Sam Rainsy chosen as the prime ministrial candidate, while Kem Sokha chosen as a candidate for the position of president of the National Assembly គណបក្សប្រឆាំង ជ្រើសតាំង​បេក្ខភាព​នាយក​រដ្ឋមន្ត្រី និង​ប្រធានរដ្ឋសភា​

                                             Kem Sokha (L) and Sam Rainsy (R)
 
(ថ្ងៃទី 6 មីនា 2013,) | ដោយ: លី សិលា  CEN

ភ្នំពេញ: មេដឹកនាំ​គណបក្សប្រឆាំង​ ​លោក​ ​សម​ ​រង្សី​ ​ដែល​កំពុង​តែ​ភៀសខ្លួន​នៅ​ ក្រៅប្រទេស​ ​ត្រូវបាន​ជ្រើសតាំង ជា​បេក្ខភាព​នាយក​រដ្ឋមន្ត្រី​ ​សំរាប់​ការបោះឆ្នោតជាតិ ជា​សាកល ក្នុង​ខែ​កក្កដា​ខាងមុខនេះ​។​ ​ចំណែក​លោក កឹម សុខា ត្រូវបាន​ជ្រើសតាំង​ជា​បេក្ខភាព​ប្រធានរដ្ឋសភា​។ នេះ​បើ​តាម​សេចក្តីប្រកាស​។​

​សេចក្តីប្រកាស​របស់​គ​ណ​បក្ស​សង្គ្រោះ ​ជាតិ បង្ហាញថា សេចក្តីសម្រេច​ដូច្នេះ ត្រូវបាន​ធ្វើឡើង នៅក្នុង​ជំនួប​មួយ នៅ​ប្រទេស​សឹង្ហ​បូរី នៅ​ថ្ងៃ​ទី​៦ ​ខែ​មីនា ឆ្នាំ​២០១៣​។​

​ សេចក្តីថ្លែងការណ៍​រួម នៃ​ចលនា​ប្រជាធិបតេយ្យ​សង្គ្រោះ​ជាតិ​ ​ដែល​ចុះហត្ថលេខា​ដោយ​លោក​ ​សម​ ​ រង្សី​ ​ប្រធាន​ ​ចលនា​ប្រជាធិបតេយ្យ​សង្គ្រោះ​ជាតិ​ ​និង​លោក​ ​កឹម​ ​សុខា ​ ​អនុប្រធាន​ចលនា​ប្រជាធិបតេយ្យ​សង្គ្រោះ​ជាតិ ចុះ​ថ្ងៃ​ទី​៦ ​ខែ​មីនា​ ​ឆ្នាំ​២០១៣ បង្ហាញថា ក្នុងជំនួប​នោះ មេដឹកនាំ​គណបក្សប្រឆាំង បាន​ឯកភាព​ជា​គោលការណ៍ ៦ ចំណុច រួមមាន​៖

១-​លោក សម រង្ស៊ី នឹង​ដឹកនាំ​ស្ថាប័ន​នីតិប្រតិបត្តិ ជា​នាយករដ្ឋមន្ត្រី នៅពេល​គណបក្ស​សង្គ្រោះ​ជាតិ​ឈ្នះឆ្នោត​។​

២-​លោក កឹម សុខា នឹង​ដឹកនាំ​ស្ថាប័ន​នីតិប្បញត្តិ ជា​ប្រធានរដ្ឋសភា​ ​នៅពេល​គណបក្ស​សង្គ្រោះ​ជាតិ​ឈ្នះឆ្នោត​។​

៣- ​បញ្ជី​បេក្ខជន​តំណាងរាស្ត្រ របស់​គណបក្ស​សង្គ្រោះ​ជាតិ សម្រាប់​ការបោះឆ្នោត​ជ្រើសតាំង​តំណាងរាស្ត្រ នីតិកាល​ទី​៥ ថ្ងៃទី​២៨ ខែកក្កដា ឆ្នាំ​២០១៣​។​

៤-​រចនាសម្ព័ន្ធ ថ្នាក់ដឹកនាំ​ជាន់ខ្ពស់​របស់​គណបក្ស​សង្គ្រោះ​ជាតិ​។​

៥-​ការបង្កើត​ក្រុម​ការងារ​សង្គ្រោះ​ជាតិ សម្រាប់​សិក្សា​ស្រាវជ្រាវ​លើ​វិស័យ​នានា​។​

៦- ​គោលនយោបាយ​ជា​យុទ្ធសាស្ត្រ របស់​គណបក្ស​សង្គ្រោះ​ជាតិ ដេល​នឹង​ដាក់​ជូន​សមាជ​លើកដំបូង​របស់​គណបក្ស​សង្គ្រោះ​ជាតិ នា​ថ្ងៃ​ទី​៧ ខែ​មេសា ឆ្នាំ​២០១៣​។​

​សូម​រម្លឹកថា លទ្ធភាព​វិល​ចូល​ប្រទេស​កម្ពុជា​វិញ របស់លោក​ ​សម​ ​រង្សី​ ​នៅតែ​ស្រពិចស្រពិល​ ​ដោយសារតែ​លោក ត្រូវបាន​តុលាការ​ក្នុងប្រទេស​កម្ពុជា កាត់ទោស ដាក់​ពន្ធនាគារ​សរុប ១០ ឆ្នាំ ក្នុង​រឿងក្តី​ព្រំដែន​កម្ពុជា​-​វៀតណាម​។

​ដោយសារ​មាន​ឈ្មោះ ​ជា​ទណ្ឌិត លោក​សម​រង្ស៊ី ត្រូវបាន គ​.​ជ​.​ប​. លប់ឈ្មោះ​ចេញពី​បញ្ជី​ឈ្មោះ​បោះឆ្នោត ហើយ​តាម​ច្បាប់​បោះឆ្នោត លោក សម រង្ស៊ី មិន​អាច​ឈរឈ្មោះ​ជា​តំណាងរាស្ត្រ ដើម្បី​ឈាន​ទៅ​ធ្វើ​ជា​នាយករដ្ឋមន្ត្រី បានឡើយ​។​

​ជា​ការកត់សម្គាល់ គ​.​ជ​.​ប​. ក៏​បាន​កំណត់​ថា ការចុះបញ្ជី​គណបក្សនយោបាយ ឈរឈ្មោះ​បោះឆ្នោត និង​បញ្ជី​បេក្ខជន​តំណាងរាស្ត្រ នឹង​ចាប់ផ្តើម​ពី​ថ្ងៃ​ទី​២៩ ខែ​មេសា ឆ្នាំ​២០១៣ ដល់​ថ្ងៃ​ទី​១៣ ខែ​ឧសភា ឆ្នាំ​២០១៣​។ រីឯ​ការបោះឆ្នោត នឹង​ធ្វើឡើង នៅ​ថ្ងៃ​ទី​២៨ ខែកក្កដា ឆ្នាំ​២០១៣​។​

​គណបក្ស​សមរង្ស៊ី និង​គណបក្ស​សិទ្ធិមនុស្ស បាន​សម្រេច​ថា ដាក់​បេក្ខភាព​ឈរ​ឈ្មោះ​តំណាងរាស្ត្រ នៅក្នុង​គណបក្ស​សង្គ្រោះ​ជាតិ​តែ​មួយ​រួមគ្នា សម្រាប់​ចូលរួម​ការបោះឆ្នោតជាតិ នៅ​ថ្ងៃ​ទី​២៨ ខែកក្កដា ឆ្នាំ​២០១៣៕​