ការចរចាគ្នារវាងគណបក្សសង្គ្រោះជាតិ និងគណបក្សប្រជាជនកម្ពុជា កំពុងស្ថិតនៅក្នុងភាពចម្រូងចម្រាសនៅឡើយមកទល់ពេលនេះ។ គណបក្សទាំងពីរនៅមិនទាន់កំណត់ពេលវេលាជួបចរចាជាថ្មីទៀតនៅឡើយទេ ហើយគណបក្សទាំងពីរនៅតែរឹងទទឹងរៀងៗខ្លួនក្នុងការកំណត់របៀបវារៈយកទៅចរចានោះ។
ដោយ ទីន ហ្សាការីយ៉ា
2013-11-26
បញ្ហានេះ អ្នកឃ្លាំមើលការបោះឆ្នោតបានលើកឡើងថា អ្នកនយោបាយគណបក្សទាំងពីរមិនមានឆន្ទៈពិតប្រាកដក្នុងការបម្រើផលប្រយោជន៍ប្រជាពលរដ្ឋនោះឡើយ ពីព្រោះថា ភាពជាប់គាំងនយោបាយនេះ បានធ្វើឲ្យប៉ះពាល់ដល់ប្រជាពលរដ្ឋ។
មន្ត្រីជាន់ខ្ពស់គណបក្សប្រជាជនកម្ពុជា បានឲ្យដឹងនៅថ្ងៃទី២៦ វិច្ឆិកា ថា គណបក្សប្រជាជនកម្ពុជា នៅតែបន្តបើកទ្វារចំហរង់ចាំគណបក្សសង្គ្រោះជាតិ ដើម្បីកំណត់ថ្ងៃចរចាជាថ្មីរកដំណោះស្រាយនយោបាយបន្តទៀត។
ប្រធានក្រុមចរចាតំណាងគណបក្សប្រជាជនកម្ពុជា និងជារដ្ឋលេខាធិការក្រសួងមហាផ្ទៃ លោក ព្រំ សុខា មានប្រសាសន៍ថា គណបក្សប្រជាជននៅតែរង់ចាំការជូនដំណឹងពីគណបក្សសង្គ្រោះជាតិដើម្បីជួបចរចាជាថ្មី ទោះបីជាជួបថ្នាក់កំពូល ឬថ្នាក់ណាក៏បានដែរ។
លោក ព្រំ សុខា បន្ថែមថា ការជួបចរចាលើកក្រោយនេះ ទោះបីជាជួបគ្នានៅទីកន្លែងណាក៏បានដែរ មិនចាំបាច់ធ្វើឡើងនៅមន្ទីររដ្ឋសភានោះទេ៖ «មកដល់ម៉ោងនេះ ទ្វាររបស់គណបក្សប្រជាជននៅតែបើកចំហក្នុងការចរចាជានិច្ច ជួបក្នុងកម្រិតណា ជួបគ្នាចរចានៅទីកន្លែងណាក៏បាន»។
ការប្រកាសរបស់តំណាងគណបក្សប្រជាជនកម្ពុជានេះ ខណៈដែលគណបក្សសង្គ្រោះជាតិ បានប្រកាសធ្វើបាតុកម្មជាថ្មីបន្តទៀត ចាប់ពីថ្ងៃទី១៥ ខែធ្នូ ទៅ ដែលការធ្វើបាតុកម្មនេះ ធ្វើឡើងក្នុងរយៈពេល១សប្ដាហ៍ម្ដង ហើយធ្វើជាបន្តបន្ទាប់។
មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ លើកឡើងថា គណបក្សសង្គ្រោះជាតិ បានស្វាគមន៍ចំពោះការបន្តការចរចា ប៉ុន្តែការចរចាថ្មីអាចធ្វើទៅបានលុះត្រាតែគណបក្សប្រជាជនកម្ពុជា ទទួលយករបៀបវារៈច្បាស់លាស់ក្នុងការចរចាជាមុនសិន៖ «ទីតាំងអត់សំខាន់ទេ កន្លែងណាក៏ដោយឲ្យតែទឹកដីខ្មែរ គឺល្អទាំងអស់ អ្វីដែលសំខាន់គឺគណបក្សសង្គ្រោះជាតិ ទាមទារគឺរបៀបវារៈបី ទី១ យុត្តិធម៌ជូនម្ចាស់ឆ្នោត ទី២ ថ្នាក់ដឹកនាំកំពូល គ.ជ.ប ត្រូវទទួលខុសត្រូវលាលែងរបស់ខ្លួន និងទី៣ ទាមទារកំណែប្រព័ន្ធបោះឆ្នោត»។
គណបក្សទាំងពីរបានជួបចរចារកដំណោះស្រាយនយោបាយនេះចំនួនបីលើកមកហើយ ដោយលើកចុងក្រោយគណបក្សទាំងពីរបានជួបគ្នានៅមន្ទីររដ្ឋសភា នៅថ្ងៃទី៥ ខែវិច្ឆិកា ឆ្នាំ២០១៣។ តំណាងគណបក្សទាំងពីរបានព្រមព្រៀងជួបគ្នាចរចាបន្តទៀតនៅសប្ដាហ៍បន្ទាប់ តែមកទល់ពេលនេះ បានអូសបន្លាយពេលជិត ១ខែទៅហើយ គណបក្សទាំងពីរនៅតែមិនទាន់កំណត់ថ្ងៃជួបគ្នាដដែល ដោយសារតែគណបក្សទាំងពីរនៅតែរក្សាជំហររៀងៗខ្លួន។
ឆ្លើយតបទៅនឹងបញ្ហានេះ អ្នកឃ្លាំមើលការបោះឆ្នោតបានពន្យល់ថា អ្នកនយោបាយគណបក្សទាំងពីរមិនមានឆន្ទៈពិតប្រាកដនៅក្នុងការចរចានោះទេ។ បញ្ហានេះ អ្នកដែលរងគ្រោះនោះគឺម្ចាស់ឆ្នោត នៅខណៈដែលកម្ពុជា នៅជាប់គាំងនយោបាយនេះ។
ប្រធានគណៈកម្មាធិការអព្យាក្រឹតនិងយុត្តិធម៌ ដើម្បីការបោះឆ្នោតដោយសេរីនៅកម្ពុជា លោកបណ្ឌិត ហង្ស ពុទ្ធា មានប្រសាសន៍ថា នៅក្នុងបរិបទនយោបាយបច្ចុប្បន្ននេះ ឆ្លុះបញ្ចាំងថា គណបក្សជាប់ឆ្នោតទាំងពីរមិនបានគិតពីការបង្រួបបង្រួមជាតិ និងយកផលប្រយោជន៍ប្រជាពលរដ្ឋជាធំទេ៖«បញ្ហាជាប់គាំងនៅតែអូសបន្លាយ ឃើញថា ប្រជាពលរដ្ឋនឹងកើតមានបញ្ហា ព្រោះម្ចាស់ជំនួយមួយចំនួនឃើញថា បង្កកការផ្ដល់ជំនួយរបស់ខ្លួនឲ្យមករដ្ឋាភិបាល»។
គណបក្សប្រជាជនកម្ពុជា និងគណបក្សសង្គ្រោះជាតិ បានបរាជ័យក្នុងការចរចានិងអូសបន្លាយពេលមកទល់ពេលនេះ បន្ទាប់ពីការជួបចរចាគ្នាចុងក្រោយកាលពីថ្ងៃទី៥ វិច្ឆិកា នោះ គណបក្សសង្រ្គោះជាតិ បានចេញសេចក្ដីប្រកាសព័ត៌មាននៅល្ងាចថ្ងៃទី៥ វិច្ឆិកា បន្ទាប់ពីការចរចាភ្លាមៗថា ការចរចាជាមួយគណបក្សប្រជាជនកម្ពុជា បានបរាជ័យ ដោយសារភាគីគណបក្សប្រជាជនកម្ពុជា នៅតែបដិសេធមិនទទួលយកនូវការស្រាវជ្រាវស្វែងរកការពិតពីភាពមិនប្រក្រតីដែលកើតមានក្នុងការបោះឆ្នោតនីតិកាលទី៥ កាលពីថ្ងៃទី២៨ ខែកក្កដា កន្លងទៅ៕
No comments:
Post a Comment