ដោយ៖ ញឹម សុខន | ថ្ងៃសុក្រ ទី15 ឧសភា 2015,
ស្តាប់សំឡេង៖ | ចម្លងទុក |
លោក សម រង្ស៊ី នាពេលកន្លងមក
មេដឹកនាំបក្សប្រឆាំង លោក សម រង្ស៉ី ឲ្យដឹងពីក្រៅប្រទេសមកថា លោកនឹងជួបជាមួយលោកនាយករដ្ឋមន្ត្រី ហ៊ុន សែន នៅពេលឆាប់ៗនេះ ដើម្បីពិភាក្សាពីបញ្ហាព្រំដែន ខណៈមន្ត្រីរបស់ខ្លួនបានរកឃើញជាបន្តបន្ទាប់ថា វៀតណាមបានលួចរំកិលព្រំដែន រំលោភបូរណភាពទឹកដីកម្ពុជា ។
ប្រធានគណបក្សសង្គ្រោះជាតិ លោកសម រង្សី ដែលកំពុងទស្សនៈកិច្ចនៅសហរដ្ឋអាមេរិកបានអះអាងក្នុងកម្មវិធីតុមូលរបស់វិទ្យុអាស៊ីសេរី នៅយប់ថ្ងៃទី១៤ ខែឧសភាថា នៅពេលលោកវិលត្រឡប់មកកម្ពុជាវិញ នៅដើមខែក្រោយនេះ តាមរយៈវប្បធម៌សន្ទនា លោកនឹងពិភាក្សាជាមួយលោកនាយករដ្ឋមន្ត្រី ហ៊ុន សែន ពីបញ្ហាជាតិធំៗ ដូចជាបញ្ហាពលករចំណាកស្រុក និងបញ្ហាព្រំដែនកម្ពុជា-វៀតណាម។
លោកថ្លែងថា «បញ្ហាព្រំដែន បញ្ហាបូរណភាពទឹកដីគឺបញ្ហាអាយុជីវិតជាតិ ដូច្នេះ ច្បាស់ជាយករឿងព្រំដែនហ្នឹងជាប្រធានបទមួយដ៏សំខាន់ក្នុងការសន្ទនា ដើម្បីអនុវត្តវប្បធម៌សន្ទនាហ្នឹង» ។
ការប្រកាសជួបលោកនាយករដ្ឋមន្ត្រី ដើម្បីពិភាក្សាពីបញ្ហាព្រំដែន របស់មេបក្សប្រឆាំងនេះ ធ្វើឡើងបន្ទាប់ពីតំណាងរាស្ត្របក្សប្រឆាំងរកឃើញថា វៀតណាមបានធ្វើផ្លូវចូលដីខ្មែរជិត៥០គីឡូម៉ែត្រ នៅឃុំដាក់ដាំ ស្រុកអូរាំង ខេត្តមណ្ឌលគិរី វៀតណាមចូលបាញ់ថ្មាំពុលបំផ្លាញដំណាំពលរដ្ឋខ្មែរអស់១០ហិកតានៅខេត្តត្បូងឃ្មុំ និងធ្វើព្រែករំលោភចូលដីខ្មែរ ប្រមាណជា១គីឡូម៉ែត្រទៀត នៅតំបន់ទត់ហន់ ក្នុងឃុំព្រែកគ្រីស ស្រុកកំពង់ត្រាច ខេត្តកំពតជាដើម ។
លោក សម រង្ស៉ីឲ្យដឹងទៀតថា វប្បធម៌សន្ទនា ដែលរូបលោក និងលោក ហ៊ុន សែន បានឯកភាពគ្នាបង្កើតឡើង នាពេលថ្មីនេះ ជារបត់នយោបាយថ្មីមួយ ជំរុញឲ្យអ្នកនយោបាយខ្មែរចេះធ្វើការរួមគ្នា ដើម្បីដោះស្រាយបញ្ជាជាតិធំៗ ដោយមិនបង្ហូរឈាមដូចសម័យអតីតកាល ។
លោក សម រង្ស៉ីឲ្យដឹងទៀតថា បញ្ហាពលករចំណាកស្រុកក៏ជារឿងសំខាន់ដែលលោកត្រូវជជែកជាមួយរាជរដ្ឋាភិបាលដែរ ដើម្បីបង្កើនជីវភាពដល់ពលរដ្ឋខ្លួនឯងផង និងដើម្បីទប់ស្កាត់ ជនបរទេសខុសច្បាប់ នៅកម្ពុជាផងដែរ ។ លោកបន្តថា«ធ្វើម៉េចកុំឲ្យកសិករខ្មែរអស់សង្ឃឹម ចំណាកស្រុកទៅក្រៅអស់ ពេលទៅក្រៅអស់ អន្តោប្រវេសន៍ខុសច្បាប់ចូលមករស់ពេញទឹកពេញដីនៅស្រុកខ្មែរ គ្រោះថ្នាក់ធំណាស់សម្រាប់វាសនាអនាគតប្រទេសជាតិយើង» ។
វប្បធម៌សន្ទនានេះ ត្រូវបានលោកនាយករដ្ឋមន្ត្រី ហ៊ុន សែន ចេញបញ្ជាឲ្យមន្ត្រីគ្រប់មូលដ្ឋាន អនុវត្តឲ្យមានប្រសិទ្ធភាព និងឃ្លាំមើល ពីសកម្មភាពបក្សប្រឆាំង ដើម្បីឲ្យប្រាកដថា ការប្រកួតប្រជែងផ្នែកនយោបាយ មិនប្រើពាក្យ អុសរោះ វាយប្រហារដៃគូប្រកួត ។
ជាងនេះទៅទៀត លោកនាយករដ្ឋមន្ត្រីធ្លាប់អះអាង ចំពោះមុខតំណាងរាស្ត្រទាំងពីរគណបក្សក្នុងរដ្ឋសភា អំឡុងខែមេសាឆ្នាំ២០១៥ថា មានតែវប្បធម៌សន្ទនាទេ ដែលធ្វើឲ្យខ្មែរគ្រប់និន្នាការ អាចរស់នៅជាមួយគ្នា បានដោយគ្មានការសងសឹក និងជំរុញឲ្យអ្នកនយោបាយ ត្រូវពង្រឹងវប្បធម៌សន្ទនា ឲ្យបានដល់កូនចៅជំនាន់ក្រោយទៀត ដើម្បីជាសេចក្តីសុខរបស់គ្រួសារខែ្មរ ។
សាស្ត្រាចារ្យវិទ្យាសាស្ត្រនយោបាយ លោក សូ ចន្ថា អះអាងថា ព្រំដែនជាអាយុជីវិតជាតិ ដោយលោកជំរុញឲ្យអ្នកនយោបាយត្រូវបង្ហាញពីតម្លាភាព ដើម្បីគេចចេញពីទម្លាប់ចាស់ ដែលអ្នកនយោបាយខ្មែរ ធ្លាប់កាត់ដីឲ្យប្រទេសជិតខាង ដើម្បីពង្រឹងអំណាច ។ លោកថា «ការលាក់បាំងទាំងអស់ហ្នឹងដែលធ្វើឲ្យប្រជាពលរដ្ឋហ្នឹងគាត់យល់ថា អាការបាត់បង់ទឹកដីអីជាដើមហ្នឹង ហាក់ដូចជារដ្ឋាភិបាលកំពុងកំណត់ព្រំដែន ធ្វើឲ្យបាត់បង់ទឹកដីរបស់គាត់ដែលធ្លាប់ធ្វើតាំងពីដូនតាមកអញ្ចឹង»។
យ៉ាងណាក៏ដោយ បញ្ហាព្រំដែននេះ លោកនាយករដ្ឋមន្ត្រី ធ្លាប់ចូលបកស្រាយក្នុងសភាជាង៥ម៉ោង កាលពីឆ្នាំ២០១២ ដោយមិនឲ្យតំណាងរាស្ត្រណាម្នាក់សួរដេញដោល ។ ក្នុងកិច្ចបំភ្លឺនោះ លោក នាយករដ្ឋមន្ត្រី ហ៊ុន សែន អះអាងថា កម្ពុជាមិនបានបាត់បង់ទឹកដីទៅប្រទេសជិតខាងដូចការចោទប្រកាន់ទេ ។
សាស្ត្រាចារ្យវិទ្យាសាស្ត្រនយោបាយមួយរូបទៀត គឺលោក រស់ រ៉ាវុធ ពន្យល់ដែរថា បើអ្នកនយោបាយខ្មែរ នៅតែចោទប្រកាន់គ្នាទៅវិញទៅមក ដោយមិនបង្ហាញពីឆន្ទៈពិតឲ្យភាគីពាក់ព័ន្ធ រួមទាំងប្រទេសវៀតណាមផងបំភ្លឺករណីនេះ ដើម្បីស្វែងរកដំណោះស្រាយទេ នោះពលរដ្ឋខ្មែរជាអ្នកខាតបង់ ហើយប្រទេសជិតខាងជាអ្នកចំណេញ ពីជម្លោះផ្ទៃក្នុងនៃក្រុមគ្រួសារខ្មែរនេះ ៕
សូមសរសេរមកលោក ញឹម សុខន តាមរយៈ sokhorn@vodhotnews.com
1 comment:
Khmers do not fight Khmers.
Khmers fight Yuon sold-out Khmers.
To solve Khmer problems, prosecute
Hanoi key leaders.
Post a Comment