Khmerization: Sa Rainsy declares he will take personal responsibility if the "culture of dialogue" fails [Rainsy should realized that he is dealing with the mercurial Hun Sen] លោក សម រង្ស៊ី ប្រកាសទទួលខុសត្រូវ បើសិនជាវប្បធម៌សន្ទនាបរាជ័យ

ចុះផ្សាយនៅថ្ងៃ 17/04/2015

លោក សម រង្ស៊ី កំពុងរាប់បាត្រ នៅសារមន្ទីរជើងឯក។រូបថត៖សហការី

ក្នុងពិធីជួបជុំរម្លឹកខួប ៤០ ឆ្នាំ នៃអំពើប្រល័យពូជសាសន៍ខ្មែរក្រហម នៅវាលពិឃាដជើងឯក នាព្រឹកថ្ងៃ១៧មេសានេះ លោកសម រង្ស៊ី ប្រធានគណបក្សសង្គ្រោះជាតិ បានផ្តល់តម្លៃជាថ្មីទៀត លើវប្បធម៌សន្ទនារវាងរូបលោក និងលោកនាយករដ្ឋមន្ត្រី ហ៊ុនសែន ដែលនាំដល់ការបញ្ចប់វប្បធម៌ហិង្សា និងការដោះលែងសកម្មជនដីធ្លី សកម្មជនគណបក្សសង្គ្រោះជាតិ ព្រមទាំងអតីតព្រះសង្ឃ ជាដើម។ លោកសម រង្ស៊ី ក៏បានប្រកាសទទួលខុសត្រូវជាមួយលោកនាយករដ្ឋមន្ត្រី បើសិនជាវប្បធម៌សន្ទនា បរាជ័យ ហើយកើតមានអំពើហិង្សានយោបាយកើតឡើងជាថ្មី។

លោកសម រង្ស៊ី បានលើកឡើងថា “បើវប្បធម៌សន្ទនា បរាជ័យ មិនទៅមុខរួច ខ្ញុំទទួលខុសត្រូវ ហើយខ្ញុំជឿជាក់ថា សម្តេចនាយករដ្ឋមន្ត្រី ( ហ៊ុនសែន ) ក៏ទទួលខុសត្រូវដែរ ហើយបើយើងទទួលខុសត្រូវ ដោយយើងមិនអាចសន្ទនាគ្នាបាន ហ្នឹងយើងអសមត្ថភាព។ និយាយអត់បានធ្វើតាមពាក្យសំដី។ ប៉ុន្តែថ្ងៃនេះ ហើយខ្ញុំនឹងប្រកាសជាបន្តបន្ទាប់ ខ្ញុំជឿជាក់ថា យើងធ្វើបាន ដើម្បីឲ្យខ្មែរបានសុខ និងឲ្យសង្គមមានយុត្តិធម៌។

នេះគឺជាការបញ្ជាក់របស់លោកសម រង្ស៊ី នៅមជ្ឈមណ្ឌលប្រល័យពូជសាសន៍ជើងឯក ដែលគណបក្សសង្គ្រោះជាតិ បានជួបជុំប្រារព្ធពិធីរម្លឹកខួប ៤០ ឆ្នាំ ដើម្បីឧទ្ទិសកុសលជូនដល់វិញ្ញាណក្ខន្ធអ្នកស្លាប់ក្នុងរបបខ្មែរក្រហម ថ្ងៃ១៧មេសា ១៩៧។

ក្នុងពិធីជួបជុំបង្សុកូល និងរាប់បាត្រ កាលពីព្រឹកថ្ងៃទី១៧មេសា លោកសម រង្ស៊ី ក៏បានថ្លែងផ្តល់តម្លៃដល់វប្បធម៌សន្ទនារវាងរូបលោក និងលោកនាយករដ្ឋមន្ត្រី ហ៊ុន សែន។ ជាវប្បធម៌នយោបាយថ្មី ដើម្បីបញ្ចប់វប្បធម៌ហិង្សា ហើយងាកមករកការដោះស្រាយបញ្ហានយោបាយ ដោយសន្តិវិធី នាំសុខសន្តិភាព និងយុត្តិធម៌។

ការគូសបញ្ជាក់របស់លោកសម រង្ស៊ីដូច្នេះ បានធ្វើតែបីថ្ងៃប៉ុណ្ណោះ បន្ទាប់ពីប្រមុខគណបក្សក្រៅរដ្ឋាភិបាល បានបង្ហាញវត្តមាន និងភាពស្និទ្ធស្នាលមិនធ្លាប់មាន ជាមួយប្រមុខរាជរដ្ឋាភិបាល លោក ហ៊ុនសែន ក្នុងពិធីបើកព្រឹត្តិការណ៍អង្គរសង្ក្រាន្ត ដើម្បីសាទរឆ្នាំថ្មី នៅខេត្តសៀមរាប កាលពីថ្ងៃទី១៤មេសា។ ភាពស្និទ្ធស្នាល ដែលមានមតិគាំទ្រ និងមានទាំងមតិរិះគន់លើលោកសម រង្ស៊ី។

លោកសម រង្ស៊ី នៅថ្ងៃ១៧មេសានេះ ក៏បានប្រកាសថា រូបលោក ខុសពីសម្តេចក្រុមព្រះ នរោត្តម រណឫទ្ធិ ក្នុងនាមជាដៃគូសន្ទនាជាមួយលោកនាយករដ្ឋមន្ត្រីហ៊ុនសែន។ នោះគឺតាមលោកសម រង្ស៊ី សម្តេចក្រុមព្រះ នរោត្តម រណឫទ្ធិ កាលពីជាប្រធានគណបក្សហ្វ៊ុនស៊ិនប៉ិច គឺជជែកជាមួយលោក ហ៊ុន សែន ដើម្បីទារតំណែងប៉ុណ្ណោះ តែសម្រាប់រូបលោក និយាយជាមួយលោកហ៊ុន សែន មិនមែនដើម្បីប្រយោជន៍ផ្ទាល់ខ្លួនទេ តែដើម្បីប្រយោជន៍ប្រទេសជាតិ និងយុត្តិធម៌សង្គម៕

លោក សម រង្ស៊ី ថាវប្បធម៌សន្ទនាពេលនេះគឺខុសពីជំនាន់បក្សហ៊្វុនស៊ិនប៉ិច

ដោយ សេក បណ្ឌិត

2015-04-17 RFA

លោក សម រង្ស៊ី ប្រធានគណបក្សសង្គ្រោះជាតិ ផ្ដល់បទសម្ភាសន៍ដល់អ្នកកាសែត នាមជ្ឈមណ្ឌលប្រល័យពូជសាសន៍ជើងឯក នៅថ្ងៃទី១៧ ខែមេសា ឆ្នាំ២០១៥។ RFA/Rann Samnang

មេដឹកនាំគណបក្សសង្គ្រោះជាតិ បង្ហាញជំហរក្រោយជំនួបស្និទ្ធស្នាលជាមួយនាយករដ្ឋមន្ត្រី ហ៊ុន សែន ក្នុងពិធីបើកអង្គរសង្ក្រាន្តឆ្នាំថ្មី ឆ្នាំមមែ នៅខេត្តសៀមរាប។ លោក សម រង្ស៊ី បញ្ជាក់ថា ដើម្បីជំរុញឲ្យវប្បធម៌សន្ទនាបានជោគជ័យលឿនទៅមុខបានជាប្រយោជន៍ជាតិនោះ លោកបានបង្ហាញជំហរ ឬនយោបាយទន់ភ្លន់ជាមួយមេដឹកនាំរដ្ឋាភិបាល តែមិនទន់ជ្រាយទេ មិនពុករលួយ ធ្វើឲ្យប្រទេសជាតិធ្លាក់ចុះដុនដាបដូចជំនាន់គណបក្សហ៊្វុនស៊ិនប៉ិច នោះឡើយ។

មេដឹកនាំគណបក្សសង្គ្រោះជាតិ ប្រកាសជាថ្មីថា វប្បធម៌សន្ទនាបង្កើតឡើងដើម្បីបញ្ចប់អំពើហិង្សា ការគំរាមកំហែងតាមរូបភាពនានាមកលើអ្នកនយោបាយ ជាពិសេសបក្សប្រឆាំង។ លោកសង្ឃឹមថា វប្បធម៌នេះកាន់តែមានភាពរឹងមាំពីមួយថ្ងៃទៅមួយថ្ងៃ និងបន្តទៅគ្នាគ្រប់ជំនាន់ អាចទទួលជោគជ័យយូរអង្វែង ធ្វើឲ្យមានយុត្តិធម៌សង្គម ហើយអ្វីៗត្រូវឈរលើផលប្រយោជន៍ជាតិជាធំ៖ «បើថ្ងៃក្រោយមានអំពើហិង្សាណាកើតឡើងទៀត នាយករដ្ឋមន្ត្រី ហ៊ុន សែន ខ្ញុំ សម រង្ស៊ី ទទួលខុសត្រូវ ពីព្រោះយើងបានសម្រេចរួមគ្នាថាខិតខំបញ្ចប់អំពើហិង្សា»។

លោកថ្លែងបែបនេះនៅចំពោះមុខអ្នកសារព័ត៌ជាតិ និងអន្តរជាតិ និងអ្នកគាំទ្ររាប់រយនាក់ ក្នុងពិធីបង្សុកូលឧទ្ទិសកុសលដល់វិញ្ញាណក្ខន្ធអ្នកដែលបានបាត់បង់ជីវិតក្នុងរបបខ្មែរក្រហម នៅសារមន្ទីរឧក្រិដ្ឋកម្មប្រល័យពូជសាសន៍ជើងឯក នៅថ្ងៃទី១៧ ខែមេសា។

លោក សម រង្ស៊ី បញ្ជាក់ទៀតថា វប្បធម៌សន្ទនានៅពេលនេះ ខុសគ្នាស្រឡះពីជំនាន់គណបក្សហ៊្វុនស៊ិនប៉ិច ដែលចរចាគ្នាគិតតែពីរឿងបែងចែកមុខតំណែងក្នុងរដ្ឋាភិបាល សម្រាប់តែក្រុមបក្ខពួករបស់ខ្លួន ដែលចុងក្រោយធ្វើឲ្យប្រទេសជាតិធ្លាក់ចុះដុនដាបរហូតសព្វថ្ងៃនេះ៖ «សម្ដេច ហ៊ុន សែន ប្រាប់ខ្ញុំថា ព្រះអង្គម្ចាស់រណឫទ្ធិ ពេលជជែកជាមួយ ហ៊ុន សែន ទារតែតំណែង គឺពុះជាពីរ ជជែកគ្នាបែបហ្នឹងមិនមែនវប្បធម៌សន្ទនាទេ អាហ្នឹងវប្បធម៌បំផ្លាញ វប្បធម៌ពុករលួយ»។

ឆ្លើយតបនឹងបញ្ហានេះ អ្នកនាំពាក្យគណបក្សហ៊្វុនស៊ិនប៉ិច លោក ញ៉េប ប៊ុនជិន មានប្រសាសន៍ថា លោក សម រង្ស៊ី ឬគណបក្សសង្គ្រោះជាតិ ដោះស្រាយបញ្ហាខ្លួនឯង និងបញ្ហាជាតិមិនបាន ទើបឆ្លើយទម្លាក់កំហុសឲ្យអ្នកដទៃ។ លោកបន្តថា តាមពិតផ្លូវដែល លោក សម រង្ស៊ី កំពុងដើរនៅដំណាក់កាលចុងក្រោយនេះ មិនខុសពីសម្ដេចក្រុមព្រះប៉ុន្មានឡើយ ដោយគ្រាន់តែដូរពាក្យនិយាយប៉ុណ្ណោះ៖«គាត់ឃើញ ៥៥កៅអីរបស់គាត់អត់បានធ្វើអ្វីដែលជាប្រយោជន៍សម្រាប់ជាតិ គាត់យកគំរូដោយប្រើពាក្យថាសន្ទនា គាត់ថាមិនដូចកាលសម្ដេចក្រុមព្រះចែកអំណាច គាត់យល់ច្រឡំកាលដែលយើងអង្គុយចរចាអាណត្តិទីមួយ និងទី២ យើងដោះស្រាយបញ្ហាជាតិបានច្រើនណាស់»។

តែទោះយ៉ាងណា អ្នកវិភាគឯករាជ្យ លោកបណ្ឌិត សុខ ទូច គាំទ្រឲ្យអ្នកនយោបាយបន្តដើរលើផ្លូវអហិង្សា ដូចជាការប្រកាន់យកវប្បធម៌សន្ទនាគ្នានេះជាដើម ពីព្រោះកម្ពុជា កំពុងត្រូវការវប្បធម៌នេះខ្លាំងណាស់ ដើម្បីកុំឲ្យកម្ពុជា វិលទៅរកសង្គ្រាមដូចនៅក្នុងទសវត្សទី៧០ ដែលខ្មែរហែកហួរគ្នាដោយសង្គ្រាមប្រដាប់អាវុធបង្ហូរឈាមគ្នាឯង៖ «អ៊ីចឹងវប្បធម៌សន្ទនានេះមានន័យថា ជាវប្បធម៌មួយដើម្បីការអភិវឌ្ឍដោយមិនប្រើប្រាស់កម្លាំង»។

ជុំវិញវប្បធម៌សន្ទនានេះ អ្នកនយោបាយ អ្នកវិភាគសង្គមនៅស្ទាក់ស្ទើរនៅឡើយ ក្នុងការវាយតម្លៃថា តើវប្បធម៌នេះនឹងរឹងមាំប៉ុណ្ណា ឬមានអាយុកាលវែង ឬខ្លីប៉ុណ្ណានោះទេ?

យ៉ាងណាក៏ដោយ លោក សម រង្ស៊ី ថា វប្បធម៌នេះបានធ្វើឲ្យគណបក្សប្រឆាំងមានភាពកក់ក្តៅ មានពេលធ្វើការបាននឹងនជាងពេលកន្លងមក៕

A Change of Guard

Saturday, 18 April 2015

No comments: