ចាប់តាំងពីសម្តេចអគ្គមហាសេនាបតីតេជោ បណ្ឌិតសភាចារ្យ ហ៊ុន សែន ហៅបុរសខ្លាំង នាយករដ្ឋមន្ត្រីនៃព្រះរាជាណាចក្រកម្ពុជា ផ្តល់សិទ្ធិអំណាចឲ្យទៅក្រសួងរ៉ែនិងថាមពល មានឯកឧត្តម ស៊ុយ សែម ជារដ្ឋមន្ត្រី គ្រប់គ្រងនិងចេញអាជ្ញាប័ណ្ណលើអាជីវកម្មបូមខ្សាច់រួមក គឺឯកឧត្តម ស៊ុយ សែម ក៏បានប្រើប្រាស់សិទ្ធិអំណាចក្នុងមុខរបរបូមខ្សាច់លក់នេះ ប្រគល់ឲ្យឯកឧត្តម ឧកញ៉ា ហ៊ឺ បាវី ប្រតិភូរាជរដ្ឋាភិបាល ទទួលបន្ទុកជាប្រធានអគ្គនាយកកំពង់ផែស្វយ័តរាជធានីភ្នំពេញ និងត្រូវជា"ដន្លងដងស្នែង"ជាមួយលោកស្រីឧកញ៉ា ស៊ុយ សុផាន នាយិកាក្រុមហ៊ុនផានអ៊ីម៉ិច បានធ្វើអាជីវកម្មមុនគេបង្អស់ ដោយក្រុមអាជីវកររកស៊ីខ្សាច់ផ្សេងៗទៀតត្រូវតែ"តម្រង់ជួរគ្នា"មកទិញខ្សាច់បន្តពីឯកឧត្តម ឧកញ៉ា ហ៊ឺ បាវី យកទៅលក់ឲ្យអតិថិជនរបស់ខ្លួន ធ្វើឲ្យឯកឧត្តម ស៊ុយ សែម និងឯកឧត្តម ឧកញ៉ា ហ៊ឺ បាវី មានឱកាស"បូមលុយ" ក្រោមលទ្ធផល "គ្រប់ទឹករួមគ្នា"តែម្តង ពីព្រោះមិនមានការឆ្លងកាត់តាមរយៈដេញថ្លៃប្រកបដោយតម្លាភាព ។
បច្ចុប្បន្ន ឯកឧត្តម ឧកញ៉ា ហ៊ឺ បាវី ត្រូវជាដន្លងដងស្នែងជាមួយលោកស្រីឧកញ៉ា ស៊ុយ សុផាន នោះ មានសិទ្ធិពេញទីលើការធ្វើអាជីវកម្មបូមខ្សាច់ ទាំងនៅទន្លេមេគង្គលើ ទាំងនៅទន្លេមេគង្គក្រោម ក្នុងទំហំផ្ទៃដីជាង២០០ហិកតា រួចហើយយកខ្សាច់លក់បន្តឲ្យទៅក្រុមអាជីវករផ្សេងៗទៀតដែលត្រូវការខ្សាច់ក្នុងតម្លៃខ្ពស់ ។
ក្រុមអាជីវករប្រកបរបរអាជីវកម្មខ្សាច់សំណង់ បាននិយាយរៀបរាប់ទាំងការឈឺចាប់ថា កាលពីពេលមុនតម្លៃខ្សាច់សំណង់ត្រូវបង់ត្រឹម០,២០កាក់(ដុល្លារអាមេរិក) តែពេលឯកឧត្តម ឧកញ៉ា ហ៊ឺ បាវី បានកាន់កាប់សិទ្ធិអំណាចលើអាជីវកម្មខ្សាច់ គឺត្រូវបង់ដល់០,២៥កាក់ ។ លើសពីនេះ ពេលមុនតម្លៃខ្សាច់សំណង់ត្រឹម២ដុល្លារអាមេរិកទៅ៣ដុល្លារអាមេរិកក្នុង១ម៉ែត្រគូប ប៉ុន្តែឥឡូវពេលទិញបន្តពីឯកឧត្តម ឧកញ៉ា ហ៊ឺ បាវី មានតម្លៃដល់៤,៥០ដុល្លារអាមេរិកក្នុង១ម៉ែត្រគូប ។
លោក ហ៊ឺ បាវី សមាជិកគណៈកម្មាធិការកណ្តាលគណបក្សប្រជាជនកម្ពុជា ទទួលបានការតែងតាំងជាប្រតិភូរាជរដ្ឋាភិបាល ទទួលបន្ទុកជាប្រធានអគ្គនាយកកំពង់ផែស្វយ័តរាជធានីភ្នំពេញ មានឋានៈស្មើរដ្ឋលេខាធិការ ដោយព្រះរាជក្រឹត្យលេខនស/រកត/០៨០៨/៩៤៤ ចុះថ្ងៃទី១៨ ខែសីហា ឆ្នាំ២០០៨ គឺមានឋានៈជា"ឯកឧត្តម" ។ ក្រោយមក ឯកឧត្តម ហ៊ឺ បាវី ក៏ទទួលបានការតែងតាំងជាឧកញ៉ាដោយព្រះរាជក្រឹត្យលេខនស/រកត/០៨១៤/១០០៧ ចុះថ្ងៃទី០៤ ខែសីហា ឆ្នាំ២០១៤ ពោលគឺមានឋានៈ និងមានងារជា"ឯកឧត្តម ឧកញ៉ា"ទល់សព្វថ្ងៃ ។
សូមបុរសខ្លាំងជាប្រមុខរាជរដ្ឋាភិបាល និងឯកឧត្តមបណ្ឌិត ឱម យ៉ិនទៀង ទេសរដ្ឋមន្ត្រី ទទួលបន្ទុកប្រធានអង្គភាពប្រឆាំងអំពើពុករលួយ មេត្តាចាត់វិធានការត្រួតពិនិត្យមើលបែបបទនៃការប្រគល់សិទ្ធិអំណាចលើការផ្តល់អាជ្ញាប័ណ្ណអាជីវកម្មខ្សាច់របស់ឯកឧត្តម ស៊ុយ សែម ទៅឲ្យឯកឧត្តម ឧកញ៉ា ហ៊ឺ បាវី ដែលមិនឆ្លងកាត់ការដេញថ្លៃនោះផង ពីព្រោះគាត់បាននិងកំពុងមានឱកាសបូមលុយពីការបូមខ្សាច់លក់ ក្រោមលទ្ធផល"គ្រប់ទឹករួមគ្នា"សម្បើមណាស់ ខណៈក្រុមអាជីវករខ្សាច់តូចតាចឯទៀតៗកំពុង"ថ្ងូរដូចព្រាប"គ្រប់ៗគ្នាហើយ ៕
No comments:
Post a Comment