The opposition said there are four ways in which the government can increase the revenue that can use to fund a $10 a month pension to old age people:
1. Tax on land concessions which can earn $182 million per year.
2. Impose profit tax on casino which can earn $300 million per year .
Currently, the government only collected $20 million per year from
casino tax.
3. Proper administration of imported oil tax which can raise $481
million per year. Currently, the government only collected $161 million
per year.
4. Tax on entrance tickets to visit Angkor Wat which can earn $140-$150 million per year.
ដោយ កែវ និមល 2012-12-25 RFA
ជាថ្មីម្ដងទៀត លោកនាយករដ្ឋមន្ត្រី ហ៊ុន សែន
ដែលជាអនុប្រធានគណបក្សប្រជាជនកម្ពុជា បានឡកឡឺយដាក់លោក កឹម សុខា
ប្រធានគណបក្ស សិទ្ធិមនុស្ស ថា បានដើរឃោសនាបោកប្រាស់ប្រជាពលរដ្ឋ។
លោកនាយករដ្ឋមន្ត្រី ហ៊ុន សែន
ក្នុងពិធីសម្ពោធដាក់ឲ្យប្រើប្រាស់រោងចក្រផលិតជីកសិកម្មអន្តរជាតិ
ផ្កាយ៥ របស់វៀតណាម នៅស្រុកកៀនស្វាយ ខេត្តកណ្ដាល កាលពីថ្ងៃទី២៥
ខែធ្នូ ឆ្នាំ២០១២។
ក្នុងសារនយោបាយដែលលោក ហ៊ុន សែន មិនបាននិយាយចំឈ្មោះ
តែគេដឹងថាសំដៅលើលោក កឹម សុខា នោះ លោក ហ៊ុន សែន បានរិះគន់ថា បក្ស
សិទ្ធិមនុស្ស បានសន្យាថានឹងជូនប្រាក់ខែដល់មនុស្សចាស់ជរា
ប្រសិនបក្សនេះឈ្នះឆ្នោត។ ការសន្យាបែបនេះហើយ
ដែលលោកនាយករដ្ឋមន្ត្រីអះអាងថា ជារឿងមិនអាចធ្វើទៅបាន។ ក៏ប៉ុន្តែ
លោក កឹម សុខា ឆ្លើយថា លោកអាចធ្វើបានដោយងាយ
គឺគ្រាន់តែបំបាត់អំពើពុករលួយតែប៉ុណ្ណោះ។
លោកនាយករដ្ឋមន្ត្រី ហ៊ុន សែន បានថ្លែងនៅថ្ងៃទី២៥ ធ្នូ
ក្នុងពិធីសម្ពោធរោងចក្រធ្វើជីកសិកម្មនៅខេត្តកណ្ដាល ថា
មានអ្នកនយោបាយខ្លះបានសន្យាជាមួយប្រជាពលរដ្ឋថា
បើសិនជាខ្លួនឈ្នះឆ្នោត
នឹងបើកប្រាក់ខែឲ្យមនុស្សចាស់ដែលមានអាយុចាប់ពី ៦៥ឆ្នាំឡើងទៅ
ក្នុង១ខែ ៤ម៉ឺនរៀលលុយខ្មែរ ឬប្រហែល ១០ដុល្លារអាមេរិក។ លោក ហ៊ុន សែន
បាននិយាយថា ពាក្យសន្យានោះជាពាក្យសន្យាដែលមិនអាចធ្វើបាន។
លោកនាយករដ្ឋមន្ត្រី ហ៊ុន សែន៖ «ខ្ញុំថាឱស្រុកខ្មែរយើងរលាយ
រហ័សហើយ ឲ្យតែសន្យាបែបនេះ។ ឥឡូវយើងគិតស្រុកខ្មែរយើង
មនុស្សចាប់ពីអាយុ ៦៥ ឡើងទៅ មានប្រហែល ២លានទៅ ៣លាន
នេះហើយជាកិច្ចសន្យា គឺស្រួលណាស់ នេះហើយជាកិច្ចសន្យា
គឺស្រួលណាស់។ ហើយមានអ្នកខ្លះថា សុំ ៥ម៉ឺន ៥ម៉ឺនក៏បាន។ ៦ម៉ឺន
៦ម៉ឺនក៏បាន យី! នែអាឡើងរហ័សនោះស្រួលណាស់វើយ តែពិបាកបំផុត
ពិបាកអាអ្នកនៅផ្ទះស្បូវ ទៅសន្យាធ្វើផ្ទះក្បឿងឲ្យគេនោះ។
ហើយខ្លួនឯងជិះកង់សោះ ទៅសន្យាថា បើខ្ញុំឈ្នះឲ្យម៉ូតូ
កោតតែទៅរួចណាស់។ តែមានបងប្អូនប្រជាពលរដ្ឋខ្លះនិយាយថា
អញមិនយកទេម៉ឺននោះ អញយកសែនវិញ។ សែនមានន័យថា ហ៊ុន សែន
ពីព្រោះអញបានសុខយូរហើយដោយសារ សែន នោះ ទៅយកអីអាម៉ឺនខ្យល់នោះ»។
លោក ហ៊ុន សែន បាននិយាយទៀតថា ក្នុងនាមលោកជានាយករដ្ឋមន្ត្រីនោះ
លោកក៏ចង់បើកប្រាក់ខែឲ្យមនុស្សចាស់នៅកម្ពុជា ដែរ
ប៉ុន្តែរដ្ឋវាគ្មានលុយ
ដូច្នេះមិនដឹងបានប្រាក់ពីណាមកចែកឲ្យមនុស្សចាស់នៅកម្ពុជា នោះ៖ «ខ្ញុំ
ចង់ឲ្យប្រជាពលរដ្ឋរបស់យើងច្រើនជាងហ្នឹង ឲ្យដល់សែនៗនោះ
តែវាអត់មានលុយ ធ្វើម៉េច? វាមិនមែនជារឿងលេងឯណា? តែអានេះ
វាជាសិទ្ធិរបស់គេទេ។
ប៉ុន្តែទម្លាប់ស្រុកខ្មែរយើងវាតែប៉ុណ្ណឹងទៅហើយ
មិនទាន់ដល់រដូវឃោសនាផង ឃោសនាបាត់ទៅហើយ»។
ការលើកឡើងរបស់លោក ហ៊ុន សែន គឺឆ្លើយតបចំពោះមតិលោក កឹម សុខា
ប្រធានគណបក្ស សិទ្ធិមនុស្ស ដែលបានជួបជាមួយប្រជាពលរដ្ឋនៅតាមខេត្ត
ខណ្ឌនានា លោកតែងតែលើកឡើងថា
សុំឲ្យប្រជាពលរដ្ឋបោះឆ្នោតគាំទ្រគណបក្ស សិទ្ធិមនុស្ស
ហើយបើសិនជាគណបក្ស សិទ្ធិមនុស្ស ឈ្នះឆ្នោត
នឹងរៀបចំឲ្យមានថវិកាជាតិជួយទ្រទ្រង់មនុស្សចាស់ចាប់ពីអាយុ
៦៥ឆ្នាំឡើងទៅ ក្នុង១ខែ ៤ម៉ឺនរៀលលុយខ្មែរ ឬប្រហែល
១០ដុល្លារអាមេរិក។
ឆ្លើយតបចំពោះការលើកឡើងរបស់លោក ហ៊ុន សែន នេះ លោក កឹម សុខា
សមាជិកសភា និងជាប្រធានគណបក្ស សិទ្ធិមនុស្ស
មានប្រសាសន៍ពីប្រទេសបារាំង ឲ្យដឹងថា ការជួយផ្គត់ផ្គង់មនុស្សចាស់
ជាគោលនយោបាយគណបក្សលោក ហើយលុយជួយទាំងនោះបានមកពីថវិកាជាតិ៖ «យើង
ឃើញគ្រាន់តែថវិកាបានមកពីវិស័យទេសចរណ៍នោះ គឺមានទេសចរ ៣លាននាក់
បានចំណូលប្រហែល ១២០លានដុល្លារ ហើយយើងនៅលុយបំបាត់អំពើពុករលួយ
ហើយលុយចូលពីវិស័យផ្សេងៗទៀតជាច្រើនទៀត។ ហើយយើងខ្ញុំហ៊ានសន្យា
យើងធ្វើបាន ហើយបើយើងខ្ញុំធ្វើមិនបាន
គឺចុះចេញពីតំណែងភ្លាមតែម្តង»។
លោក កឹម សុខា បន្ថែមថា ការលើកឡើងរបស់លោក ហ៊ុន សែន
ទាក់ទងការជួយមនុស្សចាស់នេះ ដោយសារលោក ហ៊ុន សែន
មានការព្រួយបារម្ភថា ប្រជាពលរដ្ឋបោះឆ្នោតគាំទ្រគណបក្សដែលលោក កឹម
សុខា ដឹកនាំ ហើយម៉្យាងទៀត ដោយសារលោក ហ៊ុន សែន
កាន់អំណាចជាយូរមកហើយ តែមិនដែលបានគិតគូរជួយមនុស្សចាស់សោះ។
លោក កឹម សុខា៖ «ពីព្រោះអីដែលបានសន្យា គឺខ្ញុំបានធ្វើ។
ហើយអីដែលគាត់សន្យា គាត់អត់បានធ្វើច្រើនណាស់។
អីចឹងហើយបានជាគាត់ភ័យខ្លាចប្រជាពលរដ្ឋងាកមកគាំទ្រគោលនយោបាយ
នេះ។ ហើយគោលនយោបាយនេះ ប្រទេសជាច្រើនលើពិភពលោក
គេបានធ្វើច្រើនណាស់។
ក្នុងនាមរដ្ឋាភិបាលត្រូវមានការទទួលខុសត្រូវ។ បើគាត់ចង់ធ្វើ
គាត់ធ្វើបានច្រើនយ៉ាងណាស់។ ប៉ុន្តែខ្ញុំឃើញថា
គាត់ទុកលុយឲ្យពុករលួយ ខ្ជះខ្ជាយអត់ប្រយោជន៍ជាច្រើន។
មានបញ្ហាធំៗជាច្រើនដែលគាត់ធ្វើមិនបាន»។
ការមានមតិរិះគន់របស់លោកនាយករដ្ឋមន្ត្រី ហ៊ុន សែន ទៅលើលោក កឹម
សុខា អំពីកម្មវិធីនយោបាយនានាក្នុងពេលនេះ
ដោយសារការបោះឆ្នោតរើសសមាជិករដ្ឋសភាអាណត្តិទី៥ នៅថ្ងៃទី២៨ កក្កដា
កាន់តែឈានជិតមកដល់ហើយ។ បច្ចុប្បន្ននេះ លោក សម រង្ស៊ី ប្រធានគណបក្ស
សម រង្ស៊ី មិនទាន់អាចចូលមកក្នុងប្រទេសបាន
និងត្រូវអាជ្ញាធរលុបឈ្មោះចេញមិនឲ្យមានសិទ្ធិបោះឆ្នោតឡើយ
ដូច្នេះនៅសល់តែលោក កឹម សុខា
ជាបេក្ខជនម្នាក់គត់ដែលមានសក្ដានុពលអាចប្រជែងតំណែងនាយក
រដ្ឋមន្ត្រីជាមួយលោក ហ៊ុន សែន បាន៕
1 comment:
បងប្អូនខ្មែរម្ចាស់ឆ្នោតគួរជ្រើសរើស$10 ក្នុងមួយខែ វាប្រសើរជាង ប៊ីចេងកន្លះគីឡូសុីប្រាំឆ្នាំ
ឬ ក៏ សារុងមួយ ( $2 ) ស្លៀកប្រាំឆ្នាំ ។ បើលោកកឹម សុខាថាផ្តល់ប្រយោជន៍ឲ រាស្ត្រច្រើន
គួរឲខ្មែរសាកល្បងដែរ បើសិនជាមិនកើតដូចការសន្យា ទើបលោកហុ៊ន សែន មានសឹទ្ធនិយាយ
រិះគន់ មិនត្រូវឡូឡា ព្រោះតែខ្លួនឯងគ្មានមធ្យោបាយ ក៍ដូចជាសារភាពថាខ្លួន (ហុ៊ន សែន ) មិន
អាចកំចាត់អំពើពុករលួយបាន ។
Post a Comment