អាជ្ញាធរភូមិមួយនៅស្រុកព្រៃកប្បាស ខេត្តតាកែវ
រងនូវការចោទពីប្រជាពលរដ្ឋថាបានរំលោភលើសេរីភាពនៃការទទួលបាន
ព័ត៌មាន តាមរយៈការបើកស្តាប់វិទ្យុនៅក្នុងផ្ទះ។ ប៉ុន្តែការចោទនេះ
ត្រូវអាជ្ញាធរភូមិបដិសេធថាជាការមិនពិត។
ប្រជាពលរដ្ឋនៅភូមិអង្គសង្កែ ឃុំពោរំចាក ស្រុកព្រៃកប្បាស
ខេត្តតាកែវ មួយរូប បានចោទថា
មេភូមិនោះឲ្យពលរដ្ឋផ្ដិតមេដៃប្ដឹងគាត់
ខណៈគាត់ស្តាប់វិទ្យុដែលផ្សាយពីលទ្ធិប្រជាធិបតេយ្យ។
លោក មាច ឈន អាយុ ៦២ឆ្នាំ រស់នៅភូមិអង្គសង្កែ
អះអាងនៅព្រឹកថ្ងៃទី១២ ខែមករា ថា
គាត់ត្រូវបានប្រជាពលរដ្ឋក្នុងភូមិខ្សឹបប្រាប់ថា
មេភូមិឲ្យពួកគាត់ផ្ដិតមេដៃប្ដឹងទៅប៉ូលិស
ឲ្យកោះហៅគាត់ទៅដាក់ទោសពីបទបើកស្តាប់វិទ្យុដែលផ្សាយពី
លទ្ធិប្រជាធិបតេយ្យរំខានអ្នកជិតខាង។
លោកបន្តថា មេភូមិនោះជាសមាជិកគណបក្សប្រជាជនកម្ពុជា
នៅផ្ទះទល់មុខផ្ទះគាត់ ហើយកន្លងមក
មេភូមិនេះមិនដែលមកហាមគាត់ថាកុំឲ្យបើកស្តាប់វិទ្យុឮៗ
ឬអ្វីនោះទេ។
ស្រាប់តែឲ្យប្រជាពលរដ្ឋក្នុងភូមិខ្លះនៅឆ្ងាយពីផ្ទះគាត់ប្រមាណ
២០០ម៉ែត្រ ក៏ឲ្យផ្ដិតមេដៃដែរ
ប្ដឹងគាត់ថាបើកវិទ្យុរំខានគេទៅវិញ៖ «ប្រធានភូមិនេះដើរផ្ដិត
មេដៃពីប្រជារាស្ត្រថាប្ដឹងខ្ញុំ គាត់ផ្ដិតបានជាង ១០នាក់។ ឥឡូវ
ខ្ញុំស្តាប់គ្រប់គណបក្សទាំងអស់។
ខ្ញុំស្តាប់តែគោលការណ៍របស់ប្រជាធិបតេយ្យហ្នឹង
តើជួយរាស្ត្រយ៉ាងម៉េចអីម៉េច ហើយបិទសិទ្ធិខ្ញុំមិនឲ្យស្តាប់»។
អ្នកស្រី ប៉ុក ឡៃជា ផ្ទះគាត់នៅប្រមាណ ៥០ម៉ែត្រពីផ្ទះលោក មាច ឈន
អះអាងថា គាត់ដើរកាត់មុខផ្ទះលោក មាច ឈន
ទើបឮសំឡេងនិយាយពីក្នុងវិទ្យុដែលបើកនោះ។
តែគាត់មិនដឹងការនិយាយក្នុងវិទ្យុនោះជានយោបាយ ឬអ្វីទេ
ពីព្រោះមនុស្សចាស់គាត់តែងតែស្តាប់ ចង់ដឹងព័ត៌មានផ្សេងៗ។
យ៉ាងណាក្តី អ្នកស្រីមិនបានប្ដឹងលោក មាច ឈន ទេ៖ «គាត់មានរំខានឯណា គាត់បើកស្តាប់តែគាត់ហ្នឹង។ អត់រំខានខ្ញុំទេ។ ខ្ញុំអត់បានប្ដឹងគាត់ទេ»។
ពាក់ព័ន្ធការលើកឡើងនោះ មេភូមិអង្គសង្កែ លោក សេក សាមិត្ត
បានបំភ្លឺថា ប្រជាពលរដ្ឋបានប្ដឹងមកអាជ្ញាធរភូមិថា លោក មាច ឈន
បើកវិទ្យុស្តាប់នៅម៉ោងដែលគេត្រូវសម្រាក។
លោកមិនបានហាមការស្តាប់ព័ត៌មាននោះទេ តែពលរដ្ឋប្ដឹង
លោកត្រូវតែអនុវត្តតាមសំណើប្រជាពលរដ្ឋដែលប្ដឹងមក៖ «អាហ្នឹងជា
សិទ្ធិហើយ ប៉ុន្តែក្រែងវាប៉ះពាល់ដល់សិទ្ធិអ្នកដទៃដែរ
ដូចថាគេសម្រាកមកពីធ្វើការអស់កម្លាំង យើងដាក់ខ្លាំងៗ
សូម្បីតែអ្នកកូនខ្ចី គាត់ក៏មកសុំនេះដែរ
គាត់ក៏មកប្រាប់ខ្ញុំថា កូនខ្ញុំដេកអត់លក់ ដែលទើបឆ្លងទន្លេហើយ
កូនង៉ែតកូនង៉ាអីហ្នឹង។ ហើយយើងមិនមែនទៅបិទគេទេ
គ្រាន់តែសុំគេឲ្យបន្ថយវ៉ូលីម បន្ថយសំឡេងទៅ
កុំឲ្យវារំពងសំឡេងខ្លាំងពេក គ្រាន់តែប៉ុណ្ណឹងទេ»។
ជំទប់ទី១ ឃុំពោរំចាក លោក សោម គ្រី ថ្លែងថា
គាត់ក៏បានទទួលដំណឹងថាពលរដ្ឋក្នុងភូមិអង្គសង្កែ
ផ្ដិតមេដៃឲ្យទៅមេភូមិមែន។ ការផ្ដិតមេដៃនោះ
អ្នកភូមិមិនបានដឹងថា មេភូមិយកមេដៃគាត់ទៅប្ដឹងលោក មាច ឈន ទេ
អ្នកភូមិស្មានតែផ្ដិតមេដៃសុំអភិវឌ្ឍន៍ភូមិ
ទើបនាំគ្នាផ្ដិតឲ្យមេភូមិ។
អ្នកភូមិខ្លះចេះមើលអក្សរនៅខាងក្បាលសន្លឹកផ្ដិតនោះ
បានផ្អើលថាមេដៃផ្ដិតនោះយកទៅប្ដឹងលោក មាច ឈន
ទើបរឿងបែកធ្លាយឮដល់អាជ្ញាធរឃុំ។
មន្ត្រីស៊ើបអង្កេតសមាគមការពារសិទ្ធិមនុស្ស ខេត្តតាកែវ លោក អ៊ុក
ផាន្ទន់ ថ្លែងថា
ប្រសិនបើអ្នកបើកវិទ្យុស្តាប់នោះបើកឮហួសអ្វីដែលគាត់ស្តាប់ឮ
ជារឿងខុសច្បាប់ អាចចោទថាមានចេតនារំខានគេជិតខាងមែន។ ក៏ប៉ុន្តែ
បើគាត់បើកស្តាប់គ្រាន់តែឮល្មម មិនរំខានពេញភូមិទេ
មេភូមិនោះគឺគាត់បានរំលោភសិទ្ធិប្រជាពលរដ្ឋ
ក្នុងការទទួលបានព័ត៌មានសំខាន់ៗ
ដែលផ្សព្វផ្សាយតាមស្ថានីយវិទ្យុមកដល់ប្រជាពលរដ្ឋ។ លោកថា ជាទូទៅ
ស្ថានីយផ្សព្វផ្សាយនីមួយៗមានច្បាប់អនុញ្ញាតពីរាជរដ្ឋាភិបាល
សម្រាប់ការផ្សាយព័ត៌មានបន្តឲ្យទូលាយនូវព័ត៌មានសំខាន់ៗជូនដល់
អ្នកស្តាប់ ជាពិសេសពលរដ្ឋនៅតាមជនបទ
ដែលពួកគាត់មានសិទ្ធិបើកស្តាប់ តែក៏មិនបើករំខានគេឯងដែរ៕
No comments:
Post a Comment