ប្រាកដណាស់ លោកចៅក្រម អាំង មាលតី ដ៏ល្បីឈ្មោះ អតីតប្រធានសាលាដំបូងរាជធានីភ្នំពេញ បានឋិតនៅក្នុងបញ្ជីខ្មៅរបស់សម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំង ជានាយករដ្ឋមន្ត្រីនៃព្រះរាជាណាចក្រកម្ពុជា ពាក់ព័ន្ធនឹងសំណុំរឿងតុលាការសាលាដំបូងរាជធានីភ្នំពេញដោះលែងជនត្រូវចោទឈ្មោះ ថោង ចំរើន និងឈ្មោះ កែវ សារី ត្រូវជាឪពុក-ម្តាយលោកឧកញ៉ា ថោង សារ៉ាត់ ឲ្យនៅក្រៅឃុំបណ្តោះអាសន្នមានភាពមិនប្រក្រត្រី រហូតត្រូវបានដកហូតតំណែងភ្លាមៗយ៉ាងតក់ក្រហល់ពីប្រធានសាលាដំបូងរាជធានីភ្នំពេញ នាថ្ងៃទី១៨ ខែកុម្ភៈ ឆ្នាំ២០១៥(ក្រោយមានប្រតិកម្មធ្ងន់ៗរបស់បុរសខ្លាំងតែមួយថ្ងៃ គឺថ្ងៃទី១៧ ខែកុម្ភៈ ឆ្នាំ២០១៥) ហើយបច្ចុប្បន្នលោកចៅក្រម អាំង មាលតី កំពុងឋិតក្រោមការស៊ើបអង្កេតរបស់ក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម និងអង្គភាពប្រឆាំងអំពើពុករលួយ(ACU) ។
មុនមានរឿងរ៉ាវធ្លាក់មកដល់ខ្លួនលោកចៅក្រម អាំង មាលតី គឺលោកចៅក្រម ជីវ កេង អតីតប្រធានសាលាដំបូងរាជធានីភ្នំពេញ(បច្ចុប្បន្នជាអនុប្រធានតុលាការកំពូល) ក៏ធ្លាប់ជាប់ឈ្មោះឋិតក្នុងបញ្ជីខ្មៅរបស់បុរសខ្លាំងជានាយករដ្ឋមន្ត្រីដែរ តាមរយៈរបាយការណ៍របស់នាយទាហានកូនចៅបុរសខ្លាំងចំនួន៤នាក់ ក្នុងសំណុំរឿងក្តីក្តាំរវាងអតីតឧត្តមសេនីយ៍ឯកប៉ូលិស ឌឿន សុវណ្ណ និងលោកឧត្តមសេនីយ៍យោធា ជា តារា ហើយអតីតឧត្តមសេនីយ៍ឯកប៉ូលិស ឌឿន សុវណ្ណ ជាមនុស្សស្និទ្ធស្នាលជាមួយឯកឧត្តមចៅក្រម ជីវ កេង ទើបមានឥទ្ធិពលខ្លាំងក្នុងប្រព័ន្ធតុលាការគ្រប់ជាន់ថ្នាក់ នាំឲ្យលោក ឌឿន សុវណ្ណ ឈ្នះក្តីលោក ជា តារា រហូតដល់ថ្នាក់លោកឧត្តមសេនីយ៍ទោយោធា ជា តារា ធ្លាក់ខ្លួនជាប់គុកក្រោមអំណាចសាលដីកាព្រហ្មទណ្ឌរបស់តុលាការកំពូល ។
ដោយមានរបាយការណ៍ជួយជ្រោមជ្រែងពីសំណាក់នាយទាហាន៤នាក់ជាកូនចៅរបស់បុរសខ្លាំង គឺឧត្តមសេនីយ៍ឯក ចៅ តុល, នាយឧត្តមសេនីយ៍ ហ៊ុយ ពិសិដ្ឋ, នាយឧត្តមសេនីយ៍ ហ៊ីង ប៊ុនហៀង និងនាយឧត្តមសេនីយ៍ ប៉ុល សារឿន ព្រមទាំងក្រោមការជួយចូកជួយចែវរបស់នាយឧត្តមសេនីយ៍ប៉ូលិស នេត សាវឿន ផង នាំឲ្យបុរសខ្លាំងប្រើប្រាស់បុព្វសិទ្ធិរបស់ខ្លួនតាមមាត្រា៧៧នៃច្បាប់ស្តីពីពន្ធនាគារ ទើបទណ្ឌិត ជា តារា ទទួលបាននការលើកលែងទោសទាំងស្រុងកាលពីខែឧសភា ឆ្នាំ២០១៤កន្លងទៅ ។
ទោះបីឯកឧត្តមចៅក្រម ជីវ កេង អតីតប្រធានសាលាដំបូងរាជធានីភ្នំពេញ និងអតីតជាសមាជិកឧត្តមក្រុមប្រឹក្សានៃអង្គចៅក្រម(បច្ចុប្បន្នជាអនុប្រធានតុលាការកំពូល) ដែលគេដឹងថា ជាមនុស្សសំខាន់របស់ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាដន្លងដងស្នែងបុរសខ្លាំងនោះ ជាប់ឈ្មោះក្នុងបញ្ជីខ្មៅរបស់បុរសខ្លាំងក៏ដោយ ក៏ឯកឧត្តមចៅក្រមដែលជាសមាជិកក្រុមប្រឹក្សាជាតិប្រឆាំងអំពើពុករលួយរូបនេះ គ្មានទទួលរងទោសទណ្ឌដកបុណ្យស័ក្តិ និងមុខតំណែងអ្វីឡើយ ។
មជ្ឈដ្ឋានអ្នកតាមដានដំណើរការកំណែទម្រង់ប្រព័ន្ធច្បាប់ និងតុលាការនៅកម្ពុជា កំពុងបន្តរង់ចាំចង់ដឹងថា តើករណីលោកចៅក្រម អាំង មាលតី អតីតប្រធានសាលាដំបូងរាជធានីភ្នំពេញ ដែលគេដឹងថា ជាមនុស្សមានទំនាក់ទំនងជិតស្និទ្ធជាមួយឯកឧត្តមបណ្ឌិត ឱម យ៉ិនទៀង ទេសរដ្ឋមន្ត្រីទទួលបន្ទុកប្រធានអង្គភាពប្រឆាំងអំពើពុករលួយ និងឯកឧត្តម អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ និងជាសមាជិកឧត្តមក្រុមប្រឹក្សានៃអង្គចៅក្រម ហើយជាប់ឈ្មោះឋិតក្នុងបញ្ជីខ្មៅរបស់បុរសខ្លាំងដែរនោះ អាចមានវាសនាខ្ពស់ ឬភ័ព្វសំណាងដូចឯកឧត្តមចៅក្រម ជីវ កេង ឬទេ ? ៕
No comments:
Post a Comment