ដោយ ថា កិត្យា
2015-05-26 rfa
2015-05-26 rfa
 |
ប្រធានរដ្ឋសភា លោក ហេង សំរិន (ជួរមុខ កណ្ដាល) ក្នុងពិធីបើកសិក្ខាសាលាស្ដីពីការឈ្វេងយល់ពីច្បាប់ និងការអនុវត្តច្បាប់ស្ដីពីការប្រឆាំងអំពើពុករលួយនាវិមានរដ្ឋសភា នៅថ្ងៃទី២៦ ឧសភា ឆ្នាំ២០១៥។
RFA/Tha Kitya
|
ប្រធានរដ្ឋសភា អំពាវនាវឲ្យក្រសួងស្ថាប័នពាក់ព័ន្ធ ជាពិសេសអង្គភាពប្រឆាំងអំពើពុករលួយ ពង្រឹងតួនាទីអប់រំ ទប់ស្កាត់ និងចាត់វិធានការច្បាប់បង្ក្រាបអំពើពុករលួយ ដែលជាជំងឺដ៏រ៉ាំរ៉ៃនៅក្នុងសង្គមកម្ពុជា ដែលមិនអាចលុបបំបាត់បានទាំងស្រុងនៅឡើយ។ តំណាងរាស្ត្របក្សប្រឆាំង និងសង្គមស៊ីវិល រិះគន់ផង និងសាទរផងចំពោះចំណាត់ការរបស់អង្គភាពប្រឆាំងអំពើពុករលួយរបស់រាជរដ្ឋាភិបាលកន្លងមក។
អំពើពុករលួយ គឺជាឧបសគ្គ និងធ្វើឲ្យបាត់បង់ថវិកាជាតិរាប់លានដុល្លារក្នុង ១ឆ្នាំៗ ដែលជះឥទ្ធិពលយ៉ាងធ្ងន់ធ្ងរដល់ការអភិវឌ្ឍសង្គម សេដ្ឋកិច្ច ស្ថិរភាពនយោបាយ និងការបែងចែកភោគផលសេដ្ឋកិច្ចប្រកបដោយសមធម៌ និងស្មើភាព ព្រមទាំងការវិវត្តន៍នៃលទ្ធិប្រជាធិបតេយ្យនៅកម្ពុជា។
ថ្លែងក្នុងពិធីបើកសិក្ខាសាលាស្ដីពីការឈ្វេងយល់ពីច្បាប់ និងការអនុវត្តច្បាប់ស្ដីពីការប្រឆាំងអំពើពុករលួយនៅវិមានរដ្ឋសភា នៅថ្ងៃទី២៦ ឧសភា លោក ហេង សំរិន ប្រធានរដ្ឋសភាកម្ពុជា មានប្រសាសន៍ថា អំពើពុលរលួយគឺជាជំងឺមួយប្រភេទដែលពិបាកទប់ស្កាត់ ព្យាបាល និងលុបបំបាត់។ ដូច្នេះ លោកអំពាវនាវឲ្យមានឆន្ទៈ និងប្ដេជ្ញាចិត្តខ្ពស់ ចូលរួមប្រឆាំងអំពើពុករលួយទាំងអស់គ្នា ជាពិសេស អង្គភាពប្រឆាំងអំពើពុលរលួយ ត្រូវតែពង្រឹងតួនាទីអប់រំ ទប់ស្កាត់ និងចាត់វិធានការច្បាប់ជាបន្ទាន់ ដើម្បីទទួលបានលទ្ធផលល្អប្រសើរ៖ «ពង្រឹងតួនាទី តាមដាន ត្រួតពិនិត្យ អនុវត្ត ដើម្បីធានាថា ការប្រើប្រាស់ធនធានរបស់រដ្ឋប្រកបដោយប្រសិទ្ធភាព»។
ប្រភេទបទល្មើសពុករលួយចម្បងៗបច្ចុប្បន្នរួមមាន បទល្មើសស៊ីសំណូក បទល្មើសសូកប៉ាន់ បទល្មើសរំលោភអំណាច និងបទល្មើសវិតិក្រមជាដើម។
ប្រធានការិយាល័យមេធាវីក្រុមអ្នកច្បាប់អមរិន្ទ្រ លោក សុក សំអឿន អះអាងថា ស្ថាប័នដែលប្រព្រឹត្តអំពើពុករលួយឈានមុខគេនោះ គឺស្ថាប័នតុលាការ និងប៉ូលិសចរាចរណ៍តាមដងផ្លូវ។
ទន្ទឹមគ្នានេះ លោកក៏បញ្ជាក់ដែរថា មាត្រាមួយចំនួននៃច្បាប់ប្រឆាំងអំពើពុករលួយ នៅមានភាពខ្វះចន្លោះ ដែលទាមទារឲ្យធ្វើការកែលម្អ៖ «ជាឧទាហរណ៍ រឿងអ្នកសូកលុយ និងស៊ីសំណូក។ ប្រសិនបើចាប់អ្នកស៊ីសំណូកឲ្យប្រសិទ្ធភាព ដូច្នេះគឺដាក់និយមន័យលើកលែងទោសសម្រាប់អ្នកសូក ព្រោះពេលខ្លះមានគេបង្ខំអោយគាត់សូកលុយ»។
កន្លងមកប្រជាពលរដ្ឋចាត់ទុកអំពើពុករលួយជារឿងធម្មតា និងជាមធ្យោបាយដើម្បីរស់របស់អ្នកប្រព្រឹត្តអំពើពុករលួយ។ ប៉ុន្តែមកដល់ពេលនេះ ប្រជាពលរដ្ឋបានចាត់ទុកអំពើពុករលួយជាបញ្ហាធំបំផុតសម្រាប់សង្គមកម្ពុជា ទោះជាកម្ពុជា មានច្បាប់ប្រឆាំងអំពើពុករលួយហើយក្ដី តែអំពើពុករលួយនៅតែជាបញ្ហាប្រឈមខ្លាំងនៅឡើយ។
នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល មានប្រសាសន៍ថា នេះជាជំហានវិវត្តន៍ថ្មីមួយក្នុងប្រទេសកម្ពុជា ដែលប្រធានសភាជំរុញឲ្យស្ថាប័នពាក់ព័ន្ធទាំងអស់ចូលរួមទប់ស្កាត់អំពើពុករលួយនោះ។
លោកជំរុញឲ្យអង្គភាពប្រឆាំងអំពើពុករលួយ និងសង្គមស៊ីវិល ចាប់ដៃគ្នាដើម្បីបន្តអប់រំផ្សព្វផ្សាយអំពីផលអាក្រក់នៃអំពើពុករលួយឲ្យបានកាន់តែច្រើន ដើម្បីឲ្យប្រជាពលរដ្ឋមានការយល់ដឹងអំពីច្បាប់នេះឲ្យបានច្បាស់លាស់៖ «យើងនឹងបន្តធ្វើការជាមួយប្រជាពលរដ្ឋ និងយុវជន ដើម្បីបម្លែងពីការយល់ដឹងទៅជាសកម្មភាពវិញ ដើម្បីទប់ស្កាត់ និងប្រឆាំងអំពើពុករលួយ»។
ចាប់តាំងពីឆ្នាំ២០១៤-២០១៥ នេះតទៅ ក្រសួងអប់រំយុវជន និងកីឡា បានបញ្ចូលកម្មវិធីអប់រំស្ដីពីការប្រឆាំងអំពើពុករលួយ ក្នុងកម្មវិធីសិក្សាសម្រាប់កម្រិតមធ្យមសិក្សាទុតិយភូមិ ថ្នាក់ទី១០ ទី១១ និងថ្នាក់ទី១២។
ទាក់ទិននឹងការប្រយុទ្ធប្រឆាំងអំពើពុករលួយនេះ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បញ្ជាក់ថា ដើម្បីទប់ស្កាត់អំពើពុករលួយ លោកបានប្រើប្រាស់យុទ្ធសាស្ត្រ៣ គឺការអប់រំ និងការបង្ការ ទប់ស្កាត់ ព្រមទាំងការអនុវត្តច្បាប់បង្ក្រាប៖ «ការប្រឆាំងអំពើពុករលួយ គឺជាភារកិច្ចរួម។ រីឯការអនុវត្តច្បាប់ គឺជាភារកិច្ចផ្ដាច់មុខរបស់អង្គភាពប្រឆាំងអំពើពុករលួយ»។
ប្រធានគណៈកម្មការអង្កេត បោសសំអាត និងប្រឆាំងអំពើពុករលួយ ឬហៅថា គណៈកម្មការទី១០ នៃរដ្ឋសភា លោក ហូរ វ៉ាន់ លើកឡើងថា បើទោះបីជាប្រជាជាតិកម្ពុជា បានតស៊ូប្រឆាំងអំពើពុករលួយជាច្រើនទសវត្សក្តី ប៉ុន្តែប្រទេសកម្ពុជា នៅតែញាំញីដោយអំពើពុករលួយមិនទាន់ស្រាកស្រាន្តនៅឡើយ។
ប្រទេសកម្ពុជា បានចូលជាភាគីនៃអនុសញ្ញាអង្គការសហប្រជាជាតិ ប្រឆាំងអំពើពុករលួយនៅឆ្នាំ២០០៧។ កាលពីថ្ងៃទី១១ ខែមីនា ឆ្នាំ២០១០ រដ្ឋសភាកម្ពុជា បានអនុម័តច្បាប់ស្ដីពីការប្រឆាំងអំពើពុករលួយ ដែលមានគុណសម្បត្តិសមស្របជាមួយអនុសញ្ញាអង្គការសហប្រជាជាតិប្រឆាំងអំពើពុករលួយដែរ។ នៅឆ្នាំ២០១៤ នេះ រដ្ឋសភាកម្ពុជា បានបង្កើតគណៈកម្មការអង្កេត បោសសំអាត និងប្រឆាំងអំពើពុករលួយ ដើម្បីតាមដានការអនុវត្តច្បាប់ និងពិនិត្យពីភាពខ្វះចន្លោះនៃក្របខ័ណ្ឌច្បាប់ សំដៅធ្វើការកែលម្អ និងវិសោធនកម្មច្បាប់ពាក់ព័ន្ធនានា ដើម្បីទទួលបាននូវប្រសិទ្ធភាព និងលទ្ធផលខ្ពស់៕
2 comments:
The corruption is start from the top but rarely from the bottom . If the top is clean,organize and discipline,that boss can punish and stop the bottom tier employee under his duty easily . The top echelon are the culprit of this corruption trend. If government really want effectiveness to erase the bribery, the under the table deal, or any kind of corrupt influence, you need to enforce the law and correct it from the powerful man first . Khmer government can check and balance all ministers, under secretaries minister, controllers office of any level, head of big offices like the tax collector ,border control office , militarily, police, or any payroll offices you can reduce a lot even ghost employee . It not real hard if you want or have a courage to do so with a responsibility and patriotism mind .
Beisach heng samreng kuorte chol nivorth
Post a Comment