Thai Army sent many tanks and APCs to Cambodian-Thai border and suspended the imports of rice from Cambodia ថៃនាំរថពាសដែក ជាច្រើនគ្រឿង មកក្បែរព្រំដែនកម្ពុជា និងផ្អាកនាំស្រូវ ពីកម្ពុជា

Wednesday, 30 January 2013 ដោយៈ ដើមអម្ពិល (DAP)-ID: 009

បន្ទាយមានជ័យ៖ ថៃបាននាំរថពាសដែកជា ច្រើនគ្រឿង មកក្បែរតំបន់ព្រំដែនកម្ពុជា ព្រមទាំងផ្អាកការនាំចូល ស្រូវពីកម្ពុជាជាបណ្តោះអាសន្ន ថែមទៀតផង នៅល្ងាចថ្ងៃទី៣០ ខែមករា ឆ្នាំ២០១៣។ ការយករថពាសដែក និង ផ្អាក ការនាំចូលស្រូវពីកម្ពុជានេះ កើតមានឡើង បន្ទាប់ពីកើតជម្លោះរវាងតម្រួតថៃ ជាមួយឈ្មួញថៃ រហូតឈាន ដល់ការផ្ទុះអាវុធជាង១០គ្រាប់ កាលពីយប់មិញ។

កាលពីយប់ថ្ងៃទី២៩ ខែមករា ឆ្នាំ២០១៣ តម្រួតថៃ បានបាញ់ជាង១០គ្រាប់ នៅក្បែរព្រំដែនកម្ពុជា-ថៃ ចម្ងាយ ១០០ម៉ែត្រពីប៉ុស្តិ៍អូរស្វាយ ទប់ស្កាត់ឈ្មួញថៃ ដែលនាំស្រូវពីប្រទេសកម្ពុជា។ ការបាញ់នេះបណ្តាល ឲ្យតម្រួតថៃ ម្នាក់រង របួសផងដែរ។

លោក ប្រាក់ សាំ មេបញ្ជាការវរៈនគរបាលការពារព្រំដែនគោកលេខ៨០៧ បានឲ្យដឹងនៅថ្ងៃទី៣០ ខែមករា ឆ្នាំ ២០១៣ថា ការបាញ់នេះ ស្ថិតនៅក្នុងទឹកដីថៃ ក្នុងភូមិចាប់សាន់ ឃុំតាប្រាយ៉ា ស្រុកតាប្រាយ៉ា ខេត្តស្រះកែវ ប្រ ទេសថៃ ឈមគ្នានិងទឹកកម្ពុជាខាងជើងបង្គោលសីមាលេខ ៣៤ ភូមិសាមគ្គី ឃុំគោករមៀត ស្រុកថ្មពួក ខេត្ត បន្ទាយមានជ័យ។

មេបញ្ជាការរូបនេះ បានបន្តថា ជម្លោះរវាងតម្រួតថៃ និងឈ្មួញថៃ ដែលមកទិញស្រូវពីពលរដ្ឋកម្ពុជា តាមព្រំដែន រហូតឈានដល់ការផ្ទុះអាវុធនេះ បណ្តាលឲ្យតម្រួតថៃម្នាក់រងរបួសផងដែរ តែមិនបានបណ្តាលឲ្យឈ្មួញណាម្នាក់ រងរបួសនោះទេ។

លោក ប្រាក់ សាំ បានបន្តថា ការដែលតម្រួតថៃបំផ្ទុះអាវុធនេះ ដោយសារពួកគេបានចោទថា ឈ្មួញថៃ នាំស្រូវ ចូលតាមច្រករបៀងខុសច្បាប់។ រហូតល្ងាចថ្ងៃទី៣០ ខែមករា ឆ្នាំ២០១៣ ស្រូវពលរដ្ឋខ្មែរ ត្រូវបានផ្អាកនាំចេញ ទៅប្រទេសថៃ ជាបណ្តោះអាសន្ន រង់ចាំខាងភាគីថៃដោះស្រាយគ្នារួចសិន ទើបដំណើរការដូចដើមវិញ។

ក្រោយកើតហេតុភ្លាមៗនៅចំណុចខាងលើត្រូវបានសមត្ថកិច្ចថៃ នាំយករថពាសដែកជាច្រើនគ្រឿង មកដាក់នៅ ចំណុចនេះ បើទោះបីជាមានការផ្ទុះអាវុធបែបនេះក៏ដោយសមត្ថកិច្ចកម្ពុជា មិនបាញ់តបតវិញដែរ តែមានភាពប្រុង ប្រយត្ន័ ហើយក៏បានចូលទៅអន្តរាគមន៍យកពួកឈ្មួញខ្មែរត្រលប់មកវិញដោយសុវត្ថិភាពផងដែរ៕