ដោយ៖ ណាត សុភាព | ថ្ងៃព្រហស្បតិ៍ ទី26 មិថុនា 2014, VOD
ស្តាប់សំឡេង៖ | ចម្លងទុក |
លោក ហេង សំរិន ប្រធានរដ្ឋសភាកម្ពុជា (រូបថត៖ តាត ឧត្តម)
មន្ត្រីជាន់ខ្ពស់ការបរទេសវៀតណាម បានស្វែងរកការគាំទ្រពីប្រទេសកម្ពុជា ក្នុងករណីជម្លោះដែនសមុទ្រជាមួយមហាអំណាចចិន ខណៈដែលនាវារបស់ចិនបានគំរាមកំហែងលើនាវាវៀតណាមនៅក្បែរកោះប៉ារ៉ាសែល។
កិច្ចខិតខំប្រឹងប្រែងនេះធ្វើឡើង ក្នុងជំនួបរវាងប្រធានរដ្ឋសភាកម្ពុជា លោក ហេង សំរិន ជាមួយអនុរដ្ឋមន្ត្រីក្រសួងការបរទេស និងជាបេសកម្មជនពិសេសនាយករដ្ឋមន្ត្រី នៃសាធារណរដ្ឋសង្គមនិយមវៀតណាម លោក ផាម គួង វិញ នៅព្រឹកថ្ងៃព្រហស្បតិ៍នេះ។
ទោះជាយ៉ាងនេះក្តី នាយកខុទ្ទកាល័យរដ្ឋសភា លោក កែវ ពិសិទ្ធ មានប្រសាសន៍ថា តាមរដ្ឋធម្មនុញ្ញកម្ពុជា គឺកម្ពុជាមិនមានសិទ្ធិលូកដៃចូលកិច្ចការផ្ទៃក្នុងប្រទេសដទៃបាននោះទេ។ ហេតុនេះ សភាកម្ពុជាជំរុញឲ្យភាគីជម្លោះសមុទ្រចិនខាងត្បូង បន្តការដោះស្រាយបញ្ហាដោយអត់ធ្មត់ថែមទៀត និងគោរពតាមច្បាប់អន្តរជាតិ ដើម្បីបញ្ចប់ជម្លោះនោះ «សម្តេចលោកលើកឡើង លោកយល់ឃើញថា ស្ថិរភាពនិងសន្តិសុខនៅក្នុងតំបន់សមុទ្រចិនខាងត្បូង គឺមានសារៈសំខាន់ណាស់ ហើយចំនុចទី៥ គឺលោកគាំទ្រចំពោះជំហរវិជ្ជមាន នៃដំណោះស្រាយបញ្ហា តាមរយៈជួបចរចាគ្នាថ្មីៗ រវាងភាគីចិនជាមួយវៀតណាម ហើយសម្តេចលោកជំរុញគាំទ្រឲ្យមានការចរចាបែបនេះបន្តទៀត»។
ប៉ុន្តែនៅពេលសួរថា តើវៀតណាមកំពុងស្វែងរកការគាំទ្រពីកម្ពុជាក្នុងជម្លោះជាមួយចិននេះមែនទេ? លោក កែវ ពិសិទ្ធ មានប្រសាសន៍ថា មន្ត្រីវៀតណាមគ្រាន់តែរាយការណ៍ពីការវិវត្តន៍ថ្មីៗនៃជម្លោះនោះប៉ុណ្ណោះ។
បណ្ឌិតវិទ្យាសាស្ត្រនយោបាយ លោក សុខ ទូច យល់ថា ករណីជម្លោះសមុទ្រចិនខាងត្បូង រវាងភាគីចិន និងវៀតណាមនោះ កម្ពុជាទំនងជាមិនអាចឈរនៅកណ្តាលបានទេ។ លោកបន្តថា កម្ពុជាប្រហែលជាទំនោរទៅចិនច្រើនជាងវៀតណាម ដើម្បីប្រយោជន៍របស់កម្ពុជា «កម្ពុជា គឺជាឈ្នាន់មួយដ៏សំខាន់ ដែលបញ្ជូនទំនាក់ទំនងល្អជាមួយចិន ហេតុនេះហើយវៀតណាម សម្លឹងមកកម្ពុជា ធ្វើយ៉ាងណាឲ្យកម្ពុជាសម្រួល ប៉ុន្តែពេលកម្ពុជាមានបញ្ហា ប្រទេសទាំងអស់ហ្នឹង អត់បានយកចិត្តទុកដាក់ អ៊ីចឹងវាលំបាក»។
ករណីជម្លោះដែនសមុទ្រចិនជាមួយប្រទេសជាសមាជិកអាស៊ាននេះ គឺប្រទេសឥណ្ឌូនេស៊ី និងហ្វីលីពីន បានរិះគន់រដ្ឋាភិបាលកម្ពុជាថា លម្អៀងទៅរកប្រទេសមហាអំណាចចិន កាលពីកម្ពុជាធ្វើជាម្ចាស់ផ្ទះនៃកិច្ចប្រជុំអាស៊ានឆ្នាំ២០១២ កន្លងមក៕
សូមសរសេរមកលោក ណាត សុភាព តាមរយៈ sopheap@vodhotnews.com
2 comments:
Chke heng samrin chea kanhcheas yuon noeung chea saphea tingmorng
Chke heng samrin chea kanhcheas yuon noeung chea saphea tingmorng
Post a Comment