ដោយ វណ្ណ វិចារ 2012-12-24 RFA
បន្ទាប់ពីសាកសួរអស់រយៈពេលជាង ២ម៉ោងមក នៅថ្ងៃទី២៤ ធ្នូ
សាលាដំបូងរាជធានីភ្នំពេញ
មិនទាន់ទម្លាក់ចោលការចោទប្រកាន់លើរូបលោក ចាន់ សុវ៉េត
មន្ត្រីសិទ្ធិមនុស្ស អង្គការអាដហុក (Adhoc) នោះទេ។
សកម្មជនការពារសិទ្ធិមនុស្សសមាគមអាដហុក
លោក ចាន់ សុវ៉េត (ឆ្វេង) ដើរចេញពីសាលាដំបូងរាជធានីភ្នំពេញ
នៅថ្ងទី២៤ ធ្នូ ឆ្នាំ២០១២។
តុលាការរាជធានីភ្នំពេញ សម្រេចតាមដានលោក ចាន់ សុវ៉េត
តាមផ្លូវច្បាប់ ប៉ុន្តែមិនទាន់ទម្លាក់ចោលការចោទប្រកាន់
ឬលើកលែងការចោទប្រកាន់ចំពោះលោក ចាន់ សុវ៉េត ទេ បានន័យថា
មន្ត្រីការពារសិទ្ធិមនុស្សរូបនេះនៅប្រឈមនឹងការផ្ដន្ទាទោសនៅឡើយ។
ក្រុមអ្នកឃ្លាំមើលបញ្ហាសិទ្ធិមនុស្ស ហៅការសម្រេចនេះថា
ជាការគំរាមកំហែងចំពោះបញ្ហាសិទ្ធិមនុស្ស
និងសេរីភាពបញ្ចេញមតិនៅកម្ពុជា។
http://youtu.be/O5CUHawzypc
ប្រធានសមាគមការពារសិទ្ធិមនុស្សអាដហុក លោក ធន សារាយ មានប្រសាសន៍ថា
សមគមអាដហុក ស្វាគមន៍ការសម្រេចមិនឃុំខ្លួនលោក ចាន់ សុវ៉េត
តែចៅក្រមស៊ើបសួរមិនទាន់លើកលែងការចោទប្រកាន់ទេ
ដែលជាហេតុធ្វើឲ្យសមាគមអាដហុក មានការព្រួយបារម្ភ។
លោកបន្តថា សមាគមសិទ្ធិមនុស្សអាដហុក ចង់ឲ្យតុលាការលើកលែងការចោទប្រកាន់ចំពោះលោក ចាន់ សុវ៉េត៖ «បើសិនជាការនេះបន្លាយពេលយូរទៅនឹងក្លាយជាសម្ពាធអារម្មណ៍ទៅលើរូបលោក ចាន់ សុវ៉េត ដែរក្នុងការងាររបស់គាត់»។
លោក ធន សារាយ បន្តថា អំណឹះតទៅលោក ចាន់ សុវ៉េត
នឹងមិនអាចចេញពីប្រទេសបានឡើយ
តែលោកនៅតែអាចធ្វើការងារទាក់ទងនឹងការការពារសិទ្ធិមនុស្សដដែល។
យ៉ាងណាក៏ដោយ សាមីខ្លួនលោក ចាន់ សុវ៉េត មិនបានបំភ្លឺលំអិតទេ
ពីការសាកសួររបស់តុលាការ
ប៉ុន្តែលោកគ្រាន់តែបង្ហាញនូវសេចក្ដីរំភើប
និងការថ្លែងអំណរគុណចំពោះសង្គមស៊ីវិល
និងពលរដ្ឋអ្នកគាំទ្រប៉ុណ្ណោះ។
លោកបកស្រាយថា
រឿងរ៉ាវលំអិតពីស្ថានការណ៍នៅតុលាការសមាគមសិទ្ធិមនុស្សអាដហុក
និងមេធាវីរបស់លោកជាអ្នកបំភ្លឺ
តែរូបលោកនៅតែមានអារម្មណ៍ភ័យខ្លាចចំពោះការកោះហៅរបស់តុលាការនៅ
ឡើយ៖ «អារឿងចេញដីការឿងអីថាមិនភ័យ
បើឃើញតុលាការមកឃើញព្រះរាជអាជ្ញាមក ប៉ុន្តែគ្រាន់តាំងអារម្មណ៍ថា
យើងសិទ្ធិមនុស្ស
ហើយខ្ញុំសូមអរគុណមិត្តភ័ក្ដិទាំងអស់គេមិនចង់ឃុំខ្ញុំ
ដោយសារខ្ញុំមានផ្ទះមានភូមិ និងមានអ្នកគាំទ្រ»។
ទាក់ទងទៅនឹងបញ្ហានេះ ប្រធានមជ្ឈមណ្ឌលសិទ្ធិមនុស្សកម្ពុជា លោក
អ៊ូ វីរៈ មានប្រសាសន៍ថា
លោកមានការត្រេកអរចំពោះការសម្រេចមិនឃុំខ្លួនលោក ចាន់ សុវ៉េត
ប៉ុន្តែការសម្រេចមិនទម្លាក់ចោលការចោទប្រកាន់នៅតែជាការគំរាម
ដល់សេរីភាពរបស់សកម្មជនការពារសិទ្ធិមនុស្សរូបនេះ
និងសកម្មជនការពារសិទ្ធិមនុស្សដទៃទៀត។
លោកបន្តថា ការងាររបស់សកម្មជនសិទ្ធិមនុស្សទូទៅ
កំពុងតែប្រឈមនឹងគ្រោះថ្នាក់
ព្រោះតែប្រព័ន្ធតុលាការមិនទាន់គួរជាទីទុកចិត្តសម្រាប់
ប្រជាពលរដ្ឋ៖ «នៅតែជារឿងមួយគួរឲ្យព្រួយបារម្ភ
មជ្ឈមណ្ឌលនៅតែឃ្លាំមើលដោយយកចិត្តទុកដាក់មែនទែន
ដរាបណាការចោទប្រកាន់នៅតែមាន លោក ម៉ម សូណង់ដូ
នៅតែនៅក្នុងពន្ធនាគារ បរិយាកាសសិទ្ធិមនុស្សនៅតែឥតកែប្រែ
យើងនៅតែភ័យខ្លាច»។
លោក អ៊ូ វីរៈ បន្តថា មជ្ឈមណ្ឌលសិទ្ធិមនុស្សកម្ពុជា
នឹងបន្តការងារជំរុញការគោរពសិទ្ធិមនុស្សតទៅទៀត
ចំណែកឯពលរដ្ឋកម្ពុជា
ក៏ត្រូវក្រោកឈរឡើងដើម្បីជំរុញការគោរពសិទ្ធិមនុស្សដែរ។
វិទ្យុអាស៊ីសេរី
មិនអាចទាក់ទងសុំការអត្ថាធិប្បាយពីចៅក្រមស៊ើបសួរសាលាដំបូងរាជធានី
ភ្នំពេញ លោក ឆែ វីរៈ បានទេ នៅថ្ងៃទី២៤ ខែធ្នូ ឆ្នាំ២០១២។
ក្នុងពេលដែលចៅក្រមស៊ើបសួរកំពុងតែស្ដាប់ចម្លើយលោក ចាន់ សុវ៉េត
នៅក្នុងតុលាការ នៅខាងក្រៅរបងតុលាការវិញ
ក៏មានការចូលរួមឃ្លាំមើលពីសំណាក់ស្ថាប័នការពារសិទ្ធិមនុស្ស
តំណាងស្ថានទូតបរទេស ពលរដ្ឋដែលធ្លាប់មានបញ្ហាដីធ្លី
និងអ្នកសារព័ត៌មានជាតិ និងអន្តរជាតិជាច្រើននាក់។
ចៅក្រមស៊ើបសួរសាលាដំបូងរាជធានីភ្នំពេញ លោក ឆែ វីរៈ នៅដើមខែធ្នូ
បានចេញដីកាកោះហៅទៅលោក ចាន់ សុវ៉េត ឲ្យចូលខ្លួននៅថ្ងៃច័ន្ទ ទី២៤
ធ្នូ ឆ្នាំ២០១២ ដោយតុលាការចោទប្រកាន់លោក ចាន់ សុវ៉េត
ថាបានផ្ដល់លុយឲ្យអ្នកដែលចូលរួមចលនាទាមទារដីធ្លី
ដែលរដ្ឋាភិបាលចាត់ទុកថា ជាការបង្កើតតំបន់អបគមន៍។ ប៉ុន្តែលោក ចាន់
សុវ៉េត និងសមាគមអាដហុក អះអាងថា លោក ចាន់ សុវ៉េត បដិសេធថា
មិនបានធ្វើដូចការចោទប្រកាន់ទេ។
ក្រុមអ្នកវិភាគបញ្ហាសង្គមឲ្យដឹងថា តាមរយៈការសម្រេចនេះ លោក
ចាន់ សុវ៉េត នឹងបាត់បង់សេរីភាពមួយចំនួន ដូចជាការដើរហើរ
ការផ្លាស់ទីលំនៅ ការធ្វើដំណើរទៅបរទេស
ជាពិសេសការសម្ពាធក្នុងផ្លូវចិត្ត និងអារម្មណ៍ភ័យខ្លាច៕
No comments:
Post a Comment