ដោយ៖ ជន ស្រីណុច | ថ្ងៃពុធ ទី17 កញ្ញា 2014,
ស្តាប់សំឡេង៖ | ចម្លងទុក |
ក្រសួងព័ត៌មានមិនទាន់ឆ្លើយតបជាផ្លូវការ មកប្រព័ន្ធផ្សព្វផ្សាយឯករាជ្យក្នុងស្រុកមួយ ដែលសុំអាជ្ញាប័ណ្ណវិទ្យុ និងទូរទស្សន៍ក្នុងបំណងជំរុញឲ្យមានតម្លាភាពក្នុងការផ្សព្វផ្សាយព័ត៌មាន ដូចដែលគណបក្សនយោបាយទាំងពីរបានព្រមព្រៀងគ្នាកាលពីថ្ងៃ២២ កក្កដានោះទេ។
ក្នុងកិច្ចព្រមព្រៀង២២ កក្កដា រវាងគណបក្សប្រជាជនកម្ពុជា និងគណបក្សសង្គ្រោះជាតិ បានព្រមព្រៀងគ្នាកែក្បាលម៉ាស៊ីនដឹកនាំរដ្ឋសភា តាមបែបលទ្ធិប្រជាធិបតេយ្យ និងបានសន្យាបើកទូលាយប្រព័ន្ធផ្សព្វផ្សាយឲ្យមានតម្លាភាព។
មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យហៅកាត់ថា CCIM ចេញសេចក្តីប្រកាសព័ត៌មាននៅថ្ងៃទី១៦ ខែកញ្ញា ម្សិលមិញថាខ្លួនបានដាក់លិខិតទៅក្រសួងព័ត៌មាន ដើម្បីសុំអាជ្ញាប័ណ្ណវិទ្យុផ្ទាល់ខ្លួនជាលើកទី៤ ក្នុងបំណងផ្សព្វផ្សាយឲ្យបានទូលំទូលាយដល់សាធារណជន ពិសេសជំរុញឲ្យមានការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។
VOD មិនអាចទាក់ទងរដ្ឋមន្ត្រីក្រសួងព័ត៌មានលោក ខៀវ កាញារីទ្ធ ដើម្បីបានទទួលព័ត៌មានពាក់ព័ន្ធនឹងការសម្រេចលើពាក្យសុំរបស់ CCIM បាននៅឡើយទេ។
មន្ត្រីជាន់ខ្ពស់ផ្នែករដ្ឋបាលនៃក្រសួងព័ត៌មាន ដែលមិនព្រមប្រាប់ឈ្មោះមកកាន់អ្នកយកព័ត៌មាន VOD ថាទាក់ទងនឹងការសុំអាជ្ញាប័ណ្ណវិទ្យុ និងទូរទស្សន៍ របស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យនោះបានទៅដល់ដៃរដ្ឋមន្ត្រីហើយ ហើយថាករណីនេះរដ្ឋមន្ត្រីបានចារឲ្យប្រធានសោតទស្សន៍ជាអ្នកសម្រេច។ លោកមានប្រសាសន៍ថា «រដ្ឋមន្ត្រីគាត់ចារឲ្យខាងសោតទស្សន៍ចាត់ចែង ខាងឯកឧត្តម ប៊ុត បូវុត។ មើលទៅប្រហែលជាមិនបានទេ បងសួរទៅខាងសោតទស្សន៍ណាបង»។
ទោះជាយ៉ាងណា VOD មិនអាចទាក់ទងអគ្គនាយកដ្ឋានព័ត៌មាន និងសោតទស្សន៍ លោក ប៊ុត បូវុត បានទេដោយទូរស័ព្ទចូលតែមិនមានអ្នកទទួល។
សេចក្ដីប្រកាសរបស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ បានស្រង់ប្រសាសន៍លោក ប៉ា ងួនទៀង ប្រធានមជ្ឈមណ្ឌលនេះថា «បើក្រសួងព័ត៌មានផ្ដល់អាជ្ញាប័ណ្ណតាមការស្នើសុំ នោះVOD នឹងធ្វើជាម្ចាស់លើស្ថានីយវិទ្យុ និងទូរទស្សន៍ដោយខ្លួនឯង ហើយក៏នឹងដំណើរការផ្សាយព័ត៌មាននយោបាយដោយឯករាជ្យជាភាសាខ្មែរ នៅក្នុងប្រទេសនេះផងដែរ»។ លោកប៉ា ងួនទៀង បន្ថែមថា «វាក៏បញ្ជាក់ឲ្យឃើញច្បាស់ពីជំហានដំបូង ក្នុងការអភិវឌ្ឍផ្នែកប្រព័ន្ធផ្សព្វផ្សាយចម្រុះ និងឯករាជ្យនៅកម្ពុជា»។
ប្រធានក្រុមប្រឹក្សាក្រមសីលធម៌សារព័ត៌មានកម្ពុជា លោក សេក បរិសុទ្ធ មានប្រសាសន៍ថា គួរតែមានស្ថាប័នផ្សាយព័ត៌មានពិត ផ្តល់ផលប្រយោជន៍ដល់ប្រជាពលរដ្ឋ ឲ្យបានច្រើនទើបជាការល្អ។ លោកមានប្រសាសន៍ថា «ឯករាជ្យ មិនប្រាកដថា អព្យាក្រឹតមិនលម្អៀតទេ។ អព្យាក្រឹត ភាពមិនលម្អៀងរបស់ស្ថាប័នប្រព័ន្ធផ្សព្វផ្សាយ វាត្រូវការវិនិច្ឆ័យដោយប្រជាពលរដ្ឋ អ្នកស្តាប់ អ្នកមើល ឬអ្នកអាន។ ប៉ុន្តែយ៉ាងណាក៏ដោយស្ថាប័នឯករាជ្យ មានទូរទស្សន៍ មានវិទ្យុ ជាការល្អបំផុត វាល្អជាងគណបក្សនយោបាយ បើតាមទស្សនៈរបស់ខ្ញុំ ពីព្រោះប្រព័ន្ធផ្សព្វផ្សាយនៃការផ្សាយបម្រើប្រជាពលរដ្ឋទូទៅ ដោយមិនគិតពីនិន្នាការនយោបាយ។ ដូច្នេះគាត់បម្រើផលប្រយោជន៍សាធារណៈបានទូលំទូលាយជាង»។
កន្លងទៅក្រសួងព័ត៌មានរងការរិះគន់ថា ការផ្ដល់អាជ្ញាប័ណ្ណវិទ្យុ និងទូរទស្សន៍ ឲ្យទៅក្រុមហ៊ុនឯកជនមួយចំនួនមានភាពលម្អៀងទៅរកអ្នកដែលគាំទ្រគណបក្សកាន់អំណាច។ សម្រាប់វិទ្យុ និងទូរទស្សន៍ដែលនិយមកណ្ដាលច្រើនទទួលបានចម្លើយអវិជ្ជមាន ដោយក្រសួងអះអាងថា អត់ហ្វ្រេកង់៕
សូមសរសេរមកកញ្ញា ជន ស្រីណុច តាមរយៈ chornsreynoch@vodhotnews.com
No comments:
Post a Comment