Khmerization: 20 NGOs to to conduct a prayer for peace at Wat Phnom tomorrow 14th August at 4pm សង្គមស៊ីវិលចំនួន២០គ្រោងបួងសួងសុំសន្តិភាពនាវត្តភ្នំនៅថ្ងៃ១៤សីហា

អង្គការសង្គមស៊ីវិលជាច្រើន គ្រោងប្រារព្ធពិធីបួងសួងសុំសន្តិភាព នៅរសៀលថ្ងៃទី១៤ ខែសីហា ដើម្បីជាសារមួយឲ្យពលរដ្ឋទាំងអស់កុំប្រើអំពើហិង្សាណាមួយ ដែលអាចកើតមានក្នុងពេលកម្ពុជា កំពុងមានវិបត្តិនយោបាយសព្វថ្ងៃ។ ពិធីបួងសួងនេះ ធ្វើឡើងបន្ទាប់ពីស្ថានភាពនយោបាយនៅកម្ពុជា នៅតែបន្តធ្លាក់ចុះ និងតានតឹងនៅឡើយ នៅពេលដែលមានការចល័តកងទ័ពរាប់រយនាក់ពីបណ្ដាមូលដ្ឋានទ័ពតាម ខេត្ត មកកាន់រាជធានីភ្នំពេញ។

ដោយ ទេព សុរ៉ាវី RFA

2013-08-13

ស្ដាប់ ឬ ទាញយកសំឡេង

នាយកប្រតិបត្តិអង្គការកម្មវិធីអភិវឌ្ឍន៍ធនធានយុវជន លោក ជាង សុខា និងជាសមាជិកក្រុមការងារដើម្បីសន្តិភាព ក្នុងវេទិកាអ្នកស្ដាប់វិទ្យុអាស៊ីសេរី កាលពីថ្ងៃទី១៤ ខែមិថុនា ឆ្នាំ២០១៣។

Photo: RFA

ក្រុមការងារដើម្បីសន្តិភាព និងអង្គការសង្គមស៊ីវិល ចំនួន ២០ គ្រោងជួបជុំគ្នាដើម្បីអំពាវនាវ និងបួងសួងសុំសន្តិភាពនៅរមណីយដ្ឋានវត្តភ្នំ នៅរសៀលថ្ងៃទី១៤ ខែសីហា។
នាយកប្រតិបត្តិអង្គការកម្មវិធីអភិវឌ្ឍន៍ធនធានយុវជន លោក ជាង សុខា និងជាសមាជិកក្រុមការងារដើម្បីសន្តិភាព មានប្រសាសន៍ថា ពលរដ្ឋកំពុងតែភ័យខ្លាច ដោយសារតែមានការចល័តកងទ័ព និងរថក្រោះពីមូលដ្ឋានទ័ពមកកាន់រាជធានីភ្នំពេញ ទើបក្រុមការងារសន្តិភាព និងអង្គការសង្គមស៊ីវិល យល់ឃើញថា ស្ថានភាពចល័តទ័ព និងរថក្រោះនោះ ទំនងជាអាចនាំឲ្យមានការប្រើអំពើហិង្សា ឬការភ័យខ្លាចរបស់ពលរដ្ឋ។
លោក ជាង សុខា៖ «ក្រុមការងារសន្តិភាពបានកៀងគរជាមួយបណ្ដាអង្គការ ផ្សេងទៀត ដើម្បីជួបជុំគ្នាអំពាវនាវ ក៏ដូចជាបួងសួងដើម្បីឲ្យមានសន្តិភាព ជាពិសេសរាល់ដំណោះស្រាយទាក់ទងជាមួយនឹងបញ្ហាដែលកំពុងកើតមាននេះ ប្រកបដោយសន្តិវិធី»។
ក្រោយការបោះឆ្នោត មានការចល័តកងទ័ព និងរថក្រោះជាច្រើនគ្រឿង ចេញពីមូលដ្ឋានទ័ពតាមបណ្ដាខេត្តនានា មកកាន់រាជធានីភ្នំពេញ។ ការដាក់កម្លាំងប្រដាប់អាវុធនេះ ត្រូវបានមន្ត្រីរដ្ឋាភិបាលអះអាងថា ដើម្បីមកការពារ និងទប់ស្កាត់ក្រុមបាតុករដែលមានបំណងតវ៉ាប្រឆាំងនឹងលទ្ធផលបោះ ឆ្នោត។
គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសលទ្ធផលបណ្ដោះអាសន្នផ្លូវការ កាលពីថ្ងៃទី១២ ខែសីហា បង្ហាញថា គណបក្សប្រជាជនកម្ពុជា មានសំឡេងគាំទ្រឈ្នះដាច់គណបក្សសង្គ្រោះជាតិ។ លទ្ធផលនោះត្រូវបាន លោក កឹម សុខា អនុប្រធានគណបក្សសង្គ្រោះជាតិ ច្រានចោលភ្លាមៗ ដោយចាត់ទុកលទ្ធផលរបស់ គ.ជ.ប នៅពេលនេះថា ជាសកម្មភាពបិទបាំងនូវរាល់កំហុសឆ្គង ដែល គ.ជ.ប បានប្រព្រឹត្តលើការបោះឆ្នោត។
លោក ជាង សុខា សង្ឃឹមថា រាល់ដំណោះស្រាយនយោបាយ នឹងត្រូវដោះស្រាយចប់ដោយសន្តិវិធី និងគ្មានការប្រើអំពើហិង្សាកើតឡើង។

ពិធីបួងសួងសុំសន្តិភាព នឹងមានមនុស្សប្រមាណ ២៥០នាក់ ចូលរួម។ ប៉ុន្តែ តួលេខនេះអាចមានចំនួនកើនឡើងច្រើនជាងនេះ។ តាមគម្រោង នឹងមានការជួបជុំមនុស្សចំនួន ២ក្រុម ក្នុងពេលតែមួយ។ អ្នកចូលរួមមួយក្រុម ជួបជុំគ្នានៅរសៀលម៉ោង៤ នៅមុខព្រះបរមរាជវាំង រួចដង្ហែក្បួនមកកាន់រមណីយដ្ឋានវត្តភ្នំ ដើម្បីធ្វើពិធីបួងសួង។ ទន្ទឹមគ្នានោះ អ្នកចូលរួមមួយក្រុមទៀត ចាំនៅរមណីយដ្ឋានវត្តភ្នំតែម្តង។
វិទ្យុអាស៊ីសេរី មិនអាចទាក់ទង លោក ខៀវ សុភ័គ មន្ត្រីនាំពាក្យក្រសួងមហាផ្ទៃ ជុំវិញគម្រោងសុំសន្តិភាពរបស់ក្រុមអង្គការសង្គមស៊ីវិលបានទេ នៅថ្ងៃទី១៣ ខែសីហា ដោយលោកបិទទូរស័ព្ទ។
យ៉ាងណា គណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត និងជារដ្ឋមន្ត្រីក្រសួងមហាផ្ទៃ លោក ស ខេង បានចេញលិខិតលើកទី៣ របស់ខ្លួន កាលពីថ្ងៃទី១២ ខែសីហា ដោយអំពាវនាវម្តងហើយម្តងទៀត សុំឲ្យគណបក្សនយោបាយពលរដ្ឋ អាជ្ញាធរ និងកងកម្លាំងសមត្ថកិច្ចទាំងអស់ បន្តរក្សាសន្តិភាពសណ្ដាប់ធ្នាប់ និងសុវត្ថិភាពសង្គមឲ្យនៅប្រក្រតី។
ក្រុមអង្គការសង្គមស៊ីវិលចំនួន ១០ ក៏បានចេញសេចក្ដីថ្លែងការណ៍រួមមួយ ដោយជំរុញឱ្យមានដំណោះស្រាយដោយយុត្តិធម៌ លើបញ្ហាជាប់គាំងក្រោយការបោះឆ្នោត។
អង្គការសង្គមស៊ីវិល បានជំរុញឱ្យភាគីដែលពាក់ព័ន្ធ រួមទាំងគណបក្សនយោបាយ និងរាជរដ្ឋាភិបាល បន្ធូរបន្ថយនូវរាល់ភាពតានតឹង និងពិចារណាលើសារដែលបានបញ្ជូនទៅកាន់ប្រជាពលរដ្ឋ តាមរយៈការចល័តកងទ័ពរាប់រយនាក់ ពីបណ្ដាមូលដ្ឋានទ័ពនៅតាមខេត្ត មកកាន់រាជធានីភ្នំពេញ។ សូមឱ្យការពារសិទ្ធិជួបប្រជុំដោយសន្តិវិធី និងធានាឱ្យមានភាពអត់ធ្មត់ក្នុងអំឡុងពេលបាតុកម្ម ឬការប្រមូលផ្តុំខាងការប្រជុំផ្សេងៗខាងមុខ៕