការរំលោភបំពានលើទឹកដីកម្ពុជានៅតំបន់ផ្សេងៗពីសំណាក់ភាគីវៀតណាម» ឲ្យដឹងថាក្រសួងការបរទេសកម្ពុជា និងស្ថានទូតកម្ពុជាប្រចាំនៅទីក្រុងហាណូយ បានធ្វើកំណត់ទូតទៅរដ្ឋាភិបាលវៀតណាមអំពីការរំលោភបំពានលើទឹកដីកម្ពុជានៅតំបន់ផ្សេងៗ ចាប់ពីឆ្នាំ២០១៣ ដល់ឆ្នាំ២០១៥ ចំនួន៨ច្បាប់រួចមកហើយ ដោយមិនរាប់បញ្ចូលកំណត់ទូតដែលធ្វើឡើងកាលពីពេលថ្មីនេះ។ កាលពីថ្ងៃទី១២ និងថ្ងៃទី១៤ ខែមិថុនា ឆ្នាំ២០១៥ ក្រសួងការបរទេសកម្ពុជា បានចេញកំណត់ទូតចំនួនពីរទៅរដ្ឋាភិបាលវៀតណាម ពាក់ព័ន្ធនឹងការចូលជីកស្រះនៅស្រុកអូរយ៉ាដាវ ខេត្តរតនគិរី។
លិខិតរបស់លោក ហោ ណាំហុង បញ្ជាក់ថា«សូមជំរាបជូនសម្តេចអគ្គមហាពញាចក្រីជ្រាបថាកំណត់ទូតថ្ងៃទី១២ និងថ្ងៃទី១៤ខែមិថុនា ឆ្នាំ២០១៥ មិនមែនជាលើកទី១ទេ ដែលរាជរដ្ឋាភិបាលតាមរយៈក្រសួងការបរទេស និងសហប្រតិបត្តិការអន្តរជាតិបានតវ៉ាពីការរំលោភបំពានបូរណភាពទឹកដីកម្ពុជា ដូចមនុស្សខ្លះបាននិយាយ។ នេះដោយមិនគិតពីកំណត់ទូតដូចគ្នានេះ ដែលបានផ្ញើទៅរដ្ឋាភិបាលវៀតណាមមុនឆ្នាំ២០១៣ទៀតផង»។
អ្នកនាំពាក្យក្រសួងការបរទេសកម្ពុជា លោក ជុំ សន្ទរី ប្រាប់VODថាការរាយការណ៍របស់លោក ហោ ណាំហុង ទៅប្រធានរដ្ឋសភានេះ ចង់បញ្ជាក់ថានេះមិនមែនជាលើកទី១ទេ ដែលលោក ហោ ណាំហុង បានចេញកំណត់ទូតទៅរដ្ឋាភិបាលវៀតណាមអំពីការរំលោភបំពានដីកម្ពុជា។ លោកបញ្ជាក់ថា«យើងចង់រាយការណ៍ប្រាប់ ដោយសារមានអ្នកខ្លះលើកឡើងថានេះជាលើកទី១ដែលក្រសួងការបរទេសធ្វើកំណត់ទូតតវ៉ារឿងរំលោភដីរបស់វៀតណាម។ គាត់[ហោ ណាំហុង]មានការខិតខំខ្លាំងណាស់ក្នុងការដោះស្រាយបញ្ហាព្រំដែន មិនមែនតែជាមួយប្រទេសថៃទេ ថែមទាំងជាមួយប្រទេសវៀតណាម»។
កំណត់ទូតរបស់ក្រសួងការបរទេសកម្ពុជា កាលពីថ្ងៃទី១៤ខែមិថុនា ដែលផ្ញើទៅរដ្ឋាភិបាលវៀតណាមឲ្យដឹងថាក្រុមបច្ចេកទេសគណៈកម្មាធិការព្រំដែនកម្ពុជា និងអាជ្ញាធរខេត្តរតនគិរីបានរកឃើញស្រះចំនួន៣បន្ថែមទៀតនៅក្នុងព្រៃជ្រៅ ដែលវៀតណាមបានជីកចន្លោះបង្គោលព្រំដែនលេខ៣០ និង៤០ ក្នុងភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ដែលកន្លែងនោះមិនទាន់បានកំណត់ព្រំដែនច្បាស់លាស់នៅឡើយ។ កំណត់ទូតបញ្ជាក់ថាស្រះទឹកទី១មានទំហំ១២ម៉ែត្រគុណនឹង១៨ម៉ែត្រ ស្រះទឹកទី២មានទំហំ១៤,៥ម៉ែត្រគុណនឹង១៧ម៉ែត្រ និងស្រះទឹកទី៣ មានទំហំ១០ម៉ែត្រគុណនឹង២៤,៥ម៉ែត្រ។ កំណត់ទូតបន្ថែមថា រដ្ឋាភិបាលកម្ពុជាសូមស្នើឲ្យរដ្ឋាភិបាលវៀតណាមគោរពតាមចំណុចទី៨ នៃសេចក្ដីថ្លែងការណ៍រួមរវាងកម្ពុជា-វៀតណាម ដែលបានធ្វើនៅថ្ងៃទី១៧ ខែមករា ឆ្នាំ១៩៩៥ ។
ចំណែកកំណត់ទូតរបស់កម្ពុជាកាលពីថ្ងៃទី១២ ខែមិថុនា ឲ្យដឹងថាអាជ្ញាធរវៀតណាមបានជីកស្រះចំនួន៥នៅចន្លោះបង្គោលព្រំដែនលេខ៣០ និង៤០ នៅភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។
គួរបញ្ជាក់ថា កន្លងទៅ លោក ហោ ណាំហុង បានរងការរិះគន់ជាបន្តបន្ទាប់ ពាក់ព័ន្ធនឹងការអះអាងថាប្រជាជនខ្មែរនៅភូមិជើង ឃុំជាំ ស្រុកមេមត់ ខេត្តត្បូងឃ្មុំ បានដាំដំណាំចូលទឹកដីវៀតណាម៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
1 comment:
Well we are getting some where with sgno numgnow
Post a Comment