ពុធ 15 សីហា 2012 Free Press Magazine
គណបក្សប្រឆាំងទាំងពីរក្នុងប្រទេសកម្ពុជា គឺគណបក្សសមរង្ស៊ី
និងគណបក្សសិទ្ធិមនុស្ស ដែលបានចងសម្ព័ន្ធភាពនឹងគ្នាកាលពីខែមុន
ពេលនេះកំពុងតែរៀបចំរចនាសម្ព័ន្ធដើម្បីឈានទៅបង្កើតគណបក្សថ្មី
រួមគ្នាហើយ។
លោក កឹម សុខា និងលោក សម រង្ស៊ី ត្រូវសង្ឃឹមថា នឹងដឹកនាំ គណបក្សថ្មីដែលបង្កើតឡើងដោយការរួមគ្នារវាងគណបក្សប្រឆាំងទាំងពីរ នៅកម្ពុជា
លោក ប៉ុល ហំម អ្នកនាំពាក្យចលនាប្រជាធិបតេយ្យសង្រ្គោះជាតិ
ដែលជាចលនារួមគ្នារវាងគណបក្សសមរង្ស៊ី និងគណបក្សសិទ្ធិមនុស្សនោះ
បានឲ្យដឹងថា
ពេលនេះគណបក្សទាំងពីរបានរៀបចំមនុស្សចំនួន៨០នាក់ដើម្បីឈានទៅ
បង្កើតគណបក្សថ្មីមួយដែលមានឈ្មោះថា «គណបក្សសង្រ្គោះជាតិ»។
បើតាមលោក ប៉ុល ហំម ការបង្កើតគណបក្សថ្មីនេះ
គឺមិនបានរំលាយគណបក្សចាស់ចោលភ្លាមៗទេ។
នោះក៏ដោយសារតែគណបក្សចាស់មានអាសនៈនៅក្នុងរដ្ឋសភា ព្រឹទ្ធសភា
ក្រុមប្រឹក្សារាជធានី-ខេត្ត ស្រុក-ខណ្ឌ
និងក្រុមប្រឹក្សាឃុំ-សង្កាត់ផងដែរ។
លោក ប៉ុល ហំម បានបញ្ជាក់ថា
សមាជិកគណបក្សចាស់ដែលកំពុងមានឈ្មោះនៅក្នុងអាសនៈរដ្ឋសភា ព្រឹទ្ធសភា
ក៏ដូចជាក្រុមប្រឹក្សារាជធានី-ខេត្ត ស្រុក-ខណ្ឌ
គឺមិនទាន់អាចចាកចេញមកចូលរួមជាមួយគណបក្សថ្មីនាពេលនេះបានទេ។
ប៉ុន្តែនៅពេលជិតដល់ការបោះឆ្នោតឆ្នាំ២០១៣
ពួកគេអាចចេញពីគណបក្សចាស់ មកឈរឈ្មោះនៅគណបក្សថ្មីបាន។
តាមច្បាប់នយោបាយរបស់ប្រទេសកម្ពុជា
ដើម្បីបង្កើតគណបក្សនយោបាយមួយបាន
ចាំបាច់ត្រូវតែមានការចូលរួមពីប្រជាពលរដ្ឋខ្មែរយ៉ាងតិច៨០នាក់
ដែលមានអាយុយ៉ាងតិច១៨ឆ្នាំ
ហើយមានទីលំនៅអចិន្រ្តៃយ៍ក្នុងប្រទេសកម្ពុជា
និងត្រូវជូនដំណឹងជាលាយលក្ខណ៍អក្សរទៅក្រសួងមហាផ្ទៃ។
តាមច្បាប់ដដែលនេះ គណបក្សនយោបាយដែលបង្កើតថ្មី
ត្រូវបោះឆ្នោតជ្រើសតាំងគណៈកម្មាធិការបណ្តោះអាសន្នមានសមាជិកយ៉ាង
តិច៧រូប និងមានអាយុយ៉ាងតិច២៥ឆ្នាំ សម្រាប់រៀបចំបែបបទ
និងបំពេញលក្ខខណ្ឌ នៃការចុះបញ្ជីគណបក្សនយោបាយ។
ច្បាប់ស្តីពីគណបក្សនយោបាយក៏បានកំណត់ដែរថា ប្រជាពលរដ្ឋខ្មែរម្នាក់
មិនអាចជាសមាជិកគណបក្សនយោបាយលើសពីមួយ ក្នុងពេលតែមួយបានទេ៕
No comments:
Post a Comment